قازاقستان تۋرالى «ۇزدىك رومان» بايقاۋىنا ءوتىنىم قابىلداۋ اياقتالدى

بۇل تۋرالى بايقاۋدى ۇيىمداستىرۋشىلار حابارلادى.
«بۇگىن «قازاقستان تۋرالى ۇزدىك رومان» ادەبي بايقاۋعا قاتىسۋشىلاردىڭ شىعارمالارىن قابىلداۋ اياقتالدى. «Mecenat.kz» ادەبي سىيلىعىنىڭ ەكىنشى ماۋسىمىنا شىعارمالاردى قابىلداۋ قىركۇيەكتە باستالعان بولاتىن. بيىل بايقاۋعا شەتەلدەگى قانداستارىمىزدىڭ دا قاتىسۋىنا مۇمكىندىك بەرىلدى. ورىس تىلىندە تەك قازاقستاندىق اۆتورلار قاتىستى. سونىمەن، «قازاقستان تۋرالى ۇزدىك رومان» ادەبي بايقاۋىنىڭ ەكىنشى ماۋسىمىنا 103 ادام تىركەلىپ، 58 رومان جۇكتەلدى»، - دەپ جازىلعان جوبا اۆتورلارى تاراتقان مالىمەتتە.
ايتا كەتەيىك، ۇزدىك دەپ تانىلعان روماننىڭ اۆتورىنا ءومىر بويى اي سايىن 500 ا ق ش دوللارى كولەمىندە سىياقى تولەنەدى.
«ءبىزدىڭ بايقاۋدىڭ جەڭىمپازى ءومىر بويعى اي سايىن 500 دوللاردان سىياقى الىپ وتىراتىنىن ەستەرىڭىزگە سالامىز. جەڭىمپاز تەك وقىرماننىڭ داۋىس بەرۋىمەن انىقتالادى»، - دەلىنگەن رەسمي مالىمەتتە.
ادەبي بايقاۋدىڭ باستى ۇستانىمدارى مىنانداي:
- مەملەكەتتىك بيۋدجەتتەن تولىق تاۋەلسىز بولۋ؛ ؛
- اشىق جانە جاسىرىن مۇددەلەر قايشىلىعىن تۋدىراتىن قازىلاردان باس تارتۋ، ونىڭ ورنىنا وقىرمان داۋىسى ارقىلى جەڭىمپازدى انىقتاۋ؛
«Mecenat.kz» جوباسىنىڭ ماقساتى - قازاقستاندىق كوركەم ادەبيەتتى دامىتۋ جانە كىتاپ وقىرماندارىنىڭ ىنتاسىن ارتتىرۋ، جازۋشىلاردىڭ كاسىبي دەڭگەيىن كوتەرۋ جانە ولاردىڭ شىعارمالارىن الەمدىك كىتاپ نارىعىنا شىعارۋ.
ەسكە سالايىق، «مەتسەنات» ادەبي سىيلىعى بىلتىر ءبىرىنشى رەت ۇيىمداستىرىلعان. العاشقى ماۋسىمدا بەلگىلى جۋرناليست، جازۋشى شارحان قازىعۇلوۆتىڭ «كۇلپەت» رومانى ۇزدىك دەپ تانىلعان.
جوبا اۆتورى ەرلان اسقاربەكوۆتىڭ ايتۋىنشا، بيىل «مەتسەنات» سىيلىعىنا سىرتتاعى قازاق جازۋشىلارىن كوبىرەك تارتۋعا كۇش سالىنعان.