ا ە س قۇرىلىسىنا قانشا قاراجات كەتەدى

استانا. قازاقپارات - حالىق تاراپىنان ا ە س قۇرىلىسىنا قاتىستى وڭ پىكىر بار. بۇل تۋرالى ەنەرگەتيكا مينيسترلىگىنىڭ اتوم ەنەرگەتيكاسى جانە ونەركاسىپ دەپارتامەنتى ديرەكتورىنىڭ ورىنباسارى گۇلميرا مۇرسالوۆا ايتتى، دەپ حابارلايدى قازاقپارات ءتىلشىسى.

«ازىرشە، بولجاممەن ەكى رەاكتورى بار 1 ا ە س- ءتى ءبىر ورىنعا ورنالاستىرۋدى عانا قاراستىرىپ وتىرمىز. رەاكتور كوپ بولعان سايىن قۇرىلىستىڭ جالپى قۇنى دا ارزانىراق بولادى. ال ا ە س قۇرىلىسىندا ءبىرىنشى بلوك بارلىق ۋاقىتتا دا ەكىنشىسىنە قاراعاندا قىمباتقا تۇسەدى. ويتكەنى، ەكىنشى بلوكتىڭ قۇرىلىسى كەزىندە تاجىريبە دە، جوبالىق-سمەتالىق قۇجاتتاما دا، دايىن الاڭ دا، قانداي دا ءبىر ينفراقۇرىلىم دا بولادى»، - دەدى گۇلميرا مۇرسالوۆا ەۋرازيا ۇلتتىق ۋنيۆەرسيتەتىندە ا ە س- ءتىڭ ەكولوگياعا اسەرىن تالقىلاۋعا ارنالعان دوڭگەلەك ۇستەل وتىرىسىندا.

ونىڭ ايتۋىنشا، ا ە س قۇنى ينفراقۇرىلىمىن كەڭەيتۋ، جەر سىلكىنىسىنە قاۋىپسىزدىگىن كۇشەيتۋ سىندى كوپتەگەن فاكتورعا بايلانىستى اۋىتقىپ تۇرادى.

«سوندىقتان ناقتى سوماسىن ايتۋ مۇمكىن ەمەس. دەگەنمەن، الەمدىك تاجىريبەدە ەكى ەنەرگيا بلوكقا 10-12 ميلليارد دوللار ەتەدى. مۇنداي تاجىريبە بار. «سامۇرىق-قازىنا» قورىمەن بىرگە الەۋمەتتىك ساۋالناما جۇرگىزىلدى. جالپى، حالىق تاراپىنان ا ە س قۇرىلىسىنا قاتىستى وڭ پىكىر بار»، - دەدى ول.