عىلىم ءمينيسترى نازاربايەۆ ۋنيۆەرسيتەتىن باسقارۋ جۇيەسىنە قاتىستى پىكىر ءبىلدىردى
بۇل تۋرالى ماجىلىستە عىلىمدى دامىتۋ تاقىرىبىنداعى ۇكىمەت ساعاتىننان كەيىن ق ر عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابارلايدى قازاقپارات ءتىلشىسى.
«نازاربايەۆ ۋنيۆەرسيتەتى شىن مانىندە ءبىزدىڭ جەتەكشى زەرتتەۋ ۋنيۆەرسيتەتتەرىمىزدىڭ ءبىرى. مۇندا اۋقىمدى زەرتتەۋ ءارى زەرتحانالىق بازا بار. عىلىمي جاريالانىمدار بويىنشا وتە جاقسى كورسەتكىشتەر بايقالدى. نازاربايەۆ ۋنيۆەرسيتەتىنىڭ تۇلەكتەرى قازىر ماڭىزدى كومپانيالاردا جۇمىسقا ورنالاسىپ جاتىر. دەگەنمەن، ايتىلىپ جاتقان سىننىڭ باسىم بولىگى جۇمسالعان قاراجاتتىڭ اشىق تارتىپتە يگەرىلۋىنە، حالىقارالىق رەيتينگىلەرگە ەنۋىنە قاتىستى بولىپ وتىر»، - دەدى س. نۇربەك ماجىلىستە عىلىمدى دامىتۋ تاقىرىبىنداعى ۇكىمەت ساعاتىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، قازىرگى كەزدە مينيسترلىك تىكەلەي نازاربايەۆ ۋنيۆەرسيتەتىنە ىقپال ەتە المايدى.
«ونىڭ قىزمەتى بولەك زاڭمەن رەتتەلىپ وتىر. سوندىقتان زاڭناماعا ءتيىستى وزگەرىس ەنگىزۋ ۇكىمەت دەڭگەيىندە پىسىقتالىپ جاتىر. وسى باعىتتا اتالعان ۋنيۆەرسيتەت بويىنشا ءتيىستى ۆەدومستۆونىڭ باسقارۋىنا قاتىستى جانە وقۋ ورنىنىڭ ەسەپ بەرۋى ماسەلەسى قاراستىرىلعان. ازىرگە ءبىز ۋنيۆەرسيتەتتى مەملەكەتتىك ءبىلىم بەرۋ تاپسىرىستارى ارقىلى عانا قولداپ كەلەمىز. اتاپ ايتقاندا، جۇرتشىلىقتى بۇل ماسەلەگە وتە مۇقيات قاراۋعا شاقىرامىن. ويتكەنى بۇل ۋنيۆەرسيتەتكە قانشاما كۇش-جىگەر، رەسۋرس جۇمسالعانىن ەسكەرە وتىرىپ، جوعارى وقۋ ورنىنىڭ الەۋەتىن جويىپ الماۋ ماڭىزدى»، - دەدى مينيستر.
سونىمەن قاتار دەپۋتات اسحات ايماعامبەتوۆ ەلدىڭ دامۋى ءۇشىن اتالعان ۋنيۆەرسيتەت پەن نازاربايەۆ زياتكەرلىك مەكتەپتەرى كەرەك ەكەنىن ايتتى. وسى ورايدا اتالعان وقۋ ورىندارىن باسقارۋ جۇيەسىندە بارلىعى تۇسىنىكتى ءارى اشىق بولۋى كەرەك.
بۇدان بۇرىن حابارلانعانداي، بۇگىن تۋرالى ماجىلىستە عىلىمدى دامىتۋ تاقىرىبىنداعى ۇكىمەت ساعاتىندا ق ر عىلىم جانە جوعارى ءبىلىم ءمينيسترى ساياسات نۇربەك جاستار PhD عىلىم دارەجەسىن الىپ، ۋنيۆەرسيتەتكە جۇمىس ىستەۋگە بارمايتىنىن ايتتى.
