تۇرعىندار «اۋىل اماناتى» باعدارلاماسى تۋرالى ءالى بىلمەيدى - سەرىك شاپكەنوۆ
سول سەبەپتەن، باعدارلامانى ىسكە اسىرۋعا سالعىرت قاراعان باسشىلارعا تارتىپتىك جازا قولدانىلدى، دەپ حابارلايدى قازاقپارات ءتىلشىسى.
بۇگىن وبلىس اكىمى سەرىك شاپكەنوۆتىڭ توراعالىعىمەن «اۋىل اماناتى» باعدارلاماسىن جۇزەگە اسىرۋعا بايلانىستى جيىن ءوتتى.
«بۇل جوبامەن جەكە جانە قوسالقى شارۋاشىلىقتار %2,5 بەن 8,6 ميلليون تەڭگەگە دەيىن نەسيە الادى. ال اۋىلشارۋاشىلىق كووپەراتيۆتەرىن قۇرۋ جانە قاجەتتى ينفراقۇرىلىممەن قامتاماسىز ەتۋ ءۇشىن 27,6 ميلليون تەڭگە نەسيە بەرىلەدى. نەسيە بەرۋ ارقىلى تۇرعىنداردىڭ تابىسىن ارتتىرۋ كوزدەلگەن. قازىر 54 اۋىلعا سكرينينگ جۇرگىزىلدى. ناتيجەسىندە 433 ادام 3 ميلليارد 103 ميلليون تەڭگەنىڭ نەسيەسىن الۋعا نيەت ءبىلدىرىپ وتىر. بيىل 1 ميلليارد 504 ميلليون تەڭگە ءبولىنىپ، وعان 188 نەسيە بەرۋ جوسپاردا بار»، - دەدى وبلىستىق اۋىل شارۋاشىلىعى باسقارماسىنىڭ باسشىسى سالاۋات وتەعۇلوۆ.
اكىمنىڭ پىكىرىنشە، «اۋىل اماناتى» جوباسىن جۇزەگە اسىرۋ جۇمىستارى ناشار ءجۇرىپ جاتىر. سول سەبەپتەن، جوبانى ىسكە اسىرۋعا سالعىرتتىق تانىتقان وبلىستىق اۋىل شارۋاشىلىعى باسقارماسىنىڭ باسشىسى سالاۋات وتەعۇلوۆ پەن «اتىراۋ» الەۋمەتتىك كاسىپكەرلەر كورپوراتسياسى» ا ق ءتوراعاسى دانيار تاحانوۆقا قاتىستى تارتىپتىك جازا قولدانىلعان.
«سىزدەردىڭ باياندامالارىڭىزدان «اۋىل اماناتى» باعدارلاماسى بويىنشا اتقارىلىپ جاتقان ءىستىڭ جوقتىعىن كورىپ وتىرمىن. ءبىر جارىم اي بۇرىن بۇل جوبانى قولعا الۋ تاپسىرىلدى. جۇمىس مامىر ايىندا باستالاتىنىن ايتتىڭىزدار. الايدا، ءالى جۇمىس جوق. بۇل جەردە بولىنگەن اقشانى ۇلەستىرىپ بەرۋ ەمەس، باعدارلامانىڭ ورىندالۋى ماڭىزدى. نەگىزگى ماقسات - كووپەراتيۆتەردى دامىتۋ. نيەت ەتكەن ادام مالىن باعىپ، تاپقان ءونىمىن ەش كەدەرگىسىز ساتاتىن جاعدايعا جەتۋى ءتيىس. سىزدەردى باسقا وڭىرلەرگە تاجىريبە الماسۋعا جىبەردىك. ءبىراق، بۇدان قورىتىندى شىعارا المادىڭىزدار. تۇرعىندار «اۋىل اماناتى» جوباسىنىڭ بار ەكەنىن ءالى كۇنگە دەيىن بىلمەيدى»، - دەدى سەرىك شاپكەنوۆ.
ەسكە سالا كەتەلىك، بۇعان دەيىن اتىراۋ وبلىسىندا «اۋىل اماناتى» جوباسىن قارجىلاندىرۋعا 1,5 ميلليارد تەڭگە بولىنگەنىن جازعان ەدىك.
