تۇركىستان وبلىسىندا ۆولونتەر اۋىل اكىمى بولىپ سايلاندى
جۇينەك اۋىلدىق وكرۋگىندە وتكەن سايلاۋدا داۋىس بەرۋشىلەرگە ەكى كانديدات ۇسىنىلدى. ءبىرى - ءوزىن-ءوزى ۇسىنعان ءازىمحان وماروۆ بولسا، ەكىنشىسى «Amanat» پارتياسىنىڭ اتىنان تۇسكەن تورەباي ابدىكارىموۆ.
سايلاۋشىلاردىڭ باسىم بولىگى ەرىكتى قىزمەتىن اتقارىپ، ەلدىڭ ىستىق ىقىلاسىنا بولەنگەن تورەباي ابدىكارىموۆتى قولداپ داۋىس بەرگەن.
«قۇرامىنا ءۇش ەلدى مەكەن ەنەتىن جۇينەك اۋىلدىق وكرۋگىندە 11 مىڭنان استام تۇرعىن بار. ونىڭ ىشىندە 5 500 ^ى سايلاۋدا داۋىس بەرۋگە قۇقىلى. ءۇش سايلاۋ ۋچاسكەسىندە 23 كوميسسيا مۇشەسى جۇمىس ىستەدى. اۋىل تۇرعىندارى سايلاۋعا بەلسەندى قاتىسىپ، ءوز تاڭداۋلارىن جاسادى. قارسىلاسىمنان 500 گە جۋىق داۋىس ارتىق جينادىم. ەندى الدا ۇلكەن جۇمىستار كۇتىپ تۇر. سايلاۋشىلاردىڭ ماعان ارتقان سەنىمىن اقتاۋ جولىندا بار كۇش-جىگەرىمدى جۇمسايمىن!» - دەيدى ول.
سايلاۋالدى باعدارلاماسىنا سايكەس اۋىل اكىمى كوشەلەر مەن جولداردى كۇتىپ ۇستاۋ، ەلدى مەكەندەردى اباتتاندىرۋ، سانيتارلىق تازالىقتى قامتاماسىز ەتۋ، جاستاردى جۇمىسپەن قامتۋ سەكىلدى جۇمىستاردى اتقارۋدى جوسپارلاپ وتىر.
ايتا كەتسەك، تورەباي ابدىكارىموۆ 2018-جىلدان باستاپ ەرىكتى بولىپ ەڭبەك ەتىپ كەلەدى. «حارەكەت» قايىرىمدىلىق قورىنىڭ تۇركىستان وبلىسىنداعى ءوڭىر باسشىسى قىزمەتىن اتقارعان. ال، 2020-جىلدان باستاپ «Asar» تۇركىستان ەرىكتىلەر توبى قوعامدىق بىرلەستىگىن قۇرىپ، وڭىردەگى كوپتەگەن يگى ىستەردىڭ اتقارىلۋىنا ۇلەس قوستى. ەلدەگى كارانتين تۇسىندا بلوك-بەكەتتەردە ساقتىق شارالارىن قاتاڭ ساقتاۋ بويىنشا تۇسىندىرمە جۇمىستارىن جۇرگىزىپ، تەگىن بەتپەردەلەر تاراتتى. ماقتاارال اۋدانىن سۋ باسقاندا جانە ارىستاعى اپات كەزىندە جاستاردى بىرىكتىردى. قيراعان ۇيلەردى قايتا قالپىنا كەلتىرۋ ىستەرىنە ۇلەس قوستى. تۇركىستان قالاسىندا ورتتەن زارداپ شەككەن وتباسىلارعا ءۇي سالۋ شاراسىن ۇيىمداستىردى.
تورەباي ابدىكارىموۆتىڭ ەرىكتىلىك ەڭبەگى جوعارى باعالانىپ، پرەزيدەنتتىڭ 2020-جىلعى 11- جەلتوقسانداعى جارلىعى بويىنشا «حالىق العىسى» مەدالىمەن جانە العىس حاتىمەن ماراپاتتالعان.
