ب ۇ ۇ وكىلى قازاقستاندا بالالار قۇقىعى جونىندەگى ءبىرىڭعاي ورگان قۇرۋدى ۇسىندى
«ءبىز ۇسىنعىمىز كەلەتىن بالالارعا قىزمەت كورسەتۋ تاجىريبەسى ىشكى ىستەر مينيسترلىگى ءۇشىن ەرەكشە بولۋى مۇمكىن. ماسەلەن، ءتۇرلى قىلمىستاردىڭ قۇربانى بولعان بالالاردان جاۋاپ الۋ پروتسەسى ءبۇلدىرشىن ءۇشىن پسيحولوگيالىق سوققى بولۋى مۇمكىن. دانيا، يسلانديا جانە شۆەتسيا سياقتى سكانديناۆيا ەلدەرىنىڭ بۇل باعىتتا وتە جاقسى تاجىريبەسى بار. ءبىز «بارناحۋس» دەپ اتالاتىن مودەل تۋرالى ايتىپ وتىرمىز. وندا ءبىر بىلىكتى ءارى كاسىبي مامان بالاعا ساۋالناما جۇرگىزەدى، ال كەيىن بارلىعى سول بەينەجازبانى كورىپ، ودان اقپارات الادى. وسىلايشا، بالا قورىقپايدى جانە كۇيزەلىسكە تۇسپەيدى»، - دەدى ارتۋر ۆان ديزەن و ك ق- داعى بريفينگىدە.
ونىڭ ايتۋىنشا، كاسىبي مامان جۇرگىزگەن ساۋالناما نەگىزىندە الىنعان مالىمەت ونىڭ ماسەلەسىن شەشۋ مەن ءتۇرلى قىزمەت كورسەتۋ ءۇشىن قولدانىلادى.
«ۆەدومستۆوارالىق جانە سەكتورارالىق جۇمىستى جۇيەلى ۇيلەستىرۋ وتە ماڭىزدى. بۇل رەتتە قاي مينيسترلىك قانداي ماسەلەگە جاۋاپ بەرەتىنىن ءبىلۋ قاجەت. مەنىڭ ويىمشا، قازاقستاندا بالالار قۇقىعىن قورعاۋعا جاۋاپتى ءبىر ورگان قۇرۋ قاجەت. مۇنداي ورگان مينيسترلىكتىڭ ىشىندە جۇمىس ىستەيتىن بولسا، ول تەك وسى ءبولىمنىڭ ىشىندەگى جۇمىستى عانا ۇيلەستىرەدى. ال باسقا مينيسترلىكتەر ءوز وكىلەتتىكتەرى شەڭبەرىندە جۇمىس ىستەي بەرەدى. سوندىقتان ءبىرىڭعاي ورتالىق ورگان قۇرىلسا، ونىڭ جۇمىس ناتيجەسى الدەقايدا ساپالى بولار ەدى»، - دەپ ۇسىنىس ءبىلدىردى ول.
