قىلمىسىن مويىنداعانى ءۇشىن جازادان بوساتۋ ءتارتىبى قاتاڭداتىلماق
بۇل تۋرالى ۆيتسە-مينيستر الما مۇقانوۆا ءماجىلىس دەپۋتاتتارىنا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق، قىلمىستىق- پروتسەستىك جانە قىلمىستىق-اتقارۋ كودەكستەرىن وڭتايلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرعان كەزدە ايتتى، دەپ حابارلايدى قازاقپارات ءتىلشىسى.
«قىلمىستىق زاڭنىڭ جالپى ەرەجەلەرىن جەتىلدىرۋ شەڭبەرىندە پروتسەستىك كەلىسىم بويىنشا كىنانى مويىنداۋ نىسانىندا قىلمىستىق جاۋاپتىلىقتان بوساتۋدى الىپ تاستاۋ ۇسىنىلادى»، - دەدى ول.
ايتۋىنشا، قازىرگى تاڭدا پروتسەستىك كەلىسىم 2 نىساندا جاسالادى. ونشا اۋىر ەمەس، اۋىرلىعى ورتاشا نە اۋىر قىلمىستار بويىنشا - كۇدىكتى، ايىپتالۋشى كەلتىرىلگەن كۇدىكپەن، ايىپتاۋمەن كەلىسكەن جاعدايدا كىنانى مويىنداۋ تۋرالى مامىلە جاسالىپ، سونىڭ نەگىزىندە جاۋاپتىلىقتان بوساتىلۋى مۇمكىن.
سونداي-اق، قىلمىستىق توپ جاساعان قىلمىستاردى، وزگە دە ادامدار جاساعان اسا اۋىر قىلمىستاردى، سونداي-اق ەكسترەميستىك جانە تەرروريستىك قىلمىستاردى اشۋعا جانە تەرگەپ- تەكسەرۋگە ىقپال ەتۋ كەزىندە بارلىق ساناتتاعى قىلمىستار بويىنشا ىنتىماقتاستىق تۋرالى كەلىسىم بەكىتىلگەن كەزدە جاۋاپتىلىقتان بوساتۋ كوزدەلگەن.
«قىلمىستىق زاڭ پروتسەستىك كەلىسىمنىڭ بارلىق شارتتارىن ورىنداعان ادامنىڭ قىلمىستىق جاۋاپتىلىقتان بوساتىلۋى مۇمكىن ەكەنىن بەلگىلەيدى بۇل قىلمىستىق كودەكستىڭ 67-بابىندا كورسەتىلگەن.
پروتسەستىك كەلىسىم نەمەسە «تەرگەۋمەن مامىلە» كەزىندە ادام كىنانى مويىندايدى، دالەلدەمەلەر مەن زالالدىڭ مولشەرىنە داۋ ايتپايدى، تەرگەۋ مەن سوت جەدەلدەتىلگەن تارتىپپەن جۇرەدى، ياعني كىنانى دالەلدەۋ ءۇشىن مەملەكەتتىڭ ۋاقىتى مەن قاراجاتى ۇنەمدەلەدى.
الايدا، جوعارىدا اتالعان پروتسەستىك كەلىسىمنىڭ ەكى نىسانى اراسىندا تۇبەگەيلى ايىرماشىلىق بار: ەگەر ءبىرىنشى جاعدايدا سوتتالۋشى تەك ءوزىنىڭ كىناسىن مويىنداپ قانا قويسا، ەكىنشى جاعدايدا ونىڭ قىلمىستى ودان ءارى اشۋعا بەلسەندى جاردەمدەسۋى تالاپ ەتىلەدى. بۇل ەكى نىساندا قىلمىستىق ءىس قارالىپ جاتقان سوتتالۋشىلاردى تەڭ ەمەس جاعدايعا قويادى.
بۇل رەتتە، ءىس جۇزىندە كىنانى مويىنداۋ تۋرالى مامىلە مىندەتتى تۇردە سوتتىڭ ايىپتاۋ ۇكىمىمەن اياقتالادى جانە جازانىڭ ەڭ جوعارى مەرزىمىنىڭ نەمەسە مولشەرىنىڭ جارتىسىنان اسپايتىن جازا تاعايىندالادى (ق ك 55-بابىنىڭ 3-بولىگى). ەگەر سوت كىنانى مويىنداۋ تۋرالى مامىلەمەن كەلىسپەسە، وندا ول ءىستى پروكۋرورعا ادەتتەگىدەي تەرگەۋدى ۇيىمداستىرۋ ءۇشىن قايتارادى. وسىلايشا، ق ك-نىڭ 67-بابىنىڭ ەرەجەلەرى ءىس جۇزىندە كىنانى مويىنداۋ تۋرالى مامىلەگە قولدانىلا المايدى.
وسىعان بايلانىستى وسى باپتىڭ قولدانىلۋ اياسىن ىنتىماقتاستىق تۋرالى ءىس جۇرگىزۋ كەلىسىمىنىڭ بارلىق شارتتارىن ورىنداۋ جاعدايلارىمەن عانا شەكتەۋ ۇسىنىلادى»، - دەدى الما مۇقانوۆا.
