مەكتەپ كەزىندە ورالحان بوكەيدى جازۋشى بولادى دەپ ەش ويلاماپ ەدىك - الىبەك قاڭتارباي
ورالحان بوكەيدىڭ 80 جىلدىق مەرەيتويى اياسىنداعى رەسپۋبليكالىق كونفەرەنتسياعا جازۋشىلار، اباي، تۇركىستان، جامبىل، اقتوبە، پاۆلودار، شىعىس قازاقستان وبلىستارىنىڭ جانە استانا قالاسىنىڭ كىتاپحانا ماماندارى قاتىسىپ جاتىر.
ەڭ اۋەلى ءسوز العان بەلگىلى جازۋشى الىبەك اسقار ورالحان بوكەي جايلى ەستەلىكتەرىمەن ءبولىسىپ، ونىڭ مول مۇراسىنىڭ ماڭىزدىلىعى جايلى وي قوزعادى.
«قازىرگى ۋاقىتتا ەلىمىزدە ەڭ كوپ وقىلاتىن جازۋشى - ورالحان. ول جۋرناليستيكا مەن كوركەم ادەبيەتتى بايلانىستىرىپ جازعان العاشقى قالامگەر. اۋەلى بۇعان كەيبىرەۋلەر قارسى دا بولدى. ءبىراق ءوزىڭىز زەر سالساڭىز، الەمگە ايگىلى جازۋشى ەرنەست حەمينگۋەيدىڭ قاي شىعارماسىن الساڭىز دا ىشىندە جۋرناليستيكانىڭ ءىزى بايقالادى. ورالحان جازۋدى باستاعاندا ءبارى ورالحانشا جازعىسى كەلدى. ءبىراق وعان ەلىكتەۋ، سوعان ۇقساۋ مۇمكىن ەمەس. سەبەبى ورالحاننىڭ ءستيلى تىم ەرەك»، - دەيدى ول.
ورالحان بوكەيدىڭ جەرلەسى، جازۋشىلار وداعى ش ق و فيليالىنىڭ ديرەكتورى الىبەك قاڭتاربايدىڭ ايتۋىنشا، مەكتەپ كەزىندە ونى جازۋشى بولادى دەپ ەش ويلاماعان.
«ورالحان جازۋشىلىققا جارق ەتىپ كەلدى. جارق ەتىپ كەلدى دە، جارق ەتىپ كەتتى. وسىنداي شارالاردىڭ ماقساتى - ورالحان بوكەيدىڭ باقيلىق عۇمىرىن ماڭگىلىكتەۋ. كەزىندە ول ۇنەمى «ءبىز شال بولمايتىن شىعارمىز» دەپ وتىراتىن. سويتسەك، سەزگەن ەكەن عوي. ورالحان مەنەن ەكى سىنىپ جوعارى وقىدى. ول كەزدە اياداي اۋىلدان الىپ جازۋشى شىعادى دەگەنگە سەنبەپپىز. ۇساق- ۇساق بۇلاقتار قۇرالىپ، اساۋ تولقىندى بۇقتىرما وزەنىنە اينالادى عوي. مەنىڭشە، ورەكەڭنىڭ شىعارماشىلىعى دا وسى بۇقتىرما سەكىلدى»، - دەيدى جازۋشى.
مەكتەپ بىتىرگەن سوڭ ورالحان بوكەي الماتىداعى قۇرمانعازى اتىنداعى كونسەرۆاتورياعا اكتەر ماماندىعىنا وقۋعا ءتۇسىپتى.
ءبىراق اناسى ونىڭ اكتەر بولۋىنا قارسى بولعان. ءسويتىپ، شەشەسىنىڭ سوزىنەن اسا الماعان ورالحان اۋىلعا قايتقان.
«اۋىلدا ول تراكتورشىنىڭ كومەكشىسى سەكىلدى قارا جۇمىس ىستەدى. ءبىراق سوندا شىعارماشىلىققا دايىندالىپ ءجۇرىپتى. ءبىز ونى ەش سەزبەدىك. التايدىڭ باسىنا قاراپ تۇرىپ وقىس ويلار ايتىپ قالاتىن. سونىسىن تۇسىنبەي قالاتىنبىز. جوعارى سىنىپتىڭ قىزدارىنا كۇندە كەشكە حات جازىپ، قۇشاق- قۇشاق قىلىپ اكەلىپ، بىزگە وقىپ بەرەتىن. سويتسەك، ورالحان حاتتى عاشىق بولعاننان ەمەس، اسىپ- توگىلىپ جاتقان شابىتىن، شىعارماشىلىعىن سىرتقا شىعارۋ، قاعازعا ءتۇسىرۋ ءۇشىن جازادى ەكەن» ، - دەيدى الىبەك قاڭتارباي.
