فرانسيانىڭ ەكس- پرەزيدەنتى نيكوليا ساركوزي اپپەلياتسيا سوتىندا جەڭىلىپ قالدى
ول جەمقورلىق جاساعانى جانە سۋديالاردى ساتىپ الماق بولعانى ءۇشىن ايىپتالعان بولاتىن، دەپ حابارلايدى قازاقپارات BBC- گە سىلتەمە جاساپ.
ول وسىدان ەكى جىل بۇرىن 3 جىلعا سوتتالدى، الايدا ونىڭ ەكى جىلىن شارتتى تۇردە وتەيدى.
پاريج اپەللياتسيالىق سوتى ساركوزيدى تۇرمەدە وتىرماي، ءبىر جىل ءۇي قاماۋىندا وتكىزۋگە ۇكىم شىعاردى. سونداي- اق، ونىڭ قايدا جۇرگەنى ەلەكتروندىق براسلەتپەن قاداعالانادى.
2021 -جىلدىڭ 1-ناۋرىزىندا سوت ساركوزيدى 2014 -جىلى تىڭ تىڭداۋ ءىسى بويىنشا ءۇش جىلعا سوتتاۋعا ۇكىم شىعاردى.
ول كەزدە ساركوزي مەن ونىڭ ادۆوكاتى تەرري ەرزوگ پروكۋرور جيلبەر ازيبەردەن تاعى ءبىر ءىستىڭ تەرگەۋى بويىنشا اقپاراتتى زاڭسىز جولمەن الماق بولعانى ءۇشىن كىنالى دەپ تانىلعان ەدى.
ول ءىس - 2007 -جىلعى پرەزيدەنتتىك ناۋقاندى L'Oreal نەگىزىن قالاۋشىسىنىڭ قىزى ليليان بەتتانكۋردىڭ زاڭسىز قارجىلاندىرۋى.
تەرگەۋ مالىمەتتەرى بويىنشا، ساركوزي مەن ەرزوگ اقپارات الۋ ءۇشىن موناكودا لاۋازىمدى قىزمەتكە ۋادە ەتىپ، ونى ورىنداماعان.
پروكۋراتۋرادا بۇل ەپيزودتى سىبايلاس جەمقورلىقتىڭ كورىنىسى رەتىندە قاراستىردى.
ساركوزيدىڭ ادۆوكاتتارى شەشىمگە شاعىمداندى، ال بۇل ءىستى سوت قاراپ جاتقاندا بۇرىنعى پرەزيدەنت بوستاندىقتا ءجۇردى.
67 جاستاعى ساركوزي فرانسيانىڭ تۇرمەگە جابىلعان العاشقى بۇرىنعى پرەزيدەنتى بولدى. نيكوليا ساركوزي 2007 -جىلدان باستاپ ءبىر رەت بەس جىلدىق مەرزىمگە پرەزيدەنت بولىپ سايلاندى.
ول يمميگراتسياعا قارسى قاتاڭ ساياسات جۇرگىزدى جانە الەمدىك قارجى داعدارىسىنان قاتتى زارداپ شەككەن فرانسيا ەكونوميكاسىن رەفورمالاۋعا تىرىستى.
