پارلامەنتارالىق بايلانىستىڭ ىنتىماقتاستىعىمىزدى نىعايتۋدا ماڭىزى زور - ەرلان قوشانوۆ
ايتا كەتەيىك، 16- مامىردا باكۋدە ازەربايجان رەسپۋبليكاسى ميللي مەدجليسىنىڭ گەيدار اليەۆتىڭ 100 جىلدىعىنا وراي ارنايى وتىرىسى ءوتتى. باس قوسۋعا 30 دان استام ەلدىڭ پارلامەنت وكىلدەرى، پارلامەنتارالىق ۇيىمدار، پارلامەنتارالىق وداق، اراب پارلامەنتى، تۇركپا جانە قارا تەڭىز ەكونوميكالىق ىنتىماقتاستىعى پارلامەنتتىك اسسامبلەياسىنىڭ وكىلدەرى قاتىستى.
جيىندا ءسوز سويلەگەن ەرلان قوشانوۆ وتىرىسقا قاتىسۋشىلارعا جانە بارشا ازەربايجان حالقىنا قازاقستان پرەزيدەنتى قاسىم-جومارت توقايەۆتىڭ جىلى لەبىزىن جەتىكىزدى. سونداي-اق، گەيدار اليەۆتىڭ قازاقستان مەن ازەربايجان اراسىنداعى قارىم-قاتىناستىڭ قالىپتاسۋىنداعى وراسان زور رولىنە نازار اۋداردى.
«قازاقستاندا گەيدار اليەۆ ءبىزدىڭ ەلگە جانە قازاق حالقىنا دەگەن شىنايى باۋىرلاستىق پەيىلىمەن بەلگىلى. ول ەكى ەل اراسىنداعى بەرىك دوستىق قارىم-قاتىناستى دامىتۋعا بار كۇش-جىگەرىن جۇمسادى. گەيدار اليەۆ ءاردايىم قازاق ۇلتى تۋرالى ايرىقشا كوزقاراستا بولىپ، ءتۇپ-تامىرىمىز بەن ورتاق باي رۋحاني مۇرالارىمىز تۋرالى ايتاتىن»، - دەدى ءماجىلىس سپيكەرى.
سونداي-اق، ەرلان قوشانوۆ وسى جىلدىڭ ءساۋىر ايىندا استانا قالاسىندا وتكەن گەيدار اليەۆ اتىنداعى جاڭا كوشەنىڭ سالتاناتتى اشىلۋ ءراسىمى تۋرالى مالىمەت بەردى.
«بۇل ءىس- شاراعا قازاقستان مەن ازەربايجان كوشباسشىلارى قاسىم-جومارت توقايەۆ پەن يلحام اليەۆ قاتىستى. كوشەنىڭ اشىلۋ سالتاناتىندا ءبىزدىڭ پرەزيدەنتىمىز: «گەيدار اليەۆ سەكىلدى الەمدىك دەڭگەيدەگى تۇلعانىڭ اتىن ۇلىقتاۋ - ءبىزدىڭ پارىزىمىز. استانادا ونىڭ ەسىمىمەن اتالعان جاڭا كوشەنىڭ اشىلۋى - ءبىزدىڭ وسى يگى ىسكە قوسقان ماڭىزدى ۇلەسىمىز. ازەربايجان حالقىنىڭ ۇلى پەرزەنتىنە دەگەن زور ءىلتيپاتىمىز ءارى شىنايى قۇرمەتىمىز» دەپ ەرەكشە اتاپ وتكەن بولاتىن»، - دەدى ءماجىلىس ءتوراعاسى.
ەرلان قوشانوۆ پارلامەنتارالىق بايلانىس باۋىرلاس ەلدەرىمىزدىڭ جان-جاقتى ىنتىماقتاستىعىن نىعايتۋدا ماڭىزدى ورىن الاتىنىن ايتتى. ازەربايجاننىڭ ميللي مەدجليسىنىڭ بۇگىنگى ءىس- شاراسى قازىرگى قارىم-قاتىناستارداعى پارلامەنتتىك ديپلوماتيانىڭ ءرولى ەرەكشە ەكەنىن كورسەتەدى.
ودان كەيىن ءماجىلىس ءتوراعاسى ازەربايجان رەسپۋبليكاسى ميللي مەدجليسىنىڭ سپيكەرى ساحيبا گافاروۆامەن كەزدەستى. سپيكەرلەر يلحام الييەۆتىڭ جاقىندا استاناعا رەسمي ساپارى كەزىندە قازاقستان مەن ازەربايجان باسشىلارى قول جەتكىزگەن ۋاعدالاستىقتاردى ىسكە اسىرۋعا ەكى ەل دەپۋتاتتارىنىڭ اتسالىسۋ مۇمكىندىگىن تالقىلادى.
«بۇل وتە جەمىستى دە ماڭىزدى ساپار بولدى. شىنايى دوستار مەن باۋىرلاردىڭ كەزدەسۋى دەۋگە بولادى. ءبىزدىڭ حالىقتارىمىزدى جاقىنداتاتىن ءبىراز ءىس-شارا ءوتتى جانە ءبىرقاتار سالادا ماڭىزدى قۇجاتتارعا قول قويىلدى. ءبىز، ەكى ەلدىڭ پارلامەنتشىلەرى، كوشباسشىلارىمىز قابىلداعان وسى ۇلكەن شەشىمدەردى ىسكە اسىرۋعا بارىنشا ۇلەس قوسۋىمىز كەرەك»، - دەدى ءماجىلىس سپيكەرى.
دەلەگاتسيا قۇرامىنا قازاقستان رەسپۋبليكاسى پارلامەنتى ءماجىلىسى مەن سەناتىنىڭ دەپۋتاتتارى كىردى.
