تالدىقورعان تۇرعىنداردىڭ شاعىمىنان كەيىن اكىمدىكتىڭ زاڭسىز جەر بەرگەنىن انىقتادى

تالدىقورعان. قازاقپارات - تالدىقورعان تۇرعىندارىنىڭ شاعىمىنان كەيىن پروكۋراتۋرا تەكسەرىس جۇرگىزىپ، اكىمدىكتىڭ جەر تەلىمىن زاڭسىز بەرگەنىن انىقتادى، دەپ حابارلايدى قازاقپارات ءتىلشىسى.

تالدىقورعاننىڭ كيۆەليەۆا كوشەسىندەگى كوپقاباتتى ءۇي تۇرعىندارى اۋلاسىنا ويىن، فۋتبول الاڭدارى سالىنادى دەپ كۇتكەن. سوزدەرىنشە، اكىمدىك سولاي ۋادە بەرگەن. ءبىراق جەر تەلىمى كاسىپكەرگە كوپسالالى كەشەن سالۋعا بەرىلگەن. بۇل جايت تۇرعىنداردىڭ نارازىلىعىن تۋعىزىپ، پروكۋراتۋرا ءمان- جايدى انىقتاۋعا كىرىسكەن.

«اۋدانى 0,15 گەكتار جەر ۋچاسكەسىنىڭ جەكە تۇلعاعا كونكۋرستان تىس بەرىلۋى جەر كودەكسىنىڭ 48-بابىنىڭ بۇزىلۋىنا اكەپ سوققان جانە تالدىقورعان قالاسىن دامىتۋدىڭ باس جوسپارىنا قايشى ەكەندىگىن انىقتادى. وسىعان وراي، 16-مامىردا تالدىقورعان قالاسىنىڭ پروكۋراتۋراسى جەرگىلىكتى اتقارۋشى ورگاننىڭ اتىنا زاڭسىز شىعارىلعان قاۋلىنىڭ كۇشىن جويۋ ماسەلەسىن قويىپ، پروكۋرورلىق قاداعالاۋ اكتىسىن ەنگىزدى. قاداعالاۋ اكتىسىنىڭ ورىندالۋى پروكۋراتۋرانىڭ باقىلاۋىندا»، - دەلىنگەن جەتىسۋ وبلىسى پروكۋراتۋراسى باسپا ءسوز قىزمەتىنىڭ حابارلاماسىندا.