قازاقستان قىتايدىڭ ءىرى ەلەكتروندى ساۋدا الاڭدارىن كەڭىنەن پايدالانۋدى ۇسىنادى - قاسىم- جومارت توقايەۆ

شيان. قازاقپارات - قازاقستان قىتايدىڭ ءىرى ەلەكتروندى ساۋدا الاڭدارىن كەڭىنەن پايدالانۋدى ۇسىنادى. بۇل قادام ونىمدەرىمىزدى نارىققا بىرلەسە شىعارۋ ءۇشىن اسا ماڭىزدى. وسىنداي پىكىردى ق ر پرەزيدەنتى قاسىم- جومارت توقايەۆ ءبىرىنشى «ورتالىق ازيا - قىتاي» سامميتىندە ءبىلدىردى، دەپ حابارلايدى قازاقپارات.

«ەلەكتروندى ساۋدا سالاسىندا ءوزارا الىس- بەرىستى ارتتىرۋ ءۇشىن قوسىمشا مۇمكىندىك بار. بۇل باعىتتا قىتايدىڭ كوش باستاپ تۇرعانى ءسوزسىز. ونلاين ساۋدانى دامىتۋ اسا ماڭىزدى. بۇعان جاپپاي شەكتەۋلەر كەزىندە كوزىمىز انىق جەتتى. قىتايدىڭ «Alibaba Group»، «JD COM» سياقتى ينتەرنەت الپاۋىتتارىنىڭ وسى سالاداعى تاجىريبەسى مەن الەۋەتى وراسان زور. ورتالىق ازيا ەلدەرىنىڭ نارىقتاعى باسەكەدە ءوز ارتىقشىلىقتارى بار. وسى ورايدا، قازاقستان قىتايدىڭ ءىرى ەلەكتروندى ساۋدا الاڭدارىن كەڭىنەن پايدالانۋدى ۇسىنادى. بۇل قادام ونىمدەرىمىزدى نارىققا بىرلەسە شىعارۋ ءۇشىن اسا ماڭىزدى. كەشە JD COM پلاتفورماسىندا قازاقستاننىڭ ۇلتتىق پاۆيلونى اشىلدى»، دەدى مەملەكەت باسشىسى.

قازاقستان مەن قىتايدىڭ تاريحى ۇلى جىبەك جولى ارقىلى تىعىز بايلانىسىپ جاتىر.

«بۇگىنگى سامميت كونە شيان قالاسىندا وتۋدە. مۇنىڭ زور سيمۆولدىق ءمانى بار. ويتكەنى، ۇلى جىبەك جولى وسى جەردەن باستاۋ العان. ءبىزدىڭ ەلدەرىمىزدىڭ وتكەن تاريحى، بۇگىنى جانە بولاشاعى وسى جول ارقىلى تىعىز بايلانىسىپ جاتىر.

شيان - قىتايدىڭ باي تاريحي- مادەني مۇراسىن، سونىمەن قاتار، كەمەلدەنگەن كۇش- قۋاتىن ايگىلەپ تۇرعان قالا. قىتاي - الەمدەگى اسا ءىرى ينۆەستور جانە جاھاندىق ەكونوميكانىڭ كوشىن باستاپ تۇرعان مەملەكەتتەردىڭ ءبىرى. سوندىقتان، قىتايمەن جان- جاقتى ىنتىماقتاستىقتى نىعايتۋ قازاقستاننىڭ ورنىقتى دامۋىنا مۇمكىندىك بەرەدى.

ورتالىق ازيا ەلدەرىنىڭ الەۋەتىن قىتايدىڭ وراسان زور ەكونوميكالىق قۋاتىمەن ۇشتاستىرۋ اسا ماڭىزدى. بۇل قادام كوپ قىرلى سەرىكتەستىگىمىزگە تىڭ سەرپىن بەرەرى ءسوزسىز. ءبىزدىڭ ەلىمىز وسى ماقساتقا جەتۋ ءۇشىن بار كۇش- جىگەرىن جۇمساۋعا دايىن»، - دەدى پرەزيدەنت.

ول ەكى ەلدىڭ ورتاق مۇددەسىنە ساي كەلەتىن ىنتىماقتاستىعىمىزدىڭ ماڭىزدى باعىتتارىنا توقتالدى.

«ءبىرىنشى، تاۋار اينالىمىن ارتتىرۋىمىز كەرەك. سوڭعى جىلدارى ورتالىق ازيا ەلدەرىنىڭ ەكونوميكالىق قارىم- قاتىناسى جاڭا دەڭگەيگە كوتەرىلدى. بىلتىر قازاقستاننىڭ وسى ايماقتاعى مەملەكەتتەرمەن الىس- بەرىسى 19 پايىزعا ءوستى. ياعني، 8 ميلليارد دوللار بولدى. الداعى ۋاقىتتا بۇل كورسەتكىشتى 15 ميللياردقا دەيىن جەتكىزۋدى كوزدەپ وتىرمىز»، - دەدى مەملەكەت باسشىسى.

قاسىم- جومارت توقايەۆ ايماقتىڭ قىتايمەن ساۋدا- ساتتىعى دا قارقىندى دامىپ كەلە جاتقانىن دا اتاپ ءوتتى. بىلتىر بۇل كورسەتكىش 70 ميلليارد دوللارعا جەتكەن. ونىڭ 45 پايىزى قازاقستانعا تيەسىلى.

«قىتاي مەن ورتالىق ازيا اراسىنداعى تاۋار اينالىمىن 2030 -جىلعا قاراي 100 ميلليارد دوللارعا جەتكىزۋگە بارلىق مۇمكىندىك بار»، - دەدى پرەزيدەنت.