ۇيالى تەلەفونىمىز تىڭدالا ما؟

استانا. قازاقپارات - ءبىرىنشى رەت - كەزدەيسوقتىق، ەكىنشى رەت - سايكەستىك، ءۇشىنشى رەت - زاڭدىلىق.

بۇل تىڭدالاتىن سمارتفوندارعا قاتىستى ايتىلعانداي. سىزگە مىناداي جاعداي تانىس شىعار: ءبىر نارسە جايلى ايتتىڭىز، ال كەلەسى كۇنى ول كوز الدىڭىزدان عالامتورداعى جارناما تۇرىندە شىعا بەرەدى. ونىڭ سەبەبى نەدە؟ ءسىز وعان ۇقساس ءسوزدى عالامتوردان ىزدەگەن جوقسىز، بار بولعانى بىرنەشە رەت اۋىزشا ايتتىڭىز. وعان كىنالى سمارتفونىڭىز با؟

وسى ورايدا، Massaget.kz ءتىلشىسى پروگرامميست قاسىم جومارتتىڭ پىكىرىن الدى.

مامان ۇيالى تەلەفون تىڭدالاتىنىن راستايتىن كوپتەگەن جاعدايلار بولعانىن ايتىپ، مىسالدارمەن ءتۇسىندىردى.

«نەگىزى ۇيالى تەلەفون تىڭدالاتىنى ناقتى ەمەس، ءبىراق ونى راستايتىن كوپ جاعدايلار بولعان. مىسالى، فەيسبۋك پەن ينستاگرامدا ستوريسكە ۆيدەو سالگان كەزدە فەيسبۋك تانيتىن (راسپوزنانيە) ميكروفونمەن، قولدانۋشىنىڭ ەشقانداي رۇقساتىنسىز ستوريستاعى دىبىستى ميكروفونمەن تىڭداپ، اتىن شىعارىپ قوياتىن. سول كەزدە فەيسبۋكتە 24/7 ميكروفون قوسۋلى تۇرادى دەپ شۋ شىققان بولاتىن.

سول سەكىلدى مۇنداي جاعداي apple دە بولدى. ياعني، iPhone-دا تەلەفون بۇعاتتالىپ تۇرسا دا، «Siry» دەپ ايتقان كەزدە تەلەفوندا «داۋىستىق كومەك» قوسىلىپ كەتەتىن بولعان. بۇل دا ۇنەمى ميكروفون قوسىلۋلى تۇرادى دەگەنگە كەلەدى. مۇنداي جاعدايلار باسقا دا مەسسەندجەرلەردە كەزدەسكەن»، - دەدى قاسىم جومارت.

سونىمەن قاتار، مامان الەۋمەتتىك جەلىلەردە قولدانۋ كەزىندە اباي بولۋعا شاقىردى.

«بىزدە ءومىردىڭ ءار سالاسىنا ارنالعان جەكە قوسىمشالار دا بار: سپورت، ۆيدەو، مۋزىكا، ءبىلىم، ساياحات، دۇكەندەر. الايدا، تەحنولوگيانىڭ وركەندەۋىمەن جانە كومپيۋتەرلەردىڭ قۋاتتى ءارى قولجەتىمدى بولۋىنا بايلانىستى جوعارىدا اتالعان قىزمەتتەر ءبىر شەتىنەن وزىمىزگە قاۋىپتى بولۋى دا مۇمكىن. مىسالى، الەۋمەتتىك جەلىلەر ءاربىر قولدانۋشىعا جەكە-جەكە اناليز جاسايدى: بىزگە قانداي فوتو-ۆيدەولار ۇنايدى، ءبىز نەگە قىزىعامىز، قانداي پوستتاردى وقيمىز، كىممەن كوپ سويلەسەمىز جانە ت. ب. بۇل مالىمەتتەر سونىمەن قاتار ءبىزدىڭ وزىمىزگە جەكە جارناما كورسەتۋگە قولدانىلادى. Google تۋرالى ايتپاسا دا بەلگىلى، ءبىز نە ىستەيمىز، قانداي پروبلەمالارىمىز بار، قانداي ماقالالاردى كوپ وقيمىز، وسىنىڭ ءبارىن YouTube-پەن بىرگە تولىعىراق اناليز جاسايدى»، - دەدى مامان.

ءبىزدىڭ كوپتەگەن ءىس-ارەكەتتەرىمىزدى ستاتيستيكالىق مالىمەتتەر ارقىلى دا بولجاۋعا بولادى، ولار ءبىزدىڭ كۇشتى جانە ءالسىز جاقتارىمىزدى بىلگەندە ءوز پايداسىنا قولدانا الادى، مىسالى، ءبىزدى ءبىر نارسەگە كەلىستىرۋ نەمەسە مانيپۋلياتسيالاۋ، بىزگە بىردەڭە ساتۋ ت. س. س. ارينە، بۇل تەحنولوگيالاردىڭ كوپتەگەن ارتىقشىلىقتارى بار، ءبىراق كەمشىلىكتەرى دە جوق ەمەس. كەيبىر جاعدايلاردا، ءبىز بەلگىلى ءبىر قىزمەتتەردى پايدالانۋدا اباي بولۋىمىز كەرەك دەپ ويلايمىن»، - دەپ كەڭەس بەردى پروگرامميست.

قالاي قورعانۋ كەرەك؟

ءسىزدىڭ ۇيالى تەلەفونىڭىز تىڭدالۋى ابدەن مۇمكىن. ەگەر ءسىز زاڭگەر، جۋرناليست بولساڭىز نەمەسە ءوزىڭىزدىڭ جەكە مالىمەتتەرىڭىزدى ساقتاعىڭىز كەلسە، تومەندەگى ۇسىنىستارعا ءمان بەرىڭىز.

ميكروفونعا رۇقساتتى الىپ تاستاڭىز

iPhone-دا: «باپتاۋ»- دى (ناسترويكي) اشىپ، «قۇپيالىلىق»- تى (كونفيدەنتسيالنوست) تاڭداڭىز. ونىڭ ىشىنەن «ميكروفون» دەگەندى باسىپ، تىزىمدەگى كەي نەمەسە بارلىق قوسىمشاعا رۇقساتتى الىپ تاستاڭىز.

Android-تا: «باپتاۋ»- دى (ناسترويكي) اشىپ، «قوسىمشا» (پريلوجەنيا) پۋنكتىن تاڭداڭىز. سودان سوڭ «قوسىمشالار قۇقىقتارى» (پراۆا پريلوجەني) مازىرىنەن ميكروفونعا رۇقساتتى الىپ تاستاڭىز.

داۋىستىق كومەكشىلەردى ءسوندىرىپ تاستاڭىز

siri.» باپتاۋ»- دى (ناسترويكي) اشىپ، «نەگىزگى» (وسنوۆنىە) ءبولىمىن تاڭداپ، «شەكتەۋلەر» پۋنكتىن (وگرانيچەنيا) تاڭداڭىز. بۇل جەردەن Siri- ءدى ءسوندىرىڭىز.

Google-اسسيستەنت. داۋىستىق كومەكشىنىڭ قوسىمشاسىن اشىڭىز، «باپتاۋ»- دى (ناسترويكي) اشىپ، «تەلەفون» بولىمىنە ءوتىپ، Google-اسسيستەنتتى بەلسەندى ەمەس جاعدايعا اۋىستىرىپ قويىڭىز.

اليسا. ياندەكس قوسىمشاسىنداعى «باپتاۋ»- دى (ناسترويكي) اشىپ، «داۋىستىق كومەكشى» (گولوسوۆوي پوموشنيك) بولىمىنە ءوتىپ، «داۋىستى ىسكە قوسۋ» (گولوسوۆايا اكتيۆاتسيا) باتىرماسىن ءوشىرىپ قويىڭىز.

ۆەبكامەرانى جاۋىپ قويىڭىز

ونى جاپسىرمامەن جاۋىپ قويۋعا بولادى.

ەكرانداۋشى قۇرىلعى پايدالانىڭىز

ەكرانداۋشى قۇرىلعىلار فيزيكالىق تۇرعىدا راديوبايلانىستى بۇعاتتاپ، مالىمەتتەردى سىمسىز تاسىمالداۋدى مۇمكىن ەمەس ەتەدى. وعان داۋىستىق جازبالار دا جاتادى. بۇرىن مۇنداي قۇرىلعىلار كەي ماماندىقتار دا عانا قولدانىلاتىن. ءبىراق قازىر ولاردى قارپايىم قولدانۋشىلار دا پايدالانا الادى. مىسالى: ەكرانداۋشى قاپتار مەن كاپسۋلالار.

ايتىلعان سوزگە سايكەس جارنامانىڭ شىعۋى كەزدەيسوقتىق بولۋى مۇمكىن بە؟

الايدا كەزدەيسوقتىق جايلى دا ۇمىتپاۋ كەرەك. جاقىندا ايتقان مونشا جايلى اڭگىمەڭىزدەن سوڭ عالامتوردان مونشا جايلى جارناما شىقسا، ءسىز بىردەن تەلەفونىڭىز تىڭدالادى دەپ ويلاۋىڭىز مۇمكىن. الايدا مونشا جايلى اڭگىمە ايتقان ادامداردىڭ بارىنە بىردەي مۇنداي جارناما شىعا بەرمەيدى. سمارتفون ءسىزدىڭ اڭگىمەڭىزدى جازىپ، ودان سوڭ ونى شيفرىن اشىپ وقىپ، اناليز جاساۋ مۇمكىندىگى از. سەبەبى ادام جانە ونىڭ قالاۋلارى جايلى مالىمەتتى الۋدىڭ باسقا دا كوپتەگەن جولدارى بار. مىسالى، ىزدەۋ، پىكىر قالدىرۋ، الەۋمەتتىك جەلىدەگى دوستار، سىلتەمەلەردەن ءوتۋ، توپتار مەن پاراقشالارعا جازىلۋ - مۇنىڭ بارلىعى ۇلكەن ساندىق پورترەتكە جيناقتالادى.

ادامداردىڭ كوپشىلىگى گادجەتتەرمەن اۋەستەنەتىنى سونشالىقتى، ءتىپتى، ۆيرتۋالدى مەن شىنايى الەمنىڭ اراسىنان تەپە-تەڭدىكتى ارەڭ تابادى.