اسحات ايماعامبەتوۆ عىلىمدى دامىتۋعا قاتىستى ءبىرقاتار ۇسىنىستى جاريالادى

استانا. قازاقپارات - بۇگىن ماجىلىستە عىلىمدى دامىتۋ تاقىرىبىنداعى ۇكىمەت ساعاتىندا دەپۋتات اسحات ايماعامبەتوۆ سالاعا قاتىستى ءبىرقاتار ۇسىنىستى جاريالادى، دەپ حابارلايدى قازاقپارات ءتىلشىسى.

«دەپۋتاتتىق كورپۋس «عىلىم جانە تەحنولوگيالىق ساياسات تۋرالى» زاڭ جوباسىن دايىنداپ جاتىر. ەندى ۇكىمەت ءتيىستى قورىتىندىنى تەز ارادا ماجىلىسكە ەنگىزۋى ءتيىس»، - دەدى ا. ايماعامبەتوۆ.

سونىمەن قاتار ول دەپۋتاتتار مەن ساراپشىلاردىڭ تاعى ءبىر ۇسىنىسىن ايتتى. اۋىل شارۋاشىلىعى مينيسترلىگى مەن مادەنيەت مينيسترلىگىنىڭ جوعارى وقۋ ورىندارىن عىلىم مينيسترلىگىنىڭ قاراماعىنا بەرۋ كەرەك. بۇل قادام سالاداعى ساپانى كوتەرۋگە ىقپال ەتەدى. ال وقۋ-اعارتۋ مينيسترلىگىنىڭ قاراماعىنا پەداگوگيكالىق ينستيتۋتتار مەن ۋنيۆەرسيتەتتەردى اۋىستىرۋ قاجەت. وسى باعىت ءبىلىم بەرۋدىڭ بارلىق دەڭگەيى ءۇشىن پەداگوگتەردى دايارلاۋدىڭ تۇتاس مودەلىن قۇرۋعا مۇمكىندىك بەرەدى.

«مۇنىمەن قوسا، تىكەلەي قارجىلاندىرۋعا جاتاتىن عىلىمي ۇيىمداردىڭ سۋبەكتىلەرىن كەڭەيتۋ كەرەك. ولار - مەديتسينا، اگرارلىق عىلىم، ىرگەلى زەرتتەۋلەر. ءبىزدىڭ عالىمدار كونكۋرستى كۇتىپ وتىرماي، كۇندەلىكتى قاراجاتى مەن ءتيىستى جالاقىسى بولۋى ءتيىس. ال كونكۋرستان ۇتىپ السا، بۇل قاراجات قوسىمشا قارجىلاندىرۋ رەتىندە قاراستىرىلۋى كەرەك»، - دەدى ا. ايماعامبەتوۆ.

بۇدان بولەك ول عىلىمي جوبالارعا مەملەكەتتىك عىلىمي-تەحنيكالىق ساراپتاما جۇرگىزەتىن ساراپشىلارعا قاتىستى جاپپاي ريەۆيزيا جۇرگىزۋدى ۇسىندى. ول ءۇشىن سۋبەكتيۆيزمدى الىپ تاستاپ، عىلىمي جۇمىستاردى ءبولۋ پروتسەسىن اۆتوماتتاندىرۋ قاجەت.

«ۇجىمدىق پايدالانۋ زەرتحانالارىنىڭ قىزمەتىن ۇيلەستىرۋ ءۇشىن ءبىرىڭعاي e-lab پلاتفورماسىن قۇرۋ وتە ماڭىزدى. سونىمەن قاتار، قازاقستاندىق عالىمداردىڭ عىلىمي جۋرنالدارى مەن مونوگرافيالارىن باسىپ شىعارۋ بويىنشا ارنايى گرانتتار ءبولۋدى جاڭا زاڭ جوباسىندا قاراستىرىپ جاتىرمىز. بۇدان بولەك، مەديتسينا عىلىمىنىڭ ەرەكشەلىگىن ەسكەرە وتىرىپ، مەديتسينالىق عىلىمي زەرتتەۋ ينستيتۋتتارىنىڭ بازاسىندا مەديتسينالىق جوعارى وقۋ ورىندارىمەن تىعىز كوللابوراتسيا جاساۋ ارقىلى ديسسەرتاتسيالىق كەڭەس اشقان ءجون دەپ سانايمىز»، - دەدى دەپۋتات.