قازاقستاندا ەلەكتر ەنەرگياسىنا تاپشىلىق ارتۋى مۇمكىن
بۇل تۋرالى ەلورداداعى ەنەرگەتيكالىق قاۋىپسىزدىك تاقىرىبىنداعى كونفەرەنتسيادا «سامۇرىق-ەنەرگو» ا ق گەنەراتسيا دەپارتامەنتىنىڭ ديرەكتورى عالىمبەك اۋتاليپوۆ ايتتى، دەپ حابارلايدى قازاقپارات ءتىلشىسى.
«كەيىنگى بەس جىلدا ەلىمىزدە ەلەكتر ەنەرگياسىنا دەگەن سۇرانىس 9,4 پايىزعا ءوستى. سونىمەن قاتار، قولدانىستاعى ەنەرگيا ءوندىرۋشى قۋاتتار ءوسىپ كەلە جاتقان سۇرانىستى جابا المايدى. مينيسترلىك بەكىتكەن بولجامدى بالانسقا سايكەس، 2023-جىلعا قاراي قۋات تاپشىلىعى شامامەن 1,4 گيگاۆاتت، ال 2029-جىلعا قاراي شامامەن 3 گيگاۆاتت بولۋى مۇمكىن. وسىعان بايلانىستى ق ر ۇكىمەتى مەن «سۇرىق-قازىنا» قورى جاڭا ەنەرگيا قۋاتىن ەنگىزۋدى تاپسىردى. اتاپ ايتقاندا، «سامۇرىق-ەنەرگو» ەكىباستۇز گرەس-2 بلوكتارىنىڭ قۇرىلىسىن ىسكە اسىرۋدى جانە جالعاستىرۋدى جوسپارلاپ وتىر»، - دەدى ع. اۋتاليپوۆ.
سونىمەن قاتار ول الماتىداعى جىلۋ ەلەكتر ورتالىقتارىن كۇشەيتۋ قاراستىرىلعانىن ايتتى.
«جالپى، وسى باعىتتاعى قادامدار 2029-جىلعا قاراي 4 گيگاۆاتت دەڭگەيىندەگى ەنەرگيانى ىسكە قوسۋعا مۇمكىندىك بەرەدى. بۇدان بولەك، ءبىز جاڭارتىلاتىن ەنەرگيا كوزدەرىن ەنگىزىپ جاتىرمىز. بۇرىنعى ەنەرگيا رەسۋرستارى قاتارىنداعى كومىر جانە گاز ستانتسيالارى بار. حالىقارالىق دەڭگەيدە كومىرقىشقىل گازىن ازايتۋ ماقساتى قويىلعانىن ەسكەرە وتىرىپ، 2022-جىلى «سامۇرىق-ەنەرگو» ءتيىستى باعدارلامانى بەكىتتى»، - دەدى كومپانيا وكىلى.
بۇدان بۇرىن حابارلانعانداي، بريتاندىق NNWI ورتالىعىنىڭ پرەزيدەنتى تيم يەو ورتالىق ازيانىڭ ەنەرگەتيكا ساياساتىندا ەلەۋلى وزگەرىس بولۋى مۇمكىن ەكەنىن ايتتى.
