فينالدىق جەكپە- جەك كۇردەلى بولدى - الەم چەمپيونى اسلانبەك شىمبەرگەنوۆ

استانا. قازاقپارات - وزبەكستاندا وتكەن بوكستان الەم چەمپيوناتىنىڭ جەڭىمپازدارى مەن جۇلدەگەرلەرىن قارسى الۋ سالتاناتىندا قۇراما كاپيتانى اسلانبەك شىمبەرگەنوۆ جارىس جولىنان شىعىپ قالعان ساكەن بيبوسىنوۆتىڭ جەكپە- جەگىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«جارىس وتە جوعارى دەڭگەيدە ءوتتى. بار كۇشىمىزدى سالىپ، ءبىرىنشى ورىن الدىق. قازاق ەلى قۋاندى دەپ ويلايمىن، ءوزىم دە قاتتى قۋانىپ تۇرمىن. بۇل الەم چەمپيوناتى قاتىسۋشىلار سانى ەڭ كوپ تىركەلگەن سايىس بولىپ سانالادى. ءار كەزدەسۋدىڭ وزىندىك قيىنشىلىعى بار. مەن ءۇشىن فينالدىق جەكپە- جەك كۇردەلى بولدى»، - دەدى الەم چەمپيونى اسلانبەك شىمبەرگەنوۆ.

ول سونىمەن قاتار كوپ تالقىلاۋعا تۇسكەن ساكەن بيبوسىنوۆتىڭ جەكپە- جەگىنە قاتىستى پىكىر ءبىلدىردى.

«جالپى سايىس ءادىل ءوتتى. دەگەنمەن ساكەن بيبوسىنوۆتىڭ جەكپە- جەگىنىڭ قورىتىندىسى كۇماندى دەپ ايتۋعا بولادى. مەنىڭ كوزقاراسىم بويىنشا ساكەن ۇتىپ تۇرعان سياقتى. ال تورەشىلەر باسقا شەشىم شىعاردى. ءبىز تورەشىلەرگە قارسى شىعا المايمىز»، - دەپ پىكىر قوستى ا. شىمبەرگەنوۆ باق وكىلدەرىنىڭ ساۋالىنا جاۋاپ بەرە وتىرىپ.

ەسكە سالايىق، ساكەن بيبوسىنوۆ اتالعان چەمپيوناتتاعى العاشقى كەزدەسۋىندە تورەشىلەر شەشىمىمەن جەڭىلىپ قالعان ەدى.

كەيىن قازاقستان بوكس فەدەراتسياسى ساكەن بيبوسىنوۆ جەكپە- جەگىنە قاتىستى حالىقارالىق بوكس فەدەراتسياسىنىڭ باسشىلىعىنا شاعىم جولدادى.

قوسا كەتسەك بۇگىن جەڭىمپازداردىڭ العاشقى لەگى ەلگە ورالدى. چەمپيونداردىڭ ەكىنشى توبى - سانجار تاشكەنباي مەن نۇربەك ورالباي استانا ۋاقىتىمەن ساعات 16:00دە ەلورداعا قونادى.

ايتا كەتەيىك، قازاقستان قۇراماسى وزبەكستاندا وتكەن الەم چەمپيوناتىن 4 التىن، 1 كۇمىس مەدالمەن اياقتادى. سپورتشىلاردى مەملەكەت باسشىسى قاسىم- جومارت توقايەۆ قۇتتىقتادى.