كەنتاۋ قالاسىنىڭ ەكس-اكىمىنە قاتىستى تەرگەۋ اياقتالدى

استانا. قازاقپارات - انتيكوررۋپتسيالىق قىزمەت كەنتاۋ قالاسىنىڭ ەكس-اكىمىنە قاتىستى تەرگەۋدى اياقتادى، دەپ حابارلايدى قازاقپارات.

2013 -جىلى ول پرەمەر-مينيستر كەڭسەسىنىڭ قىزمەتكەرى بولا وتىرىپ، ءىرى جەكە مەنشىك كومپانيانىڭ يەسىن جاۋاپتى لاۋازىمدى تۇلعالارعا اسا ءىرى سومادا پارا بەرۋگە كوندىردى. وسى ءۇشىن قۇرىلىس بويىنشا تەندەردە جەڭىستى قامتاماسىز ەتۋگە ۋادە بەردى. تالاپ ەتىلگەن سومانى الىپ، وزىنە قالدىرىپ، اقشاسىنىڭ ءبىر بولىگىن استانا قالاسىنان جاڭا ءۇي، قىمبات تۇراتىن اۆتوكولىك جانە بىرنەشە جۇك تەحنيكاسىن ساتىپ الۋعا جۇمسادى.

ونىڭ ارەكەتتەرى اسا ءىرى كولەمدە پارا بەرۋگە ارانداتۋ جانە الاياقتىق رەتىندە سارالانعان، تەرگەۋ سوتىنىڭ سانكتسياسىمەن ول قاماۋدا وتىر.

قازىرگى ۋاقىتتا قىلمىستىق ءىس ماتەريالدارى قابىلدانعان شەشىمنىڭ زاڭدىلىعىن تەكسەرۋ جانە ودان ءارى سوتقا جولداۋ ءۇشىن استانا قالاسىنىڭ پروكۋراتۋراسىنا تاپسىرىلدى.

تەرگەۋ مۇددەسى ءۇشىن وزگە اقپارات جاريا ەتۋگە جاتپايدى.

سونىمەن بىرگە، كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق- پروتسەستىك كودەكسىنىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.