استانادان ءۇرجارعا جولاۋشىلار ۇشاعى قاتىناي باستادى
الاڭ تولىقتاي جاڭعىرتىلىپ، ۇشۋ جانە قونۋ جولاعى 1500 مەتردەن 2100 مەترگە دەيىن كەڭەيتىلدى. مۇنان بولەك بەس قاباتتى باقىلاۋ مۇناراسى سالىندى. قازىر اۋەجاي ءبىر مەزەتتە ەكى ۇشاقتى قاتار قوندىرا الادى. 15-مامىردان باستاپ «بومبارديە» ماركالى ۇشاق استانادان ءۇرجارعا جولاۋشىلاردى تاسىمالداي باستادى. جەرگىلىكتى بيلىك وكىلدەرى قازىر اۋەجايدىڭ عيماراتىنا جوندەۋ جۇرگىزۋ ءۇشىن جوبالىق- سمەتالىق قۇجات ازىرلەپ جاتىر.
ەرنات جۇماشيەۆ، ءۇرجار اۋداندىق ت ۇ ك ش، جولاۋشىلار كولىگى جانە اۆتوموبيل جولدارى ءبولىمىنىڭ باس مامانى:
- 2022 -جىلى جارىق شامىن جانە بەينە باقىلاۋ كامەرالارىن ورناتۋ جوباسى ازىرلەنىپ، باستالعان بولاتىن. بۇل جوبا ۇشاقتاردى تۇنگى ۋاقىتتا قابىلداۋعا مۇمكىندىك بەرەدى. قۇرىلىس جۇمىستارىنىڭ ناتيجەسىندە ءۇرجار اۋەجايى 80-90 جولاۋشىعا ارنالعان ۇشاقتاردى قابىلداي الادى. بومباردير، فوكەر، ەمبرايەر سەكىلدى ۇشاقتاردى قابىلداۋعا مۇمكىندىگى بار.
www.24.kz
