زاڭسىز شىعارىلعان اقشانى قايتارۋمەن اينالىساتىن تاعى ءبىر ورگان قۇرىلۋى مۇمكىن

استانا. قازاقپارات - باس پروكۋراتۋرانىڭ جانىنان زاڭسىز شىعارىلعان كاپيتالدى قايتارۋمەن اينالىساتىن ازاماتتىق تاركىلەۋ ينستيتۋتى قۇرىلۋى مۇمكىن، دەپ حابارلايدى قازاقپارات ءتىلشىسى.

ءماجىلىس دەپۋتاتتارىنا قىلمىستىق زاڭناماعا ۇسىنىلعان تۇزەتۋلەردى تانىستىرعان ادىلەت ۆيتسە-ءمينيسترى الما مۇقانوۆا ب ا ق وكىلدەرىنە بەرگەن سۇحباتىندا وسىنداي مالىمەت ايتتى.

«نەگىزى مەملەكەت باسشىسىنىڭ جارلىعى بويىنشا زاڭ جوبالارى 31- ناۋرىزعا دەيىن ءماجىلىس قاراۋىنا ەنگىزىلۋى كەرەك بولاتىن. ءبىراق بۇل زاڭ جوباسىنىڭ ءوزى كۇردەلى ماسەلە ەكەنىن بىلەسىزدەر. مەملەكەتتىك ورگاندار ۇسىنعان كوپتەگەن نورما مەن ۇسىنىستارعا قاتىستى ءبىرقاتار سۇراق تۋىنداپ وتىر.

مىسالى، ۇكىمەت ازىرلەگەن زاڭ جوباسىندا ازاماتتىق تاركىلەۋ ينستيتۋتى دەيتىن جاڭا ينستيتۋت قۇرۋ ۇسىنىلعان. ەگەر قانداي دا ءبىر تۇلعانىڭ يەلىگىندە قايدان كەلگەنى نەگىزدەلمەگەن وراسان بايلىق، اكتيۆ بار ەكەنى انىقتالسا، تاركىلەۋ ءۇشىن بۇكىل قىلمىستىق ينستاتسيالاردان ءوتۋ كەرەك. ءتيىستى تەرگەۋ ءجۇرىپ، قىلمىستىق سوتتا قارالۋى كەرەك. ول ينستيتۋت باس پروكۋراتۋرانىڭ جانىنان قۇرىلادى. وسى مەمورگاننىڭ اياسىندا بەلگىلى ءبىر تۇلعالاردىڭ ءتىزىمى قالىپتاسادى. «قايتارۋعا جاتاتىن اكتيۆتىڭ ەڭ تومەنگى شەگى قانشا بولۋى كەرەك؟» دەگەن سياقتى قازىر ءتۇرلى ولشەمشارتتار ۇسىنىلۋدا. كەز كەلگەن ازاماتتى كۇدىككە الىپ، ايىپ تاعا المايمىز عوي. ياعني، ەڭ تومەنگى سومانى بەلگىلەپ الۋىمىز كەرەك. ەكىنشى ءبىر ماسەلە - ول تۇلعانىڭ بايلىقتى قانداي جولمەن يەلەنگەنىن انىقتاۋ. ونىڭ وزگەلەرگە قاراعاندا ۇستەم جاعدايى بولدى ما، ول دا ەسكەرىلۋى كەرەك»، - دەدى ۆيتسە-مينيستر.

ب ا ق وكىلدەرى ازاماتتىق تاركىلەۋ ينستيتۋتىنا كىمدەر تارتىلاتىنىن سۇرادى.

«قازىرگى نۇسقا بويىنشا ول ورگان باس پروكۋراتۋرانىڭ ىشىنەن، سونداعى قۇرىلىمدىق بولىمشەلەردىڭ ءبىرى تاعايىندالۋى مۇمكىن. ءبىراق ىزدەستىرۋ ماسەلەسى كۇردەلى بولىپ تۇر. وسىعان بايلانىستى ولاردىڭ اراسىنا ەكونوميستەر، اۋديتورلار جانە وزگە دە ماماندار تارتىلۋى مۇمكىن. ەڭ باستىسى، بۇل قۇرىلاتىن ورگان تۇلعالاردىڭ ءتيىستى تىزىلىمىمەن جۇمىس ىستەيتىن بولادى. ول تىزىلىمگە ءبىرقاتار ولشەمشارتقا ساي كەلەتىن سۋبەكتىلەر ەنگىزىلەدى. وسى سۋبەكتىلەر يەلىگىندەگى مۇلىكتەرى مەن اكتيۆتەرىن زاڭدى جولمەن تاپقانىن دالەلدەۋى كەرەك. مىسالى اسا باي ازامات بولسا، كەلىپ دەكالاراتسيا تاپسىرۋى كەرەك. ول دەكلاراتسيادا يەلىگىندەگى بايلىق قاي جولمەن كەلگەنى تۋرالى تولىق اقپارات بەرۋ كەرەك. ەگەر ونداي اقپاراتتى بەرە الماسا، دالەلدەي الماسا ءتيىستى ورگان ازاماتتىق سوتقا تاركىلەۋ تۋرالى جۇگىنەدى»، - دەدى ول.