الكەي مارعۇلان جەكە مۇراعاتىنان باۋىرجان مومىش ۇلىنىڭ قولجازباسى بار كارتا تابىلدى

پاۆلودار. قازاقپارات - الكەي مارعۇلان اتىنداعى پاۆلودار پەداگوگيكا ۋنيۆەرسيتەتىنىڭ تاريحشىلارى كەڭەس وداعىنىڭ باتىرى، حالىق قاھارمانى باۋىرجان مومىش ۇلىنىڭ الكەي مارعۇلانعا تابىستاپ كەتكەن كارتاسىن انىقتادى، دەپ حابارلايدى قازاقپارات.

عىلىم مينيسترلىگى مالىمەتىنشە، تاريحي قۇجات اكادەميكتىڭ جەكە مۇراعاتىنان تابىلعان.

بۇل تۋرالى مارعۇلان ۋنيۆەرسيتەتىندە وتكەن كونفەرەنسيا بارىسىندا Margulan Centre ارحەولوگيا ورتالىعىنىڭ قىزمەتكەرى ەڭلىك ابەۋوۆا بايانداما جاساپ، العاش رەت كوپشىلىك قاۋىمعا جاريا ەتتى.

كارتادا شىمكەنت وبلىسىنىڭ 1972-جىلعى اكىمشىلىك تەرريتورياسى كورسەتىلگەن.

اتالعان تاريحي قۇجاتتى حالىق قاھارمانى اكادەميك الكەي مارعۇلانعا 1973-جىلدىڭ جەلتوقسان ايىندا بەرگەن.

مىنە، سودان بەرى جارتى عاسىر ۋاقىت ءوتتى.

كارتانىڭ باستى بەتىنە باۋىرجان مومىش ۇلى ءوز قولىمەن:

«تارازىدا تاستاريا،

سايرامداعى سانسىزباي،

ارىستاندا الباربارىس،

جۋالىدا جولبارىس،

تۇركىستاندا تۇيمەنباپ» دەگەن سوزدەر بار ءبىزدىڭ ەلدە، سول سوزدەردىڭ تاريحى تەرەڭ، استارى جەر استىندا (ارحەولوگيا) جاتقان بولار» دەپ جازىپ قويعان.

ال كارتانىڭ ارتقى بەتىنە سىزبا مەن ونىڭ قىسقاشا انىقتاماسىن كەلتىرگەن، ياعني اتا-بابالارى بويىنشا اقپارات بەرىلگەن.

«بۇل قۇجاتتىڭ بۇگىنگى تاڭدا تاريحي ماڭىزى وتە زور. سەبەبى 60 تان اسىپ، 70 كە تاياعان كەزدەگى ەكى تاۋ تۇلعانىڭ اراسىنداعى قارىم-قاتىناس، تۋعان جەرىنە، تاريحىنا دەگەن ىقىلاسى سەزىلىپ تۇر. باۋىرجان مومىش ۇلى جەر اتاۋلارى مەن باتىر بابالارى تۋرالىا اقپاراتتى بولىسە وتىرىپ، ءارى قاراي زەرتتەۋگە، تاريحتى زەردەلەۋگە، جاڭا ماعلۇمات الۋعا قولقا سالىپ وتىرعانداي»، - دەيدى ەڭلىك قابىكەن قىزى.