قايتارىلعان اكتيۆتەردى باسقاراتىن مەملەكەتتىك قور قۇرىلماق
ۇكىمەت باسشىسى جاۋابىندا «زاڭسىز ساتىپ الىنعان اكتيۆتەردى مەملەكەتكە قايتارۋ تۋرالى» زاڭ جوباسىندا اكتيۆتەردى قايتارۋدىڭ ەرىكتى جانە ءماجبۇرلى ەكى ءتاسىلى كوزدەلگەنىن اتاپ وتەدى.
«ەرىكتى ءتارتىپ ءۇشىن اكتيۆتەردى مەملەكەتكە بەرۋدى ىنتالاندىرۋ تەتىكتەرى ازىرلەنگەن. ءماجبۇرلى ءتارتىپ سوتتاردىڭ شەشىمدەرى نەگىزىندە نەمەسە حالىقارالىق ءوزارا ءىس-قيمىل ارقىلى قىلمىستىق نە ازاماتتىق ءىس جۇرگىزۋ اياسىندا زاڭسىز ساتىپ الىنعان اكتيۆتەردى تاركىلەۋدى كوزدەيدى. قايتارىلعان اكتيۆتەردى باسقارۋ ماقساتىندا زاڭ جوباسىندا قايتارىلعان اكتيۆتەردى ساتۋدان تۇسكەن اقشانى جيناقتايتىن قازىناشىلىق ورگاندارىندا ارنايى شوت اشا وتىرىپ، مەملەكەتتىك قور قۇرۋ كوزدەلەدى. بۇل قاراجات ەل حالقىنىڭ ءال-اۋقاتىن ارتتىرۋعا باعىتتالعان الەۋمەتتىك جانە ەكونوميكالىق جوبالاردى قارجىلاندىرۋ ءۇشىن عانا پايدالانىلاتىن بولادى»، - دەدى ءاليحان سمايىلوۆ.
بۇدان باسقا، ونىڭ اتاپ وتۋىنشە، زاڭنىڭ ىلەسپە جوباسىندا اكتيۆتەردى زاڭسىز شىعارۋعا ىقپال ەتكەن سەبەپتەر مەن جاعدايلاردى جويۋعا باعىتتالعان قاجەتتى ءىس-شارالار قابىلداۋ ءۇشىن ءبىرقاتار زاڭنامالىق اكتىلەرگە وزگەرىس ەنگىزۋ جوسپارلانعان.
«زاڭ جوباسى اكتيۆتەردى قايتارۋدىڭ مۇلدەم جاڭا تاسىلدەرى مەن تەتىكتەرىن كوزدەيتىنىن ەسكەرە وتىرىپ، ونى مۇقيات زەرتتەۋ مەن ازىرلەۋ ءۇشىن قوسىمشا ۋاقىت قاجەت بولدى»، - دەدى پرەمەر-مينيستر.
