قىتاي سۋپەرماركەتتەرىندە قازاقستاندىق ونىمدەر بۇرىشى اشىلادى
تاراپتار قازاقستاندىق ءونىمدى قىتاي نارىعىندا ىلگەرىلەتۋ جونىندەگى ءىس- شارالاردى بىرلەسىپ ۇيىمداستىرۋعا كەلىستى.
«ستراتەگيالىق قۇجات قازاقستان مەن قىتاي كومپانيالارى اراسىنداعى بىرلەسكەن جۇمىستىڭ تيىمدىلىگىن ارتتىرۋعا، تىعىز كوممەرتسيالىق قاتىناستاردى دامىتۋعا جانە قىتايعا دايىن قازاقستاندىق ءونىمنىڭ شيكىزاتتىق ەمەس ەكسپورتىنىڭ كولەمىن ۇلعايتۋعا باعىتتالعان»، - دەدى ق ح ر- داعى KazakhExport وڭىرلىك ديرەكتورى سەرگەي سالمانوۆ.
مەموراندۋمعا سايكەس «ۋحان حانوۋ» قازاقستاندىق ءونىمدى يمپورتتايدى جانە ونى حۋبەي پروۆينتسياسى مەن قىتايدىڭ ساۋدا جەلىلەرىندە تاقىرىپتىق بولىمدەر ارقىلى، قازاقتىڭ ۇلتتىق ستيلىندە مامانداندىرىلعان ستەندتەر ورناتا وتىرىپ ساتادى. كومپانيا قازاقستاندىق تاۋارلار مەن KazakhExport مۇمكىندىكتەرىن ەل اۋماعىندا ىلگەرىلەتۋگە قولداۋ كورسەتەدى.
قازاقستاننىڭ ۇلتتىق ەكسپورتتىق ساقتاندىرۋ كومپانياسى وتاندىق وندىرۋشىلەرمەن بايلانىس ورناتۋعا جانە يمپورتتاۋشىلاردى قىزىقتىراتىن ءونىمدى ىزدەۋگە جاردەمدەسەدى. سونداي- اق، قازاقستاندىق ەكسپورتتاۋشىلار ءۇشىن قاجەتتى ساقتاندىرۋ مەن قارجىلاندىرۋدى قامتاماسىز ەتەدى.
تاراپتار قازاقستاندىق تاۋارلاردىڭ جەرگىلىكتى تۇتىنۋشىلار اراسىندا جوعارى سۇرانىسقا يە بولاتىنىنا سەنىم ءبىلدىردى. ق ح ر- عا ماي- توڭماي، ماكارون، كونديتەرلىك ونىمدەردى، سۋسىندار مەن باسقا دا تاۋارلاردى جەتكىزۋ جونىندە ۋاعدالاستىققا قول جەتكىزىلدى.
جىل باسىنان بەرى 53 ميلليارد تەڭگەگە ەكسپورتتىق كەلىسىمشارتتار بەكىتىلگەن. قىتايدىڭ 11 يمپورتتاۋشىسىمەن ۇن جانە كۇنباعىس ءدانىن جەتكىزۋ بويىنشا 17 كەلىسىمشارت جاسالعان.
ايتا كەتسەك، 2019 -جىلى KazakhExport جانە Wuhan Asia Europe Logistics Co ىنتىماقتاستىعى اياسىندا ۋحان قالاسىندا قازاقتىڭ ۇلتتىق ستيلىندە بەزەندىرىلگەن العاشقى تاقىرىپتىق ءبولىم اشىلعان ەدى. الايدا، پاندەمياعا بايلانىستى ىنتىماقتاستىق توقتاعان بولاتىن.
«ۋحان حانوۋ» - Han Xin Ou حالىقارالىق مارشرۋتتىق پويىزدارىنا ارنالعان ق ح ر مەملەكەتتىك تەمىرجول جۇك پلاتفورماسى. حۋبەي پروۆينتسياسىنىڭ ونداعان قالاسىندا زاماناۋي امبەباپ دۇكەندەرى، ساۋدا ورتالىقتارى، سۋپەرماركەتتەرى بار. سونداي- اق، يمپورت باعىتىندا كولىك لوگيستيكاسى مەن كەڭ ديستريبيۋتەرلىك جەلىسى جولعا قويىلعان. كومپانيانى ۋحان ۇكىمەتى سۋبسيديالايدى جانە ول - «ءبىر بەلدەۋ - ءبىر جول» ساياساتىنىڭ مۇشەسى.
