19:13, 18 - مامىر 2023 | GMT +5
تاشكەنتتە قازاقتان جەڭىلگەن رەسەيلىك نوكاۋتشى كارەراسىن اياقتادى
استانا. قازاقپارات - توكيو وليمپياداسىنىڭ قولا جۇلدەگەرى، رەسەيلىك بوكسشى يمام حاتايەۆ اۋەسقويداعى كارەراسىن اياقتاۋ تۋرالى شەشىم قابىلدادى، دەپ حابارلايدى Vesti.kz.
ەندى ول كاسىپقوي بوكسقا اۋىسپاق نيەتتە. بۇل تۋرالى بوكسشىنىڭ ءوزى تاشكەنتتە وتكەن الەم چەمپيوناتىنان كەيىن مالىمدەدى. جارتىلاي فينالدا نۇربەك ورالبايدان جەڭىلگەن حاتايەۆ ءا چ- ءنىڭ قولا جۇلدەگەرى اتاندى.
«بۇل مەنىڭ اۋەسقوي كارەرامداعى العاشقى جانە سوڭعى الەم چەمپيوناتى. كاسىپقويعا وتەمىن دەپ شەشىم قابىلدادىم. جاسىم ءوتىپ بارادى، ونىڭ ۇستىنە كوبى مەنىڭ ءستيلىم كاسىپقويعا ءتان دەيدى. ءوزىم دە كاسىپقويعا كەتۋ كەرەگىن سەزىپ ءجۇرمىن»، - دەپ بەرەدى حاتايەۆتىڭ ءسوزىن «ماتچ ت ۆ».
