بۇگىن اقىن ورازاقىن اسقار دۇنيەگە كەلگەن كۇن
88 جىل بۇرىن (1935-2019) اقىن ورازاقىن اسقار ۇلى اسقار دۇنيەگە كەلگەن.
قىتايدىڭ شينجياڭ ولكەسىنە قاراستى ىلە ايماعىندا تۋعان. ءۇرىمجى قالاسىنداعى ۇلتتار ينستيتۋتىن، س. م. كيروۆ اتىنداعى قازاق مەملەكەتتىك ۋنيۆەرسيتەتىن (ءال-فارابي اتىنداعى قازاق ۇلتتىق ۋنيۆەرسيتەتىن) بىتىرگەن. 1955 -جىلى اتامەكەنى قازاقستانعا تۇبەگەيلى قونىس اۋداردى. شەكارادان ولەڭ تولى قولجازبا داپتەرلەرىن الا كەلگەن ورازاقىن بىردەن الماتىداعى جازۋشىلار وداعىنا كەلىپ، اقىندار حاميت ەرعاليەۆ، عافۋ قايىربەكوۆ، جاپپار ومىربەكوۆتەرگە جولىعادى. ولار جاس اقىننىڭ ولەڭدەرىن ۇناتىپ، سول كەزدە باسپاعا دايىندالىپ جاتقان جاس اقىنداردىڭ «قوس جۇرەك» اتتى جيناعىنا ءبىر توپ ولەڭدەرىن دەرەۋ ەنگىزەدى.
1961 -جىلى اراب ءارپىن بىلۋىنە بايلانىستى ارنايى سۇرانىسپەن قازاق س س ر عىلىم اكادەمياسىنىڭ ش. ءۋاليحانوۆ اتىنداعى تاريح، ارحەولوگيا جانە ەتنوگرافيا ينستيتۋتىنا كىشى عىلىمي قىزمەتكەر بولىپ ورنالاسادى. 1964-1970 -جىلدارى قازاقستان جازۋشىلار وداعىنىڭ ادەبيەتتى ناسيحاتتاۋ بيۋروسىندا نۇسقاۋشى، پوەزيا سەكسياسىندا ورىنباسار بولىپ قىزمەت اتقارادى.
1970-1984 -جىلدارى كىتاپ پالاتاسىندا ءبولىم مەڭگەرۋشى، ودان 1995 -جىلعا دەيىن «جالىن» باسپاسىندا پوەزيا ءبولىمىنىڭ اعا رەداكتورى بولدى. «قورىقتار الەمىنە ساياحات» دەپ اتالاتىن توپتاما ولەڭدەرى 1983 -جىلى قازاقستان تابيعات قورعاۋ قوعامىنىڭ بايگەسىنە يە بولدى. «تۋعان جەردىڭ كارتاسى» دەگەن داستانى 1974 -جىلى بالالار مەن جاستارعا ارنالعان «جالىن» باسپاسىنىڭ جابىق كونكۋرسىندا جۇلدەگە يە بولدى.
«تۇڭعىش»، «مەيىرىم»، «بەلجايلاۋ»، «بالقاراعاي»، «وركەش»، «وربۇلاق»، «كۇنگەي»، «تاۋەلسىزدىك تارتۋلارى» اتتى جيناقتارى جارىق كوردى. ول قازاقتىڭ قارا ولەڭ تۇرلەرىن ۇزاق جىلدار بويى ەل ىشىنەن جيناپ، جيىرما مىڭ جولدىق ەكى كىتابىن جاريالادى.
بۇل ەڭبەگى 1994 -جىلى مادەنيەت مينيسترلىگى مەن عىلىم اكادەمياسى، ادەبيەت ينستيتۋتى بىرىگىپ جاريالاعان اۋىز ادەبيەتىن جيناۋشىلارعا ارنالعان بايگەدە ءبىرىنشى ورىندى جەڭىپ الدى.
