پرەزيدەنت شيان قالاسىنداعى قازاقستاننىڭ لوگيستيكا ورتالىعىنىڭ ىرگەتاسىن قالاۋ راسىمىنە قاتىستى

شيان. قازاقپارات - مەملەكەت باسشىسى شيان قالاسىنداعى قۇرعاق پورتتا قازاقستاننىڭ لوگيستيكا ورتالىعىنىڭ ىرگەتاسىن قالاۋ راسىمىنە قاتىستى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

پرەزيدەنت قاسىم- جومارت توقايەۆ سالتاناتتى راسىمگە قاتىسۋشىلاردى قۇرىلىستىڭ باستالۋىمەن قۇتتىقتاپ، اتالعان جوبانىڭ ماڭىزدىلىعىن اتاپ ءوتتى.

«ەلىمىز سوڭعى 15 جىلدا بۇل سالاعا 35 ميلليارد دوللار ينۆەستيتسيا سالدى. ليانيۋنگان پورتىندا قازاق- قىتاي لوگيستيكا ورتالىعىن قۇردىق. جاڭا تەمىرجول باعىتتارىن اشتىق. «قورعاس - شىعىس قاقپاسى» قۇرعاق پورتى جۇمىس ىستەي باستادى. كاسپي تەڭىزىندە زامان تالابىنا ساي ينفراقۇرىلىم جاسالدى. وسى شارالاردى جۇزەگە اسىرىلىپ جاتقان جۇمىستىڭ ءبىر بولىگى دەۋگە بولادى. بىلتىر ەكى ەل اراسىندا تەمىرجول ارقىلى 23 ميلليون توننا جۇك تاسىمالداندى. بۇل - بۇرىن- سوڭدى بولماعان كورسەتكىش. بيىل ءبىرىنشى توقساندا جۇك ترانزيتى 35 پايىزعا ارتىپ، 7 ميلليون توننادان استى.

ءبىزدىڭ ىنتىماقتاستىعىمىز مۇنىمەن شەكتەلمەيدى. الىس- بەرىستى ودان ءارى دامىتۋ ءۇشىن قوسىمشا ينفراقۇرىلىم قاجەت. سوندىقتان قىتايلىق ارىپتەستەرمەن بىرگە شيان قالاسىنداعى قۇرعاق پورتتا لوگيستيكا ورتالىعىن سالۋ كەرەك دەگەن شەشىم قابىلدادىق. بۇل حاب شانشي ايماعىن قازاقستانمەن، ورتالىق ازيامەن بايلانىستىرادى. ءارى قاراي ەۋروپاعا، تۇركياعا جانە يرانعا جول اشادى. جوبانىڭ تولىق ىسكە قوسىلۋى ەكى ەلدىڭ ىنتىماقتاستىعىنا تىڭ سەرپىن بەرەدى دەپ سەنەمىن»، - دەدى قاسىم- جومارت توقايەۆ.

كەلەسى جىلدان باستاپ قۇرعاق پورت ارقىلى ەلەكترونيكالاردى، كومپيۋتەر بولشەكتەرىن، اۆتوموبيلدەر مەن اۆتوبولشەكتەردى، توقىما بۇيىمدارىن، كيىم- كەشەك، اياق كيىم مەن اكسەسسۋارلاردى، ازىق- تۇلىك جانە اۋىل شارۋاشىلىعى ونىمدەرىن، قۇرىلىس ونىمدەرى مەن قۇرىلىس ماتەريالدارىن، سونداي- اق رۋدالاردى، مەتالداردى جانە حيميالىق ونىمدەردى تاسىمالداۋ جوسپارلانىپ وتىر.