ەلىمىزدەن نوبەل سىيلىعىنىڭ لاۋرەاتتارى قاشان شىعۋى مۇمكىن

استانا. قازاقپارات - عىلىم جانە جوعارى ءبىلىم ءمينيسترى ساياسات نۇربەك ەلىمىزدە نوبەل سىيلىعىنىڭ لاۋرەاتى شىعۋى ءۇشىن عالىمدارعا قانداي جاعداي جاساۋ كەرەك ەكەنىن ايتتى، دەپ حابارلايدى قازاقپارات ءتىلشىسى.

«نوبەل سىيلىعىنىڭ لاۋرەاتى شىعۋى ءۇشىن ءتيىستى عىلىمي مەكتەپتەردى قۇرۋعا ونداعان جىلدار بويى ينۆەستيتسيا سالۋ كەرەك. بۇعان ءبىراز كۇش-جىگەر قاجەت. نوبەل سىيلىعىنىڭ قالاي بەرىلەتىنىنە قاراساڭىز، ول قانداي دا ءبىر عىلىمي جاڭالىق ءۇشىن تاپسىرىلمايدى. اتالعان سىيلىقتى الۋ ءۇشىن بۇل جاڭالىقتىڭ سالالىق عىلىمنىڭ، ءوندىرىستىڭ جانە ونەركاسىپتىڭ دامۋىنا ەلەۋلى ۇلەس قوسقانى دالەلدەنۋى ماڭىزدى. ادەتتە، ول عىلىمي تۇردە دالەلدەنگەننەن كەيىن ءبىراز جىل وتكەننەن سوڭ بەرىلەدى»، - دەدى س. نۇربەك ماجىلىستە عىلىمدى دامىتۋ تاقىرىبىنداعى ۇكىمەت ساعاتىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، بۇل باعىتتا عىلىمي مەكتەپتەردى قۇرۋ باعىتىندا ەلەۋلى قادامدار جاسالۋى كەرەك.

«ويتكەنى، قازىر كوپتەگەن زەرتتەۋدى جەكە عالىمدار ەمەس، زەرتتەۋ ۇجىمدارى جۇرگىزىپ جاتىر. بۇل تۇرعىدا بىزدە كەمشىلىكتەر بار. بۇگىن ماجىلىستە ەلىمىزدەگى عالىمدار مەن كادرلىق جاعداي تۋرالى ەسەپ بەردىم. كەيىنگى 30 جىلدا ءبىز ەلەۋلى كادرلىق الەۋەتتى جوعالتتىق. تاۋەلسىزدىكتىڭ العاشقى جىلدارىندا بىزدە رەسمي تىركەلگەن 52 مىڭ عالىم بولسا، 2000-جىلعا قاراي 12 مىڭعا دەيىن ازايدى. سوندىقتان، 5-10 جىلدا عالىمدارعا جۇيەلى تۇردە جاعداي جاساپ، سالاعا قاراجات بولسەك، ناتيجە بولادى دەپ ويلايمىن»، - دەدى مينيستر.

بۇدان بۇرىن حابارلانعانداي، بۇگىن ماجىلىستە عىلىمدى دامىتۋ تاقىرىبىنداعى ۇكىمەت ساعاتىندا عىلىم جانە جوعارى ءبىلىم ءمينيسترى ساياسات نۇربەك جاستار PhD عىلىم دارەجەسىن الىپ، ۋنيۆەرسيتەتكە جۇمىس ىستەۋگە بارمايتىنىن ايتتى.

ايتا كەتسەك، بۇگىندە ەلىمىزدە 22456 عىلىمي كادر بار. زەرتتەۋشىلەردىڭ 37 پايىزى (2022-جىلى - %35) عىلىمي جانە اكادەميالىق دارەجەگە يە. سونداي-اق، زەرتتەۋشىلەردىڭ 34 پايىزى - 35 جاسقا دەيىنگى جاس عالىمدار، 43 پايىزى - 35-54 جاستاعىلار، 23 پايىزى - 55 جاستان اسقان عالىمدار.