اتىراۋلىق ەرلى-زايىپتى اۋلاداعى باقشاسىنان كۇلگىن ءتۇستى كىرپى تاۋىپ الدى

اتىراۋ. قازاقپارات - اتىراۋلىق ەرلى-زايىپتى اۋلاداعى باقشاسىنان كۇلگىن ءتۇستى كىرپى تاۋىپ الدى، دەپ حابارلايدى قازاقپارات.

اتىراۋ قالاسىنىڭ تۇرعىندارى ەرلى-زايىپتى سلادكوۆتار اۋلاداعى باقشاسىنان تاۋىپ العان كىرپىنىڭ فوتوسىن WhatsApp مەسسەندجەرى مەن الەۋمەتتىك جەلىگە جۇكتەدى.

فوتوداعى كىرپىنىڭ ءتۇسى ادەتتەگىدەي ەمەس.

شاھار تۇرعىندارىن كىرپىنىڭ كۇلگىن ءتۇسى قىزىقتىردى.

اتىراۋ قالاسى وباعا قارسى ستانتسياسىنىڭ ەپيزووتولوگيا جانە اسا قاۋىپتى ينفەكسيالاردىڭ الدىن الۋ زەرتحاناسىنىڭ بۇرىنعى مەڭگەرۋشىسى فەدور سارايەۆتىڭ ايتۋىنشا، وڭىردە بۇرىن كىرپىنىڭ مۇنداي ءتۇسى كەزدەسپەگەن.

«جاڭا تۋعان كىرپىنىڭ باسىنداعى تىكەنى عانا اقشىل ءتۇستى بولادى. باستاپقىدا كىرپىنىڭ تىكەندەرى وتە جۇمساق، ءجۇن ءتارىزدى بولاتىنىن بايقاپ ءجۇرمىز. ويتكەنى، بۇل - تابيعاتتىڭ اناسىنا زيان كەلتىرمەۋ ماقساتىنداعى قۇبىلىسى. كىرپىنىڭ تىكەنەگى وسە كەلە سۇر تۇسكە اينالادى. ءبىراق، مەنىڭ جۇمىس تاجىريبەمدە كۇلگىن ءتۇستى كىرپى كەزدەسكەن جوق ەدى»، - دەيدى فەدور سارايەۆ.

ەرلى-زايىپتىلار بەرگەن سۋدى كىشكەنتاي كىرپى ءىشىپ العان. كەيىن ءوز جونىمەن كەتىپ قالعان.

ەسكە سالا كەتەلىك، بۇعان دەيىن اتىراۋدىڭ ىرگەسىندەگى ەلدى مەكەندە جابايى قاباندار جۇرگەنىن جازعان ەدىك.

جابايى قاباندار اتىراۋ قالاسىنا تاياۋ ورنالاسقان ەركىنقالا-2 ەلدى مەكەنىنە كىرىپ كەتكەن.

اۋىلدىڭ تۇرعىندارى WhatsApp مەسسەندجەرىندە كوشەدە جۇرگەن ءۇش قاباندى ۆيدەوعا تۇسىرگەن.

اتىراۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باس مامانى نۇرلان يمانعالييەۆتىڭ ايتۋىنشا، جابايى قاباندار «اقجايىق» مەملەكەتتىك تابيعي رەزەرۆاتىنان كەلۋى مۇمكىن.

ونىڭ ايتۋىنا قاراعاندا، بۇل اۋىلدا 1980 -جىلدارى جابايى قاباننىڭ، وزگە دە اڭداردىڭ كىرگەنى ءجيى بايقالعان.

الايدا، ودان كەيىن مۇنداي وقيعا تىركەلمەگەن.