قىتايدىڭ بۇكىل الەمنەن جاسىرىن تۇردە عارىش كەمەسىن جاساعانى بەلگىلى بولدى

استانا. قازاقپارات - قىتاي بىرنەشە جىل بويى قايتا پايدالانۋعا بولاتىن عارىش اپپاراتىن جاساپ كەلەدى جانە قازىردىڭ وزىندە ءبىراز تابىسقا جەتكەن.

Shenlong («قۇداي ايداھار») دەپ اتالاتىن كەمە وربيتادا 276 كۇن وتكىزگەننەن كەيىن جاقىندا ەكىنشى سىناق ۇشۋىن اياقتادى. اقپاراتتى قىتايدىڭ اەروعارىشتىق عىلىم جانە تەحنولوگيا كورپوراتسياسى (CASC) دا راستادى.

ءبىراق ميسسيا، عارىش اپپاراتى جانە ءبىر جىلعا جۋىق ەكسپەريمەنتتىك ۇشۋ كەزىندە جۇرگىزىلگەن پروتسەستەردىڭ ەگجەي-تەگجەيى ايتىلماعان.

قىتايدىڭ Chongfu Shiyong Shiyong Hangtian Qi (CSSHQ) عارىش كەمەسى 2020-جىلدىڭ قىركۇيەگىندە سىناقتان ءوتىپ، جەرگە ءساتتى قونعانى بۇرىن حابارلانعان بولاتىن. جۋرناليستەردىڭ ايتۋىنشا، بۇل كەمە Shenlong دەپ اتالادى.

امەريكالىق SpaceNews جۋرنالى وسى ميسسيا تۋرالى قولدا بار بارلىق اقپاراتتى تالداپ، CCSHQ كەمەنىڭ ۇشۋ كەزىندە كوپتەگەن وربيتالىق مانيەۆرلەر جاساپ، شىڭجاڭداعى لوپ-نۇر اسكەري بازاسىنا قونعانىن جازعان.

2022-جىلدىڭ تامىزىندا 90 كۇندىك ۇشۋدان كەيىن بۇل قۇرىلعى وربيتاعا شاعىن سپۋتنيك شىعارعان. ا ق ش عارىش كۇشتەرى (USSF) العان باقىلاۋ دەرەكتەرى اتالمىش كەمە Boeing X-37B ۇشاعىنا ۇقسايتىنىن ايتادى.

مۇنىڭ ءبارى قىتايدىڭ SpaceX جۇيەسىنە ۇقساس وتە اۋىر زىمىران جاساۋ باعدارلاماسىنىڭ ءبىر بولىگى بولۋى مۇمكىن دەگەن بولجام بار. زىمىران تۇجىرىمداماسى 2021-جىلدىڭ ساۋىرىندە ۇسىنىلعان.

بەيجىڭ سونداي-اق Tengyun («اسپانداعى شاباندوز») دەپ اتالاتىن تاعى ءبىر قايتا پايدالانۋعا بولاتىن عارىش اپپاراتىن جاساپ جاتىر. ونىڭ تۇجىرىمداماسى 2021-جىلى Airshow China كورمەسىندە تانىستىرىلعان.

massaget.kz