ورتالىق ازيا - قىتاي فورۋمى وتەتىن شيان قالاسى نەسىمەن ەرەكشە - فوتورەپورتاج
شيان - تاريحى باي، كورىكتى جەرلەرى كوپ قالا. تاريحى ءتىپتى 3 مىڭ جىلعا جەتەدى. بۇل جەردەن باعزى زامان ەسكەرتكىشتەرىن دە، زاماناۋي ساۋلەت نىساندارىن دا كورۋگە بولادى. شيانداعى كونە قىتاي دۋالى ءبۇتىن كۇيىندە ساقتالعان. دايانتا اتىمەن تانىمال بۋدديزم پۇتحاناسى جانە چين شىحۋاڭ يمپەراتوردىڭ تەرراكوت ساربازدار ماۆزولويىنىڭ مۋزەيى دە وسىندا.
چين شىحۋاڭ يمپەراتوردىڭ تەرراكوت ساربازدار ماۆزولەيىنىڭ مۋزەيى.
دۇنيەنىڭ تۇكپىر-تۇكپىرىنەن تۋريست تارتاتىن تاريحي ورىن 1987-جىلى UNESCO- نىڭ دۇنيەجۇزىلىك مۇرالار تىزىمىنە ەنگەن.
بۇگىندە شيان قالاسى - شانشي پروۆينتسياسىنىڭ اكىمشىلىك ورتالىعى، حالقىنىڭ سانى 13 ميلليونعا تاياۋ. مەگاپوليس ماڭىزدى ونەركاسىپ بازاسى بولىپ ەسەپتەلەدى. 2022 -جىلى قالانىڭ جالپى ىشكى ءونىمى 1148,65 ميلليارد يۋان (160811 ميلليارد دوللار) بولعان. بۇل جەردەن قىتاي-ەۋروپا باعىتىنداعى «چاڭان» تەمىرجول ەكسپرەسى جۇرەدى. 2022-جىلى قالانىڭ سىرتقى ساۋدا اينالىمى 447,41 ميلليارد يۋان (62,6 ميلليارد دولار) بولعان.
كونە سان دۋالىنىڭ «يۋننين» قاقپاسى. دۋال 1370-جىلدارى، ميڭ اۋلەتى بيلىكتە بولعان كەزدە سالىنعان. نىساننىڭ ءپىشىنى تۇيىقتالعان تىكتورتبۇرىش كەيپىندە كەسكىندەلگەن. ۇزىندىعى - 12 شاقىرىم، ەنى 15 مەتر بولادى!
شيان قالاسىنداعى كونە دۋالدىڭ شىعىس بۇرىشى.
شيان قالاسىنىڭ ورتالىعىنداعى قوڭىراۋلى مۇنارا. بۇل نىسان دا ميڭ اۋلەتى بيلىكتە تۇرعان كەزدە، 1384 -جىلى سالىنعان. قىتايداعى ەڭ ءبىر جاقسى ساقتالعان قوڭىراۋلى مۇنارالاردىڭ ءبىرى بولىپ ەسەپتەلەدى. ءۇش قاباتتى مۇنارانىڭ بيىكتىگى - 36 مەتر.
دايانتا پۇتحاناسى دا قالاداعى تاريحي ورىنداردىڭ ءبىرى. نىسان 652-جىلى، تاڭ اۋلەتى بيلىكتە بولعان كەزدە بۋدديزمنىڭ كيەلى جازبالارىن ساقتاۋ ءۇشىن سالىنعان. جەتى قاباتتى عيماراتتىڭ بىيكتىگى - 64 مەتر.
حۋەيمينجە كوشەسى دە - تۋريستەر اراسىندا تانىمال ورىننىڭ ءبىرى. مۇنداي قوعامدىق تاماقتانۋ ورىندارىن كوپتەپ كەزدەستىرۋگە بولادى. قىتاي مەگاپوليسىنىڭ مادەني ومىرىنەن سىر شەرتەتىن ساۋدا دۇڭگىرشەكتەرى وتە كوپ.
حۋەيمينجە كوشەسىندە كەشكە قاراي ادام قاراسى مولايا تۇسەدى. سىرلى ساز بەن ءتۇرلى تاعامنىڭ ءيسى تۋريستەردى وزىنە تارتادى. وسىنىڭ ءبارى شىعىس بازارىن ەسكە سالادى.
بۇل كۇندەرى سياندە اپتاپ ىستىق. اۋا تەمپەراتۋراسى 30 گرادۋستى كورسەتىپ تۇر. سوندىقتان، ءومىر كەشكە قاراي قاينايدى.
شياندەگى «شيانيان» حالىقارالىق اۋەجايى - قىتايدىڭ سولتۇستىك- باتىسىنداعى ءىرى اۋە حابى. اۋەجاي 2025-جىلى كەڭەيتىلگەن سوڭ جولاۋشىلار اعىنى 83 ميلليون ادامعا، جۇك اعىنى 1 ميلليون تونناعا جەتپەك.
«ورتالىق ازيا - قىتاي» سامميتىنىڭ باستالۋىنا ساناۋلى كۇن قالدى. قالانىڭ تۋريستەر كوپ باراتىن كورىكتى ورىندارى مەن فورۋم وتەتىن اۋدانىندا شارانىڭ ۇراندارى جازىلعان جارىق ديودتى بەينەروليكتەر مەن باننەرلەر كوزگە ءجيى ۇشىرايدى.
«ورتالىق ازيا - قىتاي» فورۋمىنا كەلەتىن 100 دەن استام ب ا ق وكىلىنە شاقتالعان باسپا ءسوز ورتالىعى وسىلاي بەزەندىرىلگەن.
ەسكە سالساق، «ورتالىق ازيا - قىتاي» فورۋمىن وتكىزۋ باستاماسىن قىتاي تاراپى كوتەرگەن. مۇنداي فورماتتاعى ارىپتەستىكتىڭ باستى ماقساتى - ساياسي-ديپلوماتيالىق ءوزارا ءىس-قيمىلدىڭ تەتىكتەرىن جەتىلدىرىپ، ساۋدا، ينۆەستيتسيا، عىلىم جانە تەحنولوگيا، قورشاعان ورتانى قورعاۋ، مادەنيەت سالاسىنداعى ارىپتەستىك نىعايتۋ.
