قىتايمەن ساۋدا-ەكونوميكالىق زەرتتەۋلەر تۋرالى مەموراندۋمعا قول قويىلدى

استانا. قازاقپارات - مەملەكەت باسشىسى قاسىم-جومارت توقايەۆتىڭ قىتاي حالىق رەسپۋبليكاسىنا مەملەكەتتىك ساپارى اياسىندا قازاقستان مەن قىتاي تاراپى ساۋدا-ەكونوميكالىق زەرتتەۋلەر سالاسىنداعى ءوزارا تۇسىنىستىك تۋرالى مەموراندۋمعا قول قويدى، دەپ حابارلايدى قازاقپارات ۇكىمەتتىڭ رەسمي سايتىنا سىلتەمە جاساپ.

مەموراندۋم قازاقستان-قىتاي ساۋدا- ەكونوميكالىق ىنتىماقتاستىعىن ساپالى جاڭا دەڭگەيدە ودان ءارى ىلگەرىلەتۋگە جانە دامىتۋعا، ونىڭ ىشىندە ەكى ەلدىڭ عىلىمي ۇيىمدارى اراسىنداعى ارىپتەستىك بايلانىستاردى ۇيلەستىرۋگە باعىتتالعان. قۇجاتقا ق ر پرەمەر-ءمينيسترىنىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين جانە ق ح ر كوممەرتسيا ءمينيسترى ۆان ۆەنتاو قول قويدى.

قۇجات «ساۋدا- ەكونوميكالىق ستراتەگيالار ورتالىعى» قوعامدىق قورى (قازاقستان) مەن ق ح ر كوممەرتسيا مينيسترلىگىنىڭ حالىقارالىق ساۋدا-ەكونوميكالىق ىنتىماقتاستىق اكادەمياسى اراسىندا قاجەتتى زەرتتەۋلەر، بىرلەسكەن تالدامالىق جانە باسقا دا شولۋلار جۇرگىزۋدى، وزىق تاجىريبە مەن اقپارات الماسۋدى كوزدەيدى. زەرتتەۋ باعىتتارى - بيزنەس-ورتانى جاقسارتۋ تۇرعىسىنان ەكىجاقتى ساۋدا، ەلەكتروندىق كوممەرتسيانى، قازاقستان مەن قىتايدىڭ ترانزيتتىك جانە لوگيستيكالىق الەۋەتىن دامىتۋ، ارنايى ەكونوميكالىق ايماقتار ينستيتۋتىن جەتىلدىرۋ، «جاسىل» دامۋ، جاڭا ەنەرگەتيكا جانە ەكىجاقتى ساۋدا- ەكونوميكالىق ىنتىماقتاستىقتىڭ باسقا دا ماڭىزدى ماسەلەلەرى.

سونداي-اق، ءوزارا تۇسىنىستىك تۋرالى مەموراندۋم ساۋدا-ەكونوميكالىق زەرتتەۋلەر سالاسىنداعى ىنتىماقتاستىقتى ىنتالاندىرۋعا ىقپال ەتۋگە جانە ءوزارا ساۋدانىڭ الەۋەتىن ارتتىرۋدىڭ تاسىلدەرى مەن تەتىكتەرى بويىنشا ۇسىنىستار ازىرلەۋگە، يننوۆاتسيالىق دامۋعا جاردەمدەسۋگە، جاڭا تەحنولوگيالاردى پايدالانۋعا باعىتتالعان جانە باسقا دا بىرلەسكەن ءىس-شارالاردى وتكىزۋ مۇمكىندىگى قاراستىرىلعان.