ول مەنى ۇرعاندى ۇناتادى: استانادا ەرەكشە توي كويلەگىنىڭ تانىستىرىلىمى ءوتتى

استانا. قازاقپارات - استانا دۇكەندەرىنىڭ بىرىندە توي كويلەگىنىڭ پىشىنىمەن كەسكىندەلگەن ەرەكشە ارت-نىساننىڭ تانىستىرىلىمى ءوتتى، دەپ حابارلايدى قازاقپارات ءتىلشىسى.

«جاڭا ادامدار» جاستار قوزعالىسى تاعى ءبىر ەرەكشە باستامامەن جۇرت نازارىن وزدەرىنە اۋدارىپ وتىر.

بۇل جولى ولار وتباسىنداعى زورلىق-زومبىلىق تاقىرىبىن قوزعاپ، ەرەكشە ارت-نىساننىڭ تانىستىرىلىمىن وتكىزدى.

بۇل شارانى ولار 15- مامىر - حالىقارالىق وتباسى كۇنىنە وراي ۇيىمداستىرعان.

«ايەلدەرگە جاسالاتىن زورلىق-زومبىلىق ءبىزدىڭ زاماننىڭ ەڭ ماڭىزدى الەۋمەتتىك ماسەلەسىنىڭ ءبىرى دەپ ەسەپتەيمىز. زورلىق-زومبىلىق كورسەتۋشىلەر ۇشقارى ارەكەتى ارقىلى جابىرلەنۋشىلەردىڭ قۇقىعىن بۇزىپ قانا قويماي، ومىرىنە تۇتاستاي قاۋىپ توندىرەدى. قوعام بۇل ماسەلە تۋرالى كوبىرەك ايتىپ، كىنالىلەردى جازالاۋدى تالاپ ەتە ءبىلۋى كەرەك. ايەلدەردىڭ قۇقىعىن قۇرمەتتەپ، قورعاماي جاڭا جانە ءادىل قازاقستان قۇرا المايمىز»، - دەيدى قوزعالىس بەلسەندىسى عازيزا ۇلىقمانوۆا.

ارت-نىسانداعى «ول مەنى ۇرعاندى ۇناتادى» دەگەن جازۋ الىستان كوزگە شالىنادى.

اق ءتۇستى توي كويلەگىنىڭ ءون بويىندا قارا جازۋمەن ەلدەگى ەڭ شۋلى زورلىق-زومبىلىق فاكتىلەرى تۋرالى باسپا ءسوز مالىمەتتەرى كورىنىس تاپقان.

وسى ارقىلى يدەيا اۆتورلارى زورلىق-زومبىلىق مالىمەتتەرى تۋرالى گازەت قيىندىلارىنان تىگىلگەن كويلەكتى كەسكىندەۋگە تىرىسقان.

ەرەكشە كويلەكتىڭ جانىندا ارنايى تاقتا ورناتىلعان.

ول تاقتادا پسيحولوگ-ساراپشىلاردىڭ تۇرمىستىق زورلىق-زومبىلىق وقيعالارىن ەرتە باستان انىقتاۋ، ونداي ارەكەتتەرگە قارسى تۇرۋ جانە الدىن الۋ باعىتىنداعى پراكتيكالىق اقىل-كەڭەسى جازىلماق.