اقمولالىق كاسىپكەرگە ديزەلدى جەڭىلدىكپەن بەرۋدەن نەگىزسىز باس تارتىلعان

كوكشەتاۋ. قازاقپارات - اقمولا وبلىسىندا كاسىپكەرگە جەڭىلدەتىلگەن ديزەل وتىنىن بەرۋدەن نەگىزسىز باس تارتىلعان.

اكىمشىلىك كەدەرگىلەرگە تاپ بولعان بۇلاندى اۋدانىنداعى شارۋاشىلىق باسشىسى وبلىستىق سىبايلاس جەمقورلىققا قارسى قىزمەت دەپارتامەنتىنە جۇگىندى، دەپ حابارلايدى قازاقپارات ءتىلشىسى ۆەدومستۆونىڭ باسپا ءسوز قىزمەتىنە سىلتەمە جاساپ.

بەلگىلى بولعانداي، بيىل استىق داقىلدارىن وسىرۋمەن اينالىساتىن كاسىپكەرگە ەگىس ناۋقانىن جۇرگىزۋ ءۇشىن مەملەكەتتىك قولداۋ شەڭبەرىندە 15,8 توننا كەپىلدەندىرىلگەن (جەڭىلدىكتى) ديزەل وتىنى بولىنگەن. بۇل رەتتە جانار- جاعارماي اگرارشىلارعا اي سايىن جەتكىزىلەدى.

اقپاننان ناۋرىزعا دەيىن فەرمەر شەتەلدە بولىپ، سول سەبەپتى ديزەل وتىنىن الۋ ءۇشىن ارزانداتىلعان جانار- جاعارماي جەتكىزۋ جونىندەگى وپەراتورعا جۇگىنە المادى. الايدا، ءساۋىر ايىندا جۇگىنگەن كەزدە، وپەراتور ءوتىنىمنىڭ ۋاقتىلى بەرىلمەگەندىگىنە سىلتەمە جاساي وتىرىپ، اۋىل شارۋاشىلىعى تاۋارىن وندىرۋشىگە وتكەن كەزەڭگە 6,6 توننا جەڭىلدىكتى ديزەل وتىنىن بەرۋدەن باس تارتقان.

«دەپارتامەنت اۋىل شارۋاشىلىعى باسقارماسىنىڭ، وپەراتوردىڭ جانە ج ش س- ءنىڭ قاتىسۋىمەن كەزدەسۋ وتكىزىپ، ەكى اي ىشىندە جانار- جاعارماي جەتكىزۋدەن باس تارتۋدىڭ نەگىزسىز ەكەنىن انىقتادى. ناتيجەسىندە كاسىپكەر ديزەل وتىنىنىڭ قاجەتتى كەپىلدەندىرىلگەن كولەمىن جەڭىلدەتىلگەن باعامەن الىپ، كوكتەمگى ەگىس جۇمىستارىنا دايىندىقتى جالعاستىرا الدى»، - دەدى ۆەدومستۆودان.

ايتا كەتسەك، بۇدان بۇرىن اقمولا وبلىسىندا جالعان حاتتاما تولتىرعان پوليسيا قىزمەتكەرى سوتتالعانىن جازعان ەدىك.