ماۋلەن اشىمبايەۆ باتىس مەملەكەتتەرىنىڭ رەسەيگە قاتىستى سانكسياسى جونىندە پىكىر ءبىلدىردى
«باتىس مەملەكەتتەرىنىڭ سانكسيالارىن بۇزبايمىز. ەلىمىزدىڭ تەرريتورياسى، كومپانيالارى سانكسيانى بۇزۋ ءۇشىن پايدالانۋعا ەشقانداي مۇمكىندىك بەرىلمەيدى. بۇل - قازاقستاننىڭ ناقتى ۇستانىمى»، - دەدى م. اشىمبايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
وسى ورايدا ەلىمىزدىڭ پوزيتسياسىن مەملەكەت باسشىسى دا، ق ر سىرتقى ىستەر مينيسترلىگى دە بىرنەشە رەت جاريالاعانىن ەسكە سالدى.
«بۇل ۇستانىم اياسىندا ارى قاراي جۇمىس ىستەيمىز. ەڭ باستىسى، ءبىز سىرتقى ساياساتىمىزدا ۇلتتىق مۇددەمىزگە باعىتتالعان قادامدار جاسايمىز. ەلىمىزدىڭ ۇلتتىق مۇددەسىنە قاتىستى ماڭىزدى ماسەلەلەردى ەسكەرىپ، ءتيىستى باستامالاردى كوتەرەمىز جانە وسىعان ساي ساياسات جۇرگىزەمىز»، - دەدى سەنات ءتوراعاسى.
بۇدان بۇرىن حابارلانعانداي، بيىل ءساۋىر ايىندا ق ر قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ەلىمىزدەگى ەكىنشى دەڭگەيلى بانكتەر رەسەيگە قاتىستى سانكسيا تالاپتارىن ورىنداۋ باعىتىندا ءتيىستى راسىمدەردى كۇشەيتكەنىن ايتتى.
سونىمەن قاتار، ەلىمىزدىڭ سىرتقى ىستەر مينيسترلىگى قازاقستان سانكسيالاردى اينالىپ وتۋگە مۇمكىندىك جاسامايتىنىن جاريالادى.
