مەملەكەتتىك قىزمەتكە قابىلدانار الدىندا تاپسىراتىن تەست سۇراقتارى قىسقارادى

استانا. قازاقپارات - مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ الداعى ۋاقىتتا مەملەكەتتىك قىزمەت سالاسىندا قانداي وزگەرىستەر بولۋى مۇمكىن ەكەنىن ءمالىم ەتتى، دەپ حابارلايدى قازاقپارات ءتىلشىسى.

«كانديدات مەملەكەتتىك قىزمەتكە ورنالاسۋ ءۇشىن تەست تاپسىرادى. بۇرىن بارلىعى «تەست قيىن، سۇراقتارى اۋىر» دەپ ايتاتىن. ءبىز قازىرگى تاڭدا تەستىلەۋدىڭ سۇراقتارىن قىسقارتىپ جاتىرمىز. مىسالى، قازىر ەمتيحاندى 9 زاڭ جوباسىنان تاپسىرۋ كەرەك بولسا، الداعى ۋاقىتتا ونىڭ سانىن 4 كە دەيىن قىسقارتساق دەپ وتىرمىز. ونىڭ ورنىنا ءبىز ادامي قاسيەتتەر، قابىلەت پەن قۇندىلىقتاردى انىقتاۋ سياقتى تەتىكتەردى ەنگىزەمىز»، - دەپ جوسپارلارىمەن ءبولىستى اگەنتتىك ءتوراعاسى.

دارحان جازىقبايەۆتىڭ ايتۋىنشا، بيىل ناۋرىز ايىنان باستاپ 5 مەملەكەتتىك ورگانعا قىزمەتكەرلەردى قابىلداۋ ونلاين جۇرگىزىلىپ جاتىر. وسى ارالىقتا 1 ادام جۇمىسقا ونلاين پروتسەدۋرالار ارقىلى قابىلدانعان.