الماتىدا زاڭسىز سالىنىپ جاتقان تاعى ءبىر تۇرعىن ءۇي كەشەنى انىقتالدى

الماتى. قازاقپارات - الماتىدا زاڭسىز سالىنىپ جاتقان تاعى ءبىر تۇرعىن ءۇي كەشەنى انىقتالدى، دەپ حابارلايدى قازاقپارات ءتىلشىسى.

الماتى قالالىق قۇرىلىس باقىلاۋ باسقارماسىنىڭ اقپاراتىنا سايكەس، قازىرگى ۋاقىتتا وبسەرۆاتوريا كوشەسى، 104/4 مەكەنجايىندا ورنالاسقان «مەچتا» تاۋنحاۋسى بويىنشا سوت تالقىلاۋلارى ءجۇرىپ جاتىر.

جوسپاردان تىس تەكسەرۋ بارىسىندا الماتى قالا قۇرىلىسىن باقىلاۋ باسقارماسى تۇرعىن ءۇي كەشەنىنىڭ 1-نۇكتەسىنەن كەلىسىلگەن ەسكيزدىك جوبادان اۋىتقۋ بولعانىن تىركەدى. سونداي-اق 2-نۇكتەدە رۇقسات قۇجاتتاماسى بولماعانىن انىقتادى. بۇگىنگى تاڭدا 1- نۇكتەنى مەنشىك يەسى ءوز بەتىنشە پايدالانۋعا بەرگەن.

«بىلتىر 14- قازاننان باستاپ تاپسىرىس بەرۋشى ا ق ب ت ك- ءنىڭ 462-بابى بويىنشا نۇسقامانى ورىنداماعانى ءۇشىن (مەملەكەتتىك باقىلاۋ جانە قاداعالاۋ ورگاندارى (لاۋازىمدى ادامدار)، مەملەكەتتىك ورگانداردىڭ لاۋازىمدى ادامدارى ءوز قۇزىرەتى شەگىندە بەرگەن زاڭدى تالاپتاردى نەمەسە نۇسقامالاردى، ۇسىنىمداردى، قاۋلىلاردى ورىنداماعانى نەمەسە تيىسىنشە ورىنداماعانى ءۇشىن) جاۋاپقا تارتىلدى»، - دەپ اتاپ ءوتتى الماتى قالاسى اكىمدىگىنىڭ باسپا ءسوز قىزمەتىنەن.

باسقارما نىساندى پايدالانۋعا قابىلداۋ جانە بۇزۋ اكتىسىنىڭ كۇشىن جويۋ تۋرالى سوتقا تالاپ-ارىز جولدادى، سوت تالقىلاۋلارى ءجۇرىپ جاتىر.

«سوندىقتان، قالا تۇرعىندارىنا جوعارىدا اتالعان مەكەنجاي بويىنشا تۇرعىن ءۇي كەشەنىنەن جىلجىمايتىن مۇلىك ساتىپ الۋدان باس تارتقان ءجون.

جىلجىمايتىن مۇلىكتى ساتىپ الماس بۇرىن سالىنىپ جاتقان تۇرعىن ءۇي كەشەنى تۋرالى قالا قۇرىلىسىن باقىلاۋ باسقارماسىنىڭ 77058966000+ WhatsApp جەدەل جەلىسى ءنومىرى بويىنشا حابارلاسىپ، الدىن الا قۇجاتتاردىڭ تولىق پاكەتىن تەكسەرىپ الۋدى ەسكەرتەمىز»، - دەلىنگەن حابارلامادا.

بۇعان دەيىن الماتىدا بىرنەشە تۇرعىن ءۇي كەشەنىندە پاتەرلەر ساتىلىمعا زاڭسىز شىعارىلعانى تۋرالى جازعان ەدىك.