قاسىم- جومارت توقايەۆ «قورعاس» حالىقارالىق ساۋدا ورتالىعىندا بىرلەسكەن ازىق- تۇلىك حابىن قۇرۋدى ۇسىندى

شيان. قازاقپارات - ءبىز مەملەكەتتەرىمىزدىڭ اگرارلىق الەۋەتىن ءتيىمدى پايدالانۋىمىز كەرەك. سوندا ەلدەرىمىزدىڭ ازىق- تۇلىك قاۋىپسىزدىگىن ايتارلىقتاي نىعايتامىز.

بۇل تۋرالى ق ر پرەزيدەنتى قاسىم- جومارت توقايەۆتىڭ ءبىرىنشى «ورتالىق ازيا - قىتاي» سامميتىندە ءمالىم ەتتى، دەپ حابارلايدى قازاقپارات.

«اۋىل شارۋاشىلىعى سالاسىنداعى ىقپالداستىقتى دامىتۋ كەرەك. قازىر جاھاندىق ازىق- تۇلىك نارىعى ءجيى قۇبىلىپ تۇر. سوندىقتان ءبىز وسى سالاداعى ىنتىماقتاستىقتى نىعايتا تۇسكەنىمىز ءجون. قازاقستان اگروونەركاسىپ ونىمدەرىنىڭ ەكسپورتىن ارتتىرۋعا جانە ونىڭ ءتۇرىن كوبەيتۋگە مۇددەلى. ەلىمىز بيداي جانە ۇن وندىرەتىن الەمدەگى ەڭ ءىرى ون ەلدىڭ قاتارىنا كىرەدى. جىل سايىن 5 ميلليون توننادان استام بيداي مەن 1,5 ميلليون توننا ۇن ەكسپورتتايمىز. شارۋالارىمىز سىرتقا شىعارىلاتىن ءداندى جانە مايلى داقىلداردىڭ كولەمىن ارتتىرۋعا دايىن. ولار ەكولوگيالىق جاعىنان تازا ءارى جوعارى سۇرىپتى ەت پەن ورگانيكالىق ونىمدەردى دە كوپتەپ جەتكىزە الادى. ەسەسىنە، باۋ- باقشا ونىمدەرى مەن ازىق- تۇلىك تاۋارلارىن تۇراقتى ساتىپ الۋعا مۇددەلىمىز. ءبىز مەملەكەتتەرىمىزدىڭ اگرارلىق الەۋەتىن ءتيىمدى پايدالانۋىمىز كەرەك. سوندا ەلدەرىمىزدىڭ ازىق- تۇلىك قاۋىپسىزدىگىن ايتارلىقتاي نىعايتامىز. بۇل قادام ءبارىمىزدىڭ مۇددەمىزگە ساي كەلەدى. وسى رەتتە مەن «قورعاس» حالىقارالىق ساۋدا ورتالىعىندا بىرلەسكەن ازىق- تۇلىك حابىن قۇرۋدى ۇسىنامىن. اگروونەركاسىپ سالاسىندا سيفرلىق جانە «جاسىل» تەحنولوگيالاردى ەنگىزۋ ماسەلەسىنە باسا ءمان بەرگەن ءجون. بۇل ىستە قىتايلىق سەرىكتەستەرىمىزدىڭ تاجىريبەسى مەن مۇمكىندىگى اسا قاجەت»، - دەپ اتاپ ءوتتى مەملەكەت باسشىسى.

قازاقستان «ءبىر بەلدەۋ - ءبىر جول» جوباسىنا اتسالىسا بەرەدى.

«كولىك- لوگيستيكا ينفراقۇرىلىمىن دامىتۋىمىز قاجەت. ون جىل بۇرىن استانادا شي جينپيڭ مىرزا «ءبىر بەلدەۋ - ءبىر جول» باستاماسىن ۇسىنعان بولاتىن. سودان بەرى وسى اۋقىمدى جوبانىڭ تيىمدىلىگىنە جانە قاجەتتىگىنە بۇكىل الەم كوز جەتكىزدى. بۇل مەگاجوبا ۇلى جىبەك جولىن جاڭعىرتۋ ىسىنە ىقپال ەتتى. سونداي- اق، كوپتەگەن ەلدە زاماناۋي كولىك ينفراقۇرىلىمىن سالۋ جۇمىسىن جانداندىردى. قازاقستان - قىتايدىڭ جاقىن كورشىسى ءارى سەنىمدى سەرىكتەسى. سوندىقتان، «ءبىر بەلدەۋ - ءبىر جول» جوباسىنا اتسالىسا بەرەدى. وسى ورايدا، قازاق- قىتاي شەكاراسىندا ءۇشىنشى تەمىر جول وتكەلىن اشۋ ماڭىزدى قادام بولماق»، - دەدى قاسىم- جومارت توقايەۆ.

پرەزيدەنت ونەركاسىپ سالاسىنداعى ىنتىماقتاستىقتى نىعايتۋدى ۇسىندى.

«بۇل سالا ورتالىق ازيانىڭ ەكونوميكالىق دامۋىنا بەرىك تۇعىر بولا الادى. ايماقتاعى ەلدەر بىرلەسىپ، سوڭعى جىلدارى ءبىرقاتار ءىرى جوبانى جۇزەگە اسىرىپ جاتىر. بۇل - قۋانىشتى جاعداي. وعان قىتايدىڭ اتسالىسۋى جوبالاردىڭ تابىستى بولۋىنا سەپتىگىن تيگىزەرى انىق. مەن ورتالىق ازيا مەن قىتايدىڭ ونەركاسىپ سالاسىنداعى ىنتىماقتاستىعىن دامىتۋ جوسپارىن ازىرلەۋدى ۇسىنامىن. بۇل جوسپاردى ايماقتاعى بارلىق ەلدىڭ ەرەكشەلىگى مەن سۇرانىسىن ەسكەرە وتىرىپ جاساعان ءجون»، دەپ اتاپ ءوتتى مەملەكەت باسشىسى.