قازاقستاندا عىلىمدى قارجىلاندىرۋ بىرنەشە ەسەگە ارتتى - ساياسات نۇربەك
بۇل تۋرالى ماجىلىستە عىلىمدى دامىتۋ تاقىرىبىنداعى ۇكىمەت ساعاتىندا عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ سايلاۋالدى باعدارلاماسىندا بەرگەن تاپسىرماسىنا سايكەس عىلىمدى قارجىلاندىرۋدى كەزەڭ- كەزەڭىمەن ۇلعايتۋ بويىنشا ماقساتتى جۇمىستار ەسكەرىلگەن. عىلىمدى قارجىلاندىرۋ كەيىنگى ءۇش جىلدا 3 ەسەگە ارتتى. بۇل قارقىن 2021 -جىلدان باستالدى جانە ونى جالعاستىرىپ كەلەمىز. 2020 -جىلى 80,2 ميلليارد تەڭگە بولسا، بيىل 172,8 ميلليارد تەڭگە قاراستىرىلدى»، - دەدى س. نۇربەك.
ونىڭ ايتۋىنشا، عىلىم سالاسىنا 2024 -جىلى 247 ميلليارد تەڭگە، 2025 -جىلى 243 ميلليارد تەڭگە بولىنەدى.
«سوندىقتان، وسى قارقىنمەن جالپى ىشكى ونىمگە شاققانداعى عىلىمدى قارجىلاندىرۋ ۇلەسىن كوتەرەمىز. بۇل باعىتتا مەملەكەت باسشىسى، ۇكىمەت جاعىنان ناقتى قولداۋ بار» ، - دەدى مينيستر.
بۇدان بولەك، ول عىلىمي جوبالاردى كوممەرتسيالاندىرۋ قارجىسى 4 ەسەگە وسكەنىن ايتتى. وسى رەتتە 2021 -جىلى 5,4 ميلليارد تەڭگە بولسا، 2023 -جىلى 17,1 ميلليارد تەڭگەگە جەتتى. ال، 2024 -جىلى بۇل كورسەتكىش 25 ميلليارد تەڭگە بولادى دەپ جوسپارلانىپ وتىر.
«قولدانبالى عىلىمي زەرتتەۋلەردى قارجىلاندىرۋ 1,6 ەسەگە ءوستى. 2021 -جىلى 12,8 ميلليارد تەڭگە بولسا، 2022 -جىلى - 19,5 ميلليارد تەڭگە، 2023 -جىلى 20,8 ميلليارد تەڭگەگە جەتتى»، - دەدى ۆەدومستۆو باسشىسى.
بۇدان بۇرىن حابارلانعانداي، قازىرگى كەزدە ەلىمىزدە 22 456 عىلىمي كادر بار.
زەرتتەۋشىلەردىڭ 37 پايىزى (2022 -جىلى - %35) عىلىمي جانە اكادەميالىق دارەجەگە يە. سونداي- اق، زەرتتەۋشىلەردىڭ 34 پايىزى - 35 جاسقا دەيىنگى جاس عالىمدار، 43 پايىزى - 35-54 جاستاعىلار، 23 پايىزى 55 جاستان اسقاندار عالىمدار.
