07:56, 17 - مامىر 2023 | GMT +5
تالدىقورعاندا ستۋدەنتتەردى قارىزعا باتىردى دەگەن ايىپپەن جاتاقحانا كومەندانتى سوتتالىپ جاتىر
تالدىقورعان. قازاقپارات - تالدىقورعاندا ستۋدەنتتەردى 24 ميلليون تەڭگەدەن اسا قارىزعا باتىردى دەگەن ايىپپەن جاتاقحانا كومەندانتى سوتتالىپ جاتىر، دەپ حابارلايدى قازاقپارات ءتىلشىسى.
ءمالىم ەتىلگەندەي، 42 جاستاعى ايىپتالۋشى ستۋدەنتتەرگە زاتتاي دا، اقشالاي دا نەسيە الدىرتقان. ءىس بويىنشا 16 ادام قارىزعا بەلشەسىنەن باتقان. ولارعا ءوز اتتارىنا قىمبات ۇيالى تەلەفوندار، ميكروقارجى ۇيىمدارىنان اقشا راسىمدەتكىزگەن. جابىرلەنۋشىلەر اراسىندا تەك ستۋدەنتتەر عانا ەمەس، جاتاقحانانىڭ ەدەن جۋۋشىسى، سانتەحنيك سىندى قاراپايىم جۇمىسشىلارى دا بار.
سوتتالۋشى تالدىقورعانداعى ءىلياس جانسۇگىروۆ اتىنداعى جەتىسۋ ۋنيۆەرسيتەتىنىڭ جاتاقحاناسىندا جۇمىس ىستەگەن. وعان «الاياقتىق» بابى بويىنشا ايىپ تاعىلىپ وتىر. كەشە العاشقى پروتسەسس تالدىقورعان سوتىندا باستالدى. پروكۋرور ايىپتاۋ اكتىسىن جارتى ساعاتتان اسا وقىدى. سوتقا قاتىسۋشى ستۋدەنتتەر ءتۇسىرىلىم جاساۋعا قارسىلىق ءبىلدىردى.
