زاڭسىز شىعارىلعان كاپيتالدى ەلگە قايتارۋ زاڭ جوباسى ماجىلىسكە قاشان تۇسەدى

استانا. قازاقپارات - ءماجىلىس دەپۋتاتتارىنا قىلمىستىق زاڭناماعا ۇسىنىلعان تۇزەتۋلەردى تانىستىرعان ادىلەت ۆيتسە- ءمينيسترى الما مۇقانوۆا ەل اۋماعىنان زاڭسىز شىعارىلعان كاپيتالدى قايتارۋ تۋرالى زاڭ جوباسى ماجىلىسكە قاشان تۇسەتىنىن ايتتى، دەپ حابارلايدى قازاقپارات ءتىلشىسى.

«زاڭسىز شىعارىلعان اكتيۆتەردى قايتارۋ باعىتىنداعى زاڭ جوباسىن ۇكىمەت ازىرلەگەن بولاتىن. سونىمەن بىرگە ءتيىستى زاڭ جوباسىن پارلامەنت دەپۋتاتتارى دا دايىنداپ، ۇكىمەتكە قورىتىندى بەرۋ ءۇشىن ەنگىزىلدى. قازىرگى تاڭدا اتالعان زاڭ جوبالارى ۇكىمەتتىڭ قاراۋىندا جاتىر. ياعني ۇكىمەت ءوز قورىتىندىسىن ازىرلەۋ ۇستىندە»، - دەگەن ۆيتسە- مينيستر اتالعان شارۋانىڭ قانشا ۋاقىتقا سوزىلاتىنىن ايتىپ ءوتتى.

«كەلەسى ايدىڭ اياعىنا دەيىن ۇكىمەت زاڭ جوباسىنا بەرىلەتىن قورىتىندىنى ازىرلەپ ۇلگەرەدى جانە ءماجىلىستىڭ قاراۋىنا وتكىزەدى دەپ ويلايمىن»، - دەدى الما مۇقانوۆا.