قىتايدىڭ ينتەرنەت- سەگمەنتىندە پرەزيدەنتىمىزدىڭ سوزدەرى ءجيى تانىمال بولىپ جاتادى - زارەما شاۋكەنوۆا

استانا. قازاقپارات – ق ر ۇلتتىق عىلىم اكادەمياسىنىڭ اكادەميگى، الەۋمەتتانۋ عىلىمدارىنىڭ دوكتورى، پروفەسسور زارەما شاۋكەنوۆا مەملەكەت باسشىسى قاسىم- جومارت توقايەۆتىڭ قىتايعا مەملەكەتتىك ساپارىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

ق ر پرەزيدەنتىنىڭ قىتايعا مەملەكەتتىك ساپارى اياسىندا 19-مامىردا مەملەكەت باسشىسى «ورتالىق ازيا - قىتاي» سامميتىنە قاتىسادى. ساپارى اياسىندا قاسىم- جومارت توقايەۆ ق ح ر ءتوراعاسى شي جينپينمەن كەلىسسوز جۇرگىزدى. ونىڭ بارىسىندا ەلدەرىمىز اراسىندا ستراتەگيالىق ارىپتەستىكتى ودان ءارى نىعايتۋ، ساۋدا- ەكونوميكا، ينۆەستيتسيا، كولىك- لوگيستيكا جانە ەنەرگەتيكا سالالارىندا ىنتىماقتاستىقتى كەڭەيتۋ ماسەلەلەرى قارالاتىن بولادى. سونداي- اق مادەني- گۋمانيتارلىق جانە عىلىمي بايلانىستاردى تەرەڭدەتە ءتۇسۋ اسا ماڭىزدى، - دەدى زارەما شاۋكەنوۆا قازاقپارات ءتىلشىسىنىڭ ساۋالىنا جاۋاپ بەرە وتىرىپ.

ساراپشى 2019 -جىلى وتكەن پرەزيدەنت سايلاۋىندا جەڭىسكە جەتكەننەن كەيىن قاسىم- جومارت توقايەۆ ءوزىنىڭ العاشقى رەسمي ساپارىن قىتاي حالىق رەسپۋبليكاسىنا جاساعانىن ەسكە سالدى. وسى ساپار اياسىندا مەملەكەت باسشىسى قىتاي قوعامدىق عىلىمدار اكادەمياسىندا ءدارىس وقىدى. پرەزيدەنت اكادەميا پروفەسسورلارى مەن ساراپشىلارىنىڭ، قازاقستاندىق ستۋدەنتتەردىڭ الدىندا سويلەگەن سوزىندە قوعامدىق عىلىمدار كەز كەلگەن مەملەكەتتىڭ دامۋىن ايقىندايتىنىن اتاپ ءوتتى. قىتاي قوعامدىق عىلىمدار اكادەمياسى ق ح ر ءۇشىن مەملەكەتتىك ماڭىزدى قۇرىلىم سانالادى. اكادەميانىڭ ورتالىقتارى مەن ينستيتۋتتارى الەمدىك عىلىمي زەرتتەۋلەرگە ەلەۋلى ۇلەس قوسىپ كەلەدى. پرەزيدەنت قاسىم- جومارت توقايەۆ قازاقستان دوستىق قارىم- قاتىناستاردى نىعايتۋدى، كورشىلەرىمەن جانە باسقا سەرىكتەستەرمەن دە ءوزارا ءتيىمدى ىنتىماقتاستىقتى دامىتۋدى جالعاستىراتىنىن ءمالىم ەتتى.

ەڭ بىرىنشىدەن، بۇل دوستارىمىزعا قاتىستى، قىتاي - قازاقستان ەگەمەندىگىن، تاۋەلسىزدىگى مەن اۋماقتىق تۇتاستىعىن العاشقىلاردىڭ ءبىرى بولىپ مويىنداعان بىزگە ەڭ جاقىن مەملەكەتتەردىڭ ءبىرى. سونداي- اق ق ح ر يادرولىق دەرجاۆالار اراسىندا العاشقىلاردىڭ قاتارىندا قازاقستانعا قانداي دا ءبىر الدىن الا شارتسىز ءتيىستى كەپىلدىكتەر بەردى. قازاقستان - قىتاي قارىم- قاتىناسىنىڭ دامۋىنا «ءۇش زۇلىمدىق كۇشى» - ءدىني ەكسترەميزم، سەپاراتيزم جانە تەرروريزممەن كۇرەس ماسەلەسىندەگى ءبىزدىڭ ورتاق ۇستانىمىمىز دا ىقپال ەتتى. ءبىزدىڭ پرەزيدەنت قىتاي قوعامدىق عىلىمدار اكادەمياسىندا قازاقستانعا قاتىستى زەرتتەۋلەر جۇرگىزەتىن جانە قازاق ءتىلىن جاقسى بىلەتىن ساراپشىلار بار ەكەنىنە ەرەكشە نازار اۋداردى. حالىق تىلىنە قۇرمەتپەن قاراۋ - قارىم- قاتىناستىڭ نەگىزگى كىلتى ەكەنى ءسوزسىز. ءبىز ينتەرنەت جەلىلەرىنىڭ قىتايلىق سەگمەنتىندە پرەزيدەنتىمىزدىڭ قىتاي تىلىندە سويلەگەن سوزدەرى قىسقا روليكتەر، ۇزىندىلەر رەتىندە جىلدام جانە كەڭىنەن تاراپ كەتەتىنىن ءجيى بايقايمىز. قىتايدىڭ كوپتەگەن ينتەرنەت- قولدانۋشىلارى قاسىم- جومارت توقايەۆتىڭ قىتاي ءتىلىن جاقسى مەڭگەرگەنىن ايتىپ جاتادى. بالكىم، الەم كوشباسشىلارىنىڭ اراسىندا قىتاي ءتىلىن جەتىك بىلەتىندەر از شىعار، - دەپ توقتالدى زارەما شاۋكەنوۆا.

ونىڭ ايتۋىنشا، سينولوگ- عالىم، قىتايدىڭ ورتالىق ازيا ەلدەرىمەن قارىم- قاتىناسىن زەرتتەۋشى تەمىر وماروۆ (بىشكەك) ءوزىنىڭ تاياۋدا بەرگەن سۇحباتىندا قازاقستاننان باسقا ورتالىق ازيا ەلدەرىندە قىتايتانۋ سالاسى دامىماي جاتقانىنا توقتالعان ەدى.

جالپى قازاقستاندىق عىلىمنىڭ ودان ءارى دامۋىنا جانە ونىڭ الەۋمەتتىك- گۋمانيتارلىق باعىتتارىنىڭ جاڭا سەرپىنىنە مەملەكەت باسشىسىنىڭ ق ر ۇلتتىق عىلىم اكادەمياسىنا مەملەكەتتىك مارتەبە بەرۋ تۋرالى شەشىمى ىقپال ەتكەنى ءسوزسىز. قازىرگى ۋاقىتتا پرەزيدەنتتىڭ ءتيىستى جارلىعىمەن ق ر ۇلتتىق عىلىم اكادەمياسى ق ر پرەزيدەنتى جانىنداعى ۇيىم مارتەبەسىن الدى. ال مەملەكەت باسشىسىنىڭ قىتايعا مەملەكەتتىك ساپارى ەلدەر اراسىنداعى ءوزارا ءتيىمدى ىنتىماقتاستىقتى ودان ءارى نىعايتۋعا ىقپال ەتەتىن بولادى، - دەپ تۇيىندەدى زارەما شاۋكەنوۆا.