تۇقىم قۋالايتىن اۋرۋلارعا توسقاۋىل قويىلادى

استانا. قازاقپارات- بالاعا اكە- شەشەدەن بەرىلەتىن اۋرۋلاردىڭ الدىن الاتىن تاجىريبە ءساتتى اياقتالدى. بۇل باعىتتا ۇلى بريتانيا عالىمدارى ءبىراز ەڭبەك ەتتى.

ال شۆەيساريالىق وقىمىستىلار ميدى زەرتتەيتىن بىرەگەي قۇرال ويلاپ تاپتى. ساراپشىلار مۇنداي تىڭ جاڭالىقتار مەديتسينا مەن وزگە دە سالالارعا سەرپىلىس اكەلەدى دەپ وتىر. ۇلى بريتانيادا عالىمدار بالانى ءۇش ادامنىڭ د ن ق- سىن قولدانۋ ارقىلى دۇنيەگە اكەلدى. زەرتتەۋشىلەر مۇنداي جەتىستىككە بالانىڭ اكە-شەشەسىنەن بەرىلەتىن اۋرۋلاردى الدىن الۋ ماقساتىندا قول جەتكىزدى. ول ءۇشىن دەنى ساۋ دونور ايەلدىڭ جۇمىرتقاجاسۋشاسى قولدانىلدى. وسىعان قاراماستان سابيدە اكە- شەشەسىنىڭ گەنەتيكالىق ەرەكشەلىكتەرى 99,8 پايىز ساقتالعان.

داگان ۋەللس، وكسفورد ۋنيۆەرسيتەتىنىڭ پروفەسسورى:

- مەنىڭ بىلەتىنىم مۇنداي زەرتتەۋلەر از جۇرگىزىلگەن جانە سىناقتاردىڭ كوبى اشىق جاريا تۇردە بولمادى. ءبىزدىڭ زەرتتەۋىمىز ارنايى رۇقساتپەن جۇزەگە اسىرىلدى. قول جەتكىزىلگەن مالىمەتتەر بۇل ءادىس تۋرالى ءبىلىمىمىزدى تولىقتىرىپ، ونىڭ تيىمدىلىگىن انىقتاۋعا مۇمكىندىك بەرەدى.

ميدى باقىلاي الاتىن ەلەكترود

ال شۆەيتساريا عالىمدارى ادامنىڭ ميىن باقىلاۋعا مۇمكىندىك بەرەتىن ەلەكترودتى ويلاپ تاپتى. بىرەگەي ماتەريال قولعاپقا ۇقسايدى. ول ادامنىڭ باس سۇيەگىنە ەنگىزىلەدى. عالىمدار بۇل كەلەشەكتە ميعا جاسالاتىن وپەراتسيالاردى جەڭىلدەتۋگە جول اشادى دەپ وتىر.

ستەفاني لاكۋر، لوزاننا پوليتەحنيكالىق مەكتەبىنىڭ پروفەسسورى:

- بۇل وتە جۇمساق ەلەكترودتاردان تۇرادى. ولاردىڭ جۇمساقتىعى سونشالىق ادمنىڭ ميى مەن باس سۇيەگىنىڭ اراسىنا ەنگىزۋگە بولادى. وسىلايشا ونىمەن بايلانىستى كەي دەرتتەردى انىقتاۋعا مۇمكىندىك بەرەدى.

كورتىشقاننىڭ كورگەنىن جاساندى ينتەلەكت قۇراستىردى

وسى ەل عالىمدارىنىڭ تاعى ءبىر توبى كورتىشقاننىڭ ميىنداعى سيگنالداردى انىقتاپ، ونىڭ نە كورگەنىن بىردەن قۇراستىراتىن جاساندى ينتەللەكت ويلاپ تاپتى. سىناق كەزىندە كوز تۇسىنا قويىلعان قۇرىلعى جورعالاۋشىنىڭ كورگەن بەينەفيلمىن اينا قاتەسىز جاساپ شىعاردى. ماماندار بۇل تىڭ جاڭالىق تا دەنساۋلىق سلاسىندا ۇلكەن وزگەرىس اكەلەرىنە سەنىمدى.

ماككەنزي مەتيس، لوزاننا پوليتەحنيكالىق مەكتەبىنىڭ پروفەسسورى:

- بۇل ميدىڭ قابىلداعان سيگنالدارى ارقىلى بەينەفيلىمدى جوعارى دالدىكپەن جاساپ شىعارۋدىڭ العاشقى تاجىريبەسى. جاساندى ينتەللەكت كورتىشقاننىڭ ميىنان العان اقپاردى 95 پايىز دالدىكپەن قۇراستىردى. ءبىزدىڭ ويىمىزشا بۇل ميدىڭ قابىلدايتىن مالىمەتتەردى وقۋعا مۇمكىندىك بارىن كورسەتەدى.

دەنگە بەزگەگىنە توسقاۋىل

ارگەنتينا زەرتتەۋشىلەرى ەلدە ءجيى ءورشيتىن دەنگە بەزگەگىن جەڭۋدىڭ جولىن تاپقانداي. ماماندار بۇل ىستە يادرولىق ەنەرگياعا جۇگىنۋدى ءجون كورگەن. ياعني اۋرۋدى تاسمالداۋشى ماسانىڭ اتالىعى زارارسىزداندىرىلىپ، ىندەتتىڭ تارالۋىنا توسقاۋىل قويىلماق. بۇل باعىتتاعى سىناقتار 2016 -جىلدان بەرى جۇرگىزىلىپ كەلەدى. ماماندار اپتاسىنا 500 مىڭ اتالىق ماسانى زارارسىزداندىرۋعا بولاتىنىن ايتادى.

www.24.kz