ءىلبىس جانە كوكا-كولا: مۋرال اۆتورلارى الماتىلىقتاردىڭ نارازىلىعىنا قاتىستى پىكىر ءبىلدىردى

الماتى. قازاقپارات - ابىلاي حان كوشەسىندەگى ۇيلەردىڭ ءبىرىنىڭ قاسبەتىندە بەينەلەنگەن ءىلبىس (قار بارىسى) سۋرەتى قالپىنا كەلتىرىلەتىن بولدى. بۇل تۋرالى سۋرەت اۆتورلارى ءمالىم ەتتى، دەپ حابارلايدى قازاقپارات ءتىلشىسى.

جىبەك جولى مەن ابىلاي حان كوشەسىنىڭ قيىلىسىندا ورنالاسقان ءۇيدىڭ قابىرعاسىندا بەينەلەنگەن ءىلبىس سۋرەتى 2017 -جىلى پايدا بولدى. مۋرالدى «بالالار الەمدى بەينەلەيدى» قوعامدىق قورى مەن المالى اۋدانى اكىمدىگىنىڭ قولداۋىمەن جەرگىلىكتى سۋرەتشىلەر شامان مەن نەون سالعان.

«بۇل - سىرلاپ نەمەسە ارنايى قۇرىلىس ماتەريالىمەن جاۋىپ تاستاعان 4-شى نەمەسە 5-شى قابىرعا سۋرەتى. ماعان ەشكىم حابارلاسقان جوق. رۇقسات تا، كەشىرىم دە سۇرامادى. مەن بۇل تۋرالى الەۋمەتتىك جەلىلەردەن ءبىلدىم. ءبىز ءىلبىستىڭ سۋرەتىن Mural fest حالىقارالىق فەستيۆالى اياسىندا سالدىرتىپ ەدىك. بۇل قالا كۇنىنە جاسالعان سىيلىق بولاتىن. ونىڭ ۇستىنە، قار بارىسى - الماتىنىڭ سيمۆولى»، - دەيدى «بالالار الەمدى بەينەلەيدى» قوعامدىق قورىنىڭ ديرەكتورى، Mural Fest حالىقارالىق فەستيۆالىنىڭ كۋراتورى ءمولدىر بەكجان.

ونىڭ ايتۋىنشا، 5 جىل ىشىندە فەستيۆال اياسىندا شەتەلدىك جانە قازاقستاندىق سۋرەتشىلەر قالادا 50 گە جۋىق عيماراتتى بەزەندىردى. ولار بىلتىر ءبىر قابىرعاعا ورتاشا ەسەپپەن 3 ميلليون تەڭگەگە جۋىق قارجى جۇمساعان. جوبانى قالالىق مادەنيەت باسقارماسى قارجىلاندىردى.

«فەستيۆال اياسىندا اكىمدىكپەن تىعىز جۇمىس ىستەيمىز. الدىمەن، سۋرەتشىلەر ەسكيزدەرىن كورسەتەدى، سوسىن باسقارمادا بەكىتەمىز. ورىندى الدىن الا بەلگىلەيمىز. فەستيۆال باستالار الدىندا قالانى ارالايمىز، جەرلەردى سۋرەتكە تۇسىرەمىز. اشىق جانە ادام كوپ جينالاتىن جەرلەردى تاڭدايمىز. بارىستىڭ قالا قوناقتارى مەن تۇرعىندارى كوپ جۇرەتىن اربات ايماعىندا ورنالاسقانىنا قۋاندىق»، - دەيدى ول.

ال، سۋرەتشىلەر شامان مەن نەون ءۇشىن بۇل سۋرەت العاشقى ۇلكەن جوبا بولعان.

«ءۇي قابىرعاسىنداعى مۋرال العاشقى جوبامىز بولدى. ءبىز ءوز باعىتىمىزدى بىرىكتىرىپ، تۇرعىندارعا ۇنايتىنداي ەتىپ جاسادىق. سۋرەتتى ءبىر اپتاعا جۋىق سالدىق. ايتپاقشى، بۇل - ءبىزدىڭ الماتىداعى سوڭعى ارت- نىسان»، - دەدى شامان.

ونىڭ ايتۋىنشا، جۋىردا Coca-Cola كومپانياسى جوبا اۆتورلارىمەن جانە ءۇي تۇرعىندارىمەن كەزدەسۋ ۇيىمداستىرعان.

«جاقىندا ءبىز وسى ءۇيدىڭ تۇرعىندارىمەن، Coca-Cola كومپانياسى وكىلدەرىمەن كەزدەسۋ وتكىزىپ، جوبانى تالقىلادىق. ەندى جارناما كومپانياسى قاجەتتى قۇجاتتاردى دايىنداپ، كەيىن اكىمدىكتەن رۇقسات الادى. سوسىن جۇمىسقا كىرىسەمىز. بۇل - ءبىزدىڭ جوبامىز، ەسكيزدەر ساقتاۋلى، قابىرعا سۋرەتىن قالپىنا كەلتىرەمىز، ءبارى بۇرىنعىداي بولادى. جارنامانى بوياپ، بارىستى كەرى قايتارامىز»، - دەيدى شامان.

ەكىنشى سۋرەتشى، مۋرال اۆتورلارىنىڭ ءبىرى نەون دا كومپانيا قاتەلەك جىبەردى دەپ ەسەپتەيدى.

«ارينە، بۇل جاڭالىق ءبىزدى ازداپ تاڭقالدىردى. ولاي جاساۋعا بولمايدى. بۇل فەستيۆال اياسىنداعى العاشقى ۇلكەن جۇمىسىمىز بولعان ەدى»، - دەدى ول.

بۇعان دەيىن الماتى اكىمدىگى تۇرعىن ۇيلەردىڭ بىرىنە سالىنعان ءىلبىس مۋرالىنىڭ نەگە اۋىستىرىلعانىن تۇسىندىرگەن ەدى.

كەيىن «Coca-Cola قازاقستان» كومپانياسى تۇرعىنداردان كەشىرىم سۇراپ، مۋرال قايتا قالپىنا كەلتىرىلەتىنىن ايتتى.