الماتىدا ارباتتىڭ بۇكىل اۋماعىنا بەينەكامەرا قويىلادى
ە. دوسايەۆتىڭ المالى اۋدانى تۇرعىندارىمەن كەزدەسۋدە كەشكى ۋاقىتتا اربات اۋماعىنان قاتتى شۋ ەستىلەتىنى ايتىلدى.
«ابىلاي حان داڭعىلىنداعى 59- ءۇيدىڭ تۇرعىنىمىن. كەشكە اربات جاقتان كوپ شۋ ەستىلەدى. سول ءۇشىن ءبىز ءتۇرلى شارا قابىلداۋعا: 102 گە حابارلاسۋعا، پاترۋل شاقىرۋعا ءماجبۇرمىز. ودان بولەك، مۇندا موپەدشىلەر دە باس قوسا باستادى. ولار كەشكى جانە تۇنگى ۋاقىتتا ءجيى جينالادى. ولار ءبىزدىڭ ەسكەرتپەلەردى ءتىپتى ەلەڭ قىلمايدى»، - دەدى قالا تۇرعىنى.
ەربولات دوسايەۆ اربات اۋماعىنا قوسىمشا بەينەكامەرالار ورناتىلاتىنىن ايتتى.
«ءبىز سيفرلاندىرۋ باسقارماسىمەن بىرگە ارباتتىڭ بۇكىل جاياۋ جۇرگىنشىلەر اۋماعىنا بەينەكامەرا ورناتامىز. اۋدان اكىمىنە، پوليتسيا دەپارتامەنتىنە وسى ۇسىنىستى قولداۋدى تاپسىرامىن. زاڭنامالىق رەتتەۋدىڭ ارقاسىندا ءتارتىپ قولعا الىناتىن بولادى»، - دەدى الماتى اكىمى.
ال قالالىق پوليتسيا دەپارتامەنتى باستىعىنىڭ ءبىرىنشى ورىنباسارى نۇرلان الماسبەكوۆ اربات بويىنشا ءتيىستى شارالار قابىلدانىپ، پاترۋلدەر كوبەيتىلەتىنىن مالىمدەدى.
