ينۆەستيسيالىق جيىن، لوگيستيكا ورتالىعى، قازاقستاننىڭ ۇلتتىق پاۆيلونى - پرەزيدەنت ساپارىنىڭ ەكىنشى كۇنى قالاي ءوتتى
ساپار اياسىندا پرەزيدەنت شيان قالاسىندا وتكەن قازاق-قىتاي ينۆەستيتسيالىق جيىنىنا قاتىسىپ، ءبىرقاتار كومپانيا باسشىلارىمەن كەزدەستى. دوڭگەلەك ۇستەل قورىتىندىسى بويىنشا 7 قۇجاتقا قول قويىلدى. تولىعىراق قازاقپاراتتىڭ شولۋ ماتەريالىندا بەرىلدى.
قازاقستان مەن قىتايدىڭ ساۋدا-ەكونوميكالىق قاتىناسى
مەملەكەت باسشىسى قازاق- قىتاي ينۆەستيتسيالىق دوڭگەلەك ۇستەلىنە قازاقستان مەن قىتايدىڭ ساۋدا- ەكونوميكالىق قاتىناسى قارقىندى دامىپ كەلە جاتقانىن اتاپ ءوتتى. ونىڭ دەرەگىنشە، بىلتىر ەكىجاقتى ساۋدا- ساتتىق كولەمى رەكوردتىق كورسەتكىشكە، ياعني 31 ميلليارد دوللارعا جەتكەن. پرەزيدەنت قىتاي قازاقستان ەكونوميكاسىنا قارجى قۇيعان بەس ءىرى ينۆەستوردىڭ قاتارىنا كىرەتىنىن جەتكىزدى. قۇيىلعان ينۆەستيتشيانىڭ جالپى كولەمى 23 ميلليارد دوللاردان اسقان. ول جيىندا ەكونوميكالىق ىقپالداستىقتى تەرەڭدەتۋگە مۇمكىندىك بەرەتىن نەگىزگى 7 باعىتتى اتاپ ءوتتى.
پرەزيدەنت ءوز سوزىندە ەكى ەل اراسىندا مۇناي-گاز سالاسى تالاي جىلدان بەرى تابىستى ارىپتەستىكتىڭ نەگىزى ەكەندىگىن اتاپ ءوتتى. ول سونداي-اق مۇناي ەكسپورتىن كوبەيتۋ ءۇشىن «قازاقستان - قىتاي» مۇناي قۇبىرىن كەڭەيتۋ جوسپارلانىپ وتىرعانىن جەتكىزدى.
«قولدانىستاعى قۇبىرلاردىڭ (ياعني، «اتىراۋ- كەڭقياق» جانە «كەڭقياق- قۇمكول») مۇناي تاسىمالداۋ مۇمكىندىگىن ارتتىرۋ دا وزەكتى ماسەلە. قازىر مۇناي ونىمدەرىن تۇتىنۋ كولەمى ارتىپ كەلەدى. سوندىقتان شىمكەنت مۇناي وڭدەۋ زاۋىتىنىڭ وندىرىستىك الەۋەتىن جىلىنا 6 دان 12 ميلليون تونناعا جەتكىزۋ كوزدەلگەن. قازاقستان ءۇشىن گاز وڭدەۋ قۋاتىن ارتتىرۋ جانە گاز تاسىمالداۋ جۇيەسىن كەڭەيتۋ باسىم باعىتتىڭ ءبىرى سانالادى»، - دەدى مەملەكەت باسشىسى.
مەملەكەت باسشىسى ەلىمىزدىڭ 2060 -جىلعا قاراي كومىرتەگى بەيتاراپتىعىنا قول جەتكىزۋدى ماقسات ەتىپ وتىرعانىن تىلگە تيەك ەتىپ، جاڭارتىلاتىن ەنەرگيا كوزدەرىنىڭ ۇلەسىن 2030 -جىلعا دەيىن %15 عا جەتكىزۋ مىندەتى تۇرعانىن مالىمدەدى. سونداي-اق ول مەملەكەت بۇل سالاعا ينۆەستيتسيا سالۋعا جان-جاقتى قولداۋ كورسەتەتىنىن ايتتى.
«مىسالى، ءبىز ەلەكتر قۋاتىن 20 جىلعا دەيىن اۋكسيوندىق تاريفپەن ساتىپ الۋعا كەپىلدىك بەرەمىز. بۇل تاريف جىل سايىن ينفلياتشيانى جانە ۆاليۋتا باعامىنىڭ وزگەرىسىن ەسكەرە وتىرىپ بەلگىلەنەدى. قىتايلىق ارىپتەستەرىمىزدى وسى سالانىڭ ينۆەستيتسيالىق مۇمكىندىگىن قاراپ كورۋگە شاقىرامىز، - دەدى قاسىم-جومارت توقايەۆ.
پرەزيدەنت جيىندا قۇرلىقتاعى كولىك دالىزدەرىن دامىتۋ ماسەلەسىن دە قوزعادى. قىتاي باتىس ەۋرازيانىڭ اۋقىمدى نارىقتارىنا قازاقستان اۋماعى ارقىلى شىعا الاتىنىنا ينۆەستورلاردىڭ نازارىن اۋداردى.
«ءبىز شيان قالاسىنداعى قۇرعاق پورتتا قازاقستاننىڭ لوگيستيكا ورتالىعىن سالۋعا باسا ءمان بەرىپ وتىرمىز. ورتالىق ازياعا، ەۋروپاعا، تۇركيا مەن يرانعا كونتەينەر پويىزدارىن تىكەلەي جونەلتۋ ىسىندە وسى ورتالىق نەگىزگى حاب بولادى. ءبىز قىتايعا قاراي «اياگوز - باقتى» تەمىر جولىن ىسكە قوسۋدى جوسپارلاپ وتىرمىز. «دوستىق - مويىنتى» اراسىنداعى تەمىر جولعا كۇردەلى جوندەۋ جۇرگىزىلەدى. سوندا تەمىر جول ارقىلى جىل سايىن 20 ميلليون تونناعا دەيىن جۇك تاسىمالداۋعا مۇمكىندىك تۋادى. ەۋروپا مەن ازيا اراسىنداعى ءترانزيتتى جانداندىرۋ ءۇشىن ترانسكاسپيي باعدارىن دامىتۋ ماڭىزدى دەپ سانايمىن»، - دەدى مەملەكەت باسشىسى.
قاسىم-جومارت توقايەۆ ەلەكتروندى ساۋدا سالاسىندا ءوزارا الىس-بەرىستى ارتتىرۋ ءۇشىن قوسىمشا مۇمكىندىكتەر بار ەكەنىنە نازار اۋدارىپ، ونلاين ساۋدانى دامىتۋ اسا ماڭىزدى ەكەنىن اتاپ ءوتتى.
«قىتايدىڭ «Alibaba Group» ،«JD. COM» سياقتى ينتەرنەت الپاۋىتتارىنىڭ وسى سالاداعى تاجىريبەسى مەن الەۋەتى وراسان زور. ورتالىق ازيا ەلدەرىنىڭ نارىقتاعى باسەكەدە ءوز ارتىقشىلىقتارى بار. وسى ورايدا، قازاقستان قىتايدىڭ ءىرى ەلەكتروندى ساۋدا الاڭدارىن كەڭىنەن پايدالانۋدى ۇسىنادى. بۇل قادام ونىمدەرىمىزدى نارىققا بىرلەسە شىعارۋ ءۇشىن اسا ماڭىزدى.»، - دەدى پرەزيدەنت.
مەملەكەت باسشىسىنىڭ ايتۋىنشا، قازاقستاندا وڭدەۋ ونەركاسىبىن دامىتۋ ءۇشىن قولايلى جاعداي جاسالىپ جاتىر. اتاپ ايتقاندا، ول «ونەركاسىپتىك ساياسات تۋرالى» زاڭ قابىلدانعانىن اتاپ ءوتتى.
«وتاندىق كاسىپورىندار اليۋميني، مىس پەن مىرىشتى ارزان باعامەن ساتىپ الادى (لوندون مەتالل بيرجاسىنداعى باعالاردان 5 پايىزعا ارزان). بۇدان بولەك، ىشكى نارىقتىڭ سۇرانىسىن تولىق وتەۋ ءۇشىن وسى مەتالداردىڭ ەكسپورتىن رەتكە كەلتىرۋ جوسپاردا بار»، - دەدى مەملەكەت باسشىسى.
پرەزيدەنت ەلىمىز سيرەك كەزدەسەتىن مەتالداردىڭ مول قورىنا يە ەكەنىن ايتىپ، وسىنداي كەندى ءوندىرۋدىڭ جانە وڭدەۋدىڭ وزىق تەحنولوگياسىن ەنگىزۋگە مۇددەلى ەكەنىمىزدى جەتكىزدى. مەملەكەت باسشىسىنىڭ پىكىرىنشە، ىنتىماقتاستىقتى نىعايتۋعا مۇمكىندىك بەرەتىن مول سالانىڭ ءبىرى - اگروونەركاسىپ. جۋىردا قىتايعا ءبىر ميلليون توننا بيداي جەتكىزۋ جونىندە كەلىسىم جاسالدى. ونىڭ كولەمىن بىرنەشە ەسە ارتتىرۋعا بولادى. سونداي-اق سوڭعى بەس جىلدا قازاقستاننان قىتايعا ەكسپورتتالعان مايلى داقىلداردىڭ كولەمى 3,5 ەسە، وسىمدىك مايى 2 ەسە ارتتى. سونىمەن قاتار پرەزيدەنت ەلىمىزدى قانت ونىمىمەن تولىق قامتاماسىز ەتۋ كوزدەلىپ وتىرعانىن جەتكىزىپ، قىتاي كومپانيالارىن قانت ءوندىرىسىن دامىتۋعا بەلسەنە اتسالىسۋعا شاقىردى.
مەملەكەت باسشىسى ءسوز سوڭىندا ەلىمىزدە ينۆەستورلارعا بارىنشا قولايلى جاعداي جاسالعانىن اتاپ ءوتىپ، بۇگىنگى كەزدەسۋ ەكى ەلدىڭ ساۋدا- ەكونوميكالىق سەرىكتەستىگىن نىعايتا تۇسەتىنىنە سەنىم ءبىلدىردى.
جالپى، پرەزيدەنت قاسىم-جومارت توقايەۆتىڭ ق ح ر-عا مەملەكەتتىك ساپارى اياسىندا قۇنى 22 ميلليارد دوللار بولاتىن 47 قۇجاتقا قول قويىلدى.
شيان قالاسىندا قازاقستاننىڭ لوگيستيكا ورتالىعىنىڭ ىرگەتاسى قالاندى
جيىننان كەيىن مەملەكەت باسشىسى شيان قالاسىنداعى قۇرعاق پورتتا قازاقستاننىڭ لوگيستيكا ورتالىعىنىڭ ىرگەتاسىن قالاۋ راسىمىنە قاتىستى. پرەزيدەنت سالتاناتتى راسىمگە قاتىسۋشىلاردى قۇرىلىستىڭ باستالۋىمەن قۇتتىقتاپ، اتالعان جوبانىڭ ماڭىزدىلىعىن اتاپ ءوتتى. ونىڭ ايتۋىنشا، وسىدان 10 جىل بۇرىن استانادا شي جينپيڭ مىرزا ۇلى جىبەك جولىنىڭ ەكونوميكالىق بەلدەۋىن قۇرۋدى ۇسىنعان. بۇگىنگى ءىس-شارا قىتاي ءتوراعاسىنىڭ سول باستاماسىمەن تولىق ۇندەسەدى. قازاقستان كولىك- لوگيستيكا ينفراقۇرىلىمىن دامىتۋعا باسا ءمان بەرەدى. سول سەبەپتى قازاقستان جاھاندىق جوباعا بارىنشا قولداۋ كورسەتتى.
«ەلىمىز سوڭعى 15 جىلدا بۇل سالاعا 35 ميلليارد دوللار ينۆەستيتسيا سالدى. ليانيۋنگان پورتىندا قازاق- قىتاي لوگيستيكا ورتالىعىن قۇردىق. جاڭا تەمىرجول باعىتتارىن اشتىق.
«قورعاس - شىعىس قاقپاسى» قۇرعاق پورتى جۇمىس ىستەي باستادى. كاسپي تەڭىزىندە زامان تالابىنا ساي ينفراقۇرىلىم جاسالدى. وسى شارالاردى جۇزەگە اسىرىلىپ جاتقان جۇمىستىڭ ءبىر بولىگى دەۋگە بولادى. بىلتىر ەكى ەل اراسىندا تەمىرجول ارقىلى 23 ميلليون توننا جۇك تاسىمالداندى. بۇل - بۇرىن-سوڭدى بولماعان كورسەتكىش. بيىل ءبىرىنشى توقساندا جۇك ترانزيتى 35 پايىزعا ارتىپ، 7 ميلليون توننادان استى»، - دەدى ول.
مەملەكەت باسشىسى ءوز سوزىندە الىس-بەرىستى ودان ءارى دامىتۋ ءۇشىن قوسىمشا ينفراقۇرىلىم قاجەت ەكەنىن اتاپ ءوتتى. سوندىقتان قىتايلىق ارىپتەستەرمەن بىرگە شيان قالاسىنداعى قۇرعاق پورتتا لوگيستيكا ورتالىعىن سالۋ كەرەك دەگەن شەشىم قابىلدانعانىن مالىمدەدى.
«بۇل حاب شانشي ايماعىن قازاقستانمەن، ورتالىق ازيامەن بايلانىستىرادى. ءارى قاراي ەۋروپاعا، تۇركياعا جانە يرانعا جول اشادى. جوبانىڭ تولىق ىسكە قوسىلۋى ەكى ەلدىڭ ىنتىماقتاستىعىنا تىڭ سەرپىن بەرەدى دەپ سەنەمىن»، - دەدى قاسىم-جومارت توقايەۆ.
ايتا كەتەيىك، كەلەسى جىلدان باستاپ قۇرعاق پورت ارقىلى ەلەكترونيكالاردى، كومپيۋتەر بولشەكتەرىن، اۆتوموبيلدەر مەن اۆتوبولشەكتەردى، توقىما بۇيىمدارىن، كيىم- كەشەك، اياق كيىم مەن اكسەسسۋارلاردى، ازىق- تۇلىك جانە اۋىل شارۋاشىلىعى ونىمدەرىن، قۇرىلىس ونىمدەرى مەن قۇرىلىس ماتەريالدارىن، سونداي-اق رۋدالاردى، مەتالداردى جانە حيميالىق ونىمدەردى تاسىمالداۋ جوسپارلانىپ وتىر.
پرەزيدەنت JD.com الاڭىندا قازاقستاننىڭ ۇلتتىق پاۆيلونىن اشتى
مەملەكەت باسشىسى قاسىم-جومارت توقايەۆ JD.com ەلەكتروندى كوممەرتسيا الاڭىندا قازاقستاننىڭ ۇلتتىق پاۆيلونىن سالتاناتتى تۇردە اشتى. ول ءوز سوزىندە بيزنەستى ونلاين- كەڭىستىك ارقىلى جۇرگىزۋ الەم ەكونوميكاسىنىڭ ماڭىزدى باعىتىنا اينالعانىن اتاپ ءوتتى.
«قازىر ەلەكتروندى ساۋدا نارىعىنىڭ كولەمى 3,5 تريلليون دوللارعا جەتتى. بۇل ۇدەرىس جىل سايىن ارتىپ كەلەدى. حالىقارالىق ونلاين ساۋدا- ساتتىقتى دامىتۋ ىسىندە قىتاي وتە ماڭىزدى ءرول اتقارادى. بۇگىن الەمدەگى اسا ءىرى ەلەكتروندى ساۋدا الاڭىندا قازاقستاننىڭ ۇلتتىق پاۆيلونى اشىلادى. بىلتىر قازاقستان مەن قىتاي اراسىنداعى تاۋار اينالىمى 31 ميلليارد دوللارعا جەتتى. ءبىز مۇنىمەن شەكتەلىپ قالمايمىز»، - دەدى پرەزيدەنت.
JD.com (Jingdong Mall) - قىتايداعى تاۋارلار مەن قىزمەتتەر ساتۋعا ارنالعان ەڭ ءىرى ونلاين پلاتفورما. 1998 -جىلى نەگىزى قالانعان ونلاين ريتەيل الاڭىنىڭ 400 ميلليوننان استام پايدالانۋشىسى بار. 2022 -جىلى JD.com-دە 1 تريلليون يۋان تازا پايدا تاۋىپ، قىتايداعى ەلەكتروندى ساۋدا الاڭدارىنىڭ اراسىندا ءبىرىنشى ورىنعا شىققان. قازىرگى كەزدە پلاتفورمادا 40-تان اسا ەلدىڭ ۇلتتىق پاۆيلوندارى جۇمىس ىستەيدى. قازاقستاننىڭ ۇلتتىق پاۆيلونىن اشۋ جونىندە كەلىسىمگە بيىل ناۋرىز ايىندا قول قويىلدى. بۇگىندە ۇلتتىق پاۆيلونىمىزدا ەلىمىزدىڭ بىرنەشە ءونىم ءتۇرى ساتىلىمعا قويىلعان. بۇعان قوسا الداعى ۋاقىتتا ەكسپورتتىق الەۋەتى جوعارى 15 وتاندىق ازىق- تۇلىك ءوندىرۋشىسىنىڭ ونىمدەرىن (كۇنباعىس مايى، كونديتەر ونىمدەرى، سۋسىندار) قىتاي نارىعىنا شىعارۋ جوسپارلانىپ وتىر.
مەملەكەت باسشىسى ءبىرقاتار كومپانيا باسشىلارىمەن كەزدەستى
مەملەكەت باسشىسى China Nonferrous Metal Mining (CNPC) كومپانياسىنىڭ ءتوراعاسى جان جينجيۋندى قابىلدادى. كەزدەسۋ بارىسىندا تاۋ-كەن مەتاللۋرگياسى جانە شيكىزاتتى تەرەڭ وڭدەۋ سالالارىنداعى جوبالاردى جۇزەگە اسىرۋ ماسەلەلەرى تالقىلاندى.
پرەزيدەنتكە CNPC كومپانياسىنىڭ قازاقستان تاراپىمەن ءوزارا ءىس-ارەكەتتەردى نىعايتۋ جونىندەگى جوسپارى تۋرالى مالىمەت بەرىلدى. اتاپ ايتقاندا، شىمكەنت مۇناي وڭدەۋ زاۋىتىنىڭ وندىرىستىك قۋاتىن ارتتىرۋ، قازاقستان- قىتاي مۇناي قۇبىرىنىڭ وتكىزۋ مۇمكىندىكتەرىن كۇشەيتۋ جانە باسقا دا ماسەلەلەر قاراستىرىلىپ جاتىر.
سونىمەن قاتار قاسىم-جومارت توقايەۆ ازيا ينفراقۇرىلىمدىق ينۆەستيتسيالار بانكىنىڭ پرەزيدەنتى جين ليسيۋنمەن كەزدەستى. اڭگىمەلەسۋ بارىسىندا ازيا ينفرراقۇرىلىمدىق ينۆەستيتسيالار بانكىنىڭ قازاقستانداعى قىزمەتىن دامىتۋعا قاتىستى الداعى جوسپارى تالقىلاندى.
قاسىم-جومارت توقايەۆ بانكپەن اراداعى ىنتىماقتاستىققا جوعارى باعا بەرىپ، 2015 -جىلى ەلىمىز قىتايدىڭ وسى بانكتى قۇرۋ جونىندەگى باستاماسىن العاشقىلاردىڭ ءبىرى بولىپ قولداعانىن ايتتى. وسى ۋاقىت ارالىعىندا اييب قازاقستاندا جاسىل ەنەرگەتيكا سالاسى مەن پاندەميا سالدارىمەن كۇرەسكە قاتىستى جوبالاردى جۇزەگە اسىرۋعا اتسالىستى.
مەملەكەت باسشىسى State Power Investment Corporation كومپانياسىنىڭ باسقارما ءتوراعاسى شيان جيميندى دە قابىلدادى. كەزدەسۋ بارىسىندا جاڭارتىلاتىن ەنەرگيا كوزدەرى سالاسىنداعى جوبالاردى ىسكە اسىرۋ ماسەلەلەرى تالقىلاندى. قىتايدىڭ ءىرى ەنەرگەتيكالىق كومپانيالارىنىڭ قاتارىنا كىرەتىن State Power Investment Corporation قازاقستاننىڭ جاسىل ەنەرگەتيكا سالاسىنداعى جوبالارىنا بەلسەندى تۇردە ينۆەستيتسيا قۇيادى.
قاسىم-جومارت توقايەۆ كومپانيانىڭ جامبىل وبلىسىندا قۋاتى 1 گ ۆت بولاتىن اۋقىمدى جەل ەلەكتر ستانتسياسىن سالۋ جونىندەگى باستاماسىن قولدادى. پرەزيدەنتكە State Power Investment Corporation كومپانياسىنىڭ قازاقستاندا جەل ەلەكتر ستانتسيالارىنا ارنالعان قۇرال-جابدىق ءوندىرىسىن ىسكە قوسۋ نيەتى تۋرالى مالىمەت بەرىلدى. ءوز كەزەگىندە شيان جيمين الەۋمەتتىك جاۋاپكەرشىلىك اياسىندا ونىڭ كومپانياسى قازاقستاننىڭ وڭتۇستىگىندە قۋاتى 200 گكاللعا دەيىن جەتەتىن جىلۋ ستانتسياسىن سالۋدى جوسپارلاپ وتىرعانىن جەتكىزدى. سونىمەن قاتار، كەزدەسۋدە State Power Investment Corporation كومپانياسىنىڭ تەحنولوگيالىق جانە عىلىمي- زەرتتەۋ تاجىريبەسى مول ەكەنى ەسكەرىلىپ، «جاسىل» سۋتەگى ءوندىرىسى سالاسىنداعى ىنتىماقتاستىق پەرسپەكتيۆالارى قاراستىرىلدى.
قاسىم-جومارت توقايەۆقا CITIC Group كومپانياسىنىڭ باسقارما ءتوراعاسى جۋ حەسينمەن كەزدەسۋىندە كومپانيا ەنەرگەتيكا جانە مۇناي حيمياسى ونەركاسىبى سالالارىنداعى جوبالاردى بىرلەسىپ ىسكە اسىرۋ ءۇشىن قازاقستاندىق ارىپتەستەرىمەن بەس كوممەرتسيالىق قۇجاتقا قول قويعانى تۋرالى مالىمەت بەرىلدى. كەلىسىمدەردىڭ جالپى كولەمى 1,6 ميلليارد دوللاردان اسادى.
مەملەكەت باسشىسى Huawei Technologies كومپانياسىنىڭ باسقارما ءتوراعاسى ليان حۋانمەن جولىقتى. كەزدەسۋ بارىسىندا پرەزيدەنتكە تەلەكوممۋنيكاتسيا سالاسىنداعى الەمدىك كوشباسشىلاردىڭ ءبىرىنىڭ قازاقستانمەن ىنتىماقتاستىقتى دامىتۋعا قاتىستى الداعى جوسپارى تانىستىرىلدى.
سونداي-اق قاسىم-جومارت توقايەۆقا «Huawei» مەن «قازاقستان تەمىر جولى» ۇلتتىق كومپانياسىنىڭ تەمىرجول جەلىسىن سيفرلاندىرۋ جانە جاڭا تەحنولوگيالاردى پايدالانۋ جونىندەگى بىرلەسكەن جوبانى ىسكە اسىرۋ جوسپارى تۋرالى مالىمەت بەرىلدى. ليان حۋا «Huawei» كومپانياسى كەڭ جولاقتى قولجەتىمدى ينتەرنەتتى دامىتۋعا جانە قازاقستاننىڭ وڭىرلىك تسيفرلىق حاب رەتىندە قالىپتاسۋىنا قاتىستى زەرتتەۋلەردى قارجىلاندىرعانىن ايتتى.
مەملەكەت باسشىسى «Huawei» اقپاراتتىق- كوممۋنيكاتسيالىق تەحنولوگيالار اكادەمياسىنىڭ بازاسىندا IT تەحنولوگيا سالاسى بويىنشا بىلىكتى قازاقستاندىق مامانداردى دايارلاۋ جونىندەگى جوبانى جۇزەگە اسىرۋدى قۇپتادى.
China Nonferrous Metal Mining كومپانياسىنىڭ باس ديرەكتورى جان جينجيۋنمەن كەزدەسۋ بارىسىندا قاسىم-جومارت توقايەۆقا قىتايلىق كومپانيانىڭ KAZ Minerals كاسىپورنىمەن بىرلەسىپ، قازاقستاندا مىس بالقىتۋ زاۋىتىن سالۋ جونىندەگى جوبانى جۇزەگە اسىرۋ جوسپارى تۋرالى مالىمەت بەرىلدى.
ال قىتايداعى ەڭ ءىرى جەكە مەديا جانە ينۆەستيتسيالىق كونگلومەراتتاردىڭ ءبىرى Sun Seven Stars Investment Group كومپانياسىنىڭ باسقارما ءتوراعاسى ۋ جەنمەن كەزدەسۋ بارىسىندا قارجى، سيفرلاندىرۋ جانە ونلاين-ساۋدا سالالارىنداعى ينۆەستيتسيالىق ىنتىماقتاستىق، سونداي-اق «استانا» حالىقارالىق قارجى ورتالىعىمەن ءوزارا ءىس-ارەكەت ماسەلەلەرى تالقىلاندى.
بۇگىن «ورتالىق ازيا - قىتاي» سامميتى
شيان قالاسىنداعى تاڭ ديناستياسىنىڭ لوتوس ساياباعىندا «ورتالىق ازيا - قىتاي» سامميتىنە قاتىسۋشى مەملەكەتتەر باسشىلارىن رەسمي قارسى الۋ ءراسىمى ءوتتى.
ال «ورتالىق ازيا - قىتاي» سامميتىنىڭ نەگىزگى ءىس-شارالارى ەرتەڭگە جوسپارلانعان. بۇل ءىس- شاراعا قىتاي، قازاقستان، قىرعىزستان، وزبەكستان، تاجىكستان جانە تۇرىكمەنستان باسشىلارى قاتىسادى. سامميتكە قاتىسۋشىلاردىڭ قۇرمەتىنە لوتوس ساياباعىندا تەاترلاندىرىلعان قويىلىم كورسەتىلدى.
اۆتور:
نازەركە سۇيىندىك
