مارات قالقابايەۆ ءىستى بولعان ءماسىموۆتىڭ مۇلكىنە قاتىستى پىكىر ءبىلدىردى

استانا. قازاقپارات – ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى مارات قالقابايەۆ ءىستى بولعان كارىم ءماسىموۆتىڭ مۇلكىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

بۇگىن ماجىلىستە وتكەن باسپا ءسوز ءماسليحاتىندا تىلشىلەر م. قالقابايەۆتان ك. ءماسىموۆ ءىسى بويىنشا سۇرادى.

«بۇل سۇراقتاردى سوتقا جولداۋ كەرەك. ءبىز الدىن الا تەرگەۋمەن اينالىستىق، ونى اياقتاپ، سوتقا جىبەردىك. سوت شەشىمىن وزدەرىڭىز بىلەسىزدەر»، - دەدى مارات قالقابايەۆ.

سونىمەن قاتار «ونىڭ مۇلكىن كىم ساتادى» دەگەن سۇراققا ۇ ق ك ءتوراعاسىنىڭ ورىنباسارى بۇل ماسەلەمەن سوت ورىنداۋشىلار اينالىسىپ جاتىر دەپ جاۋاپ بەردى.

«سوت شەشىمىنەن كەيىن سوت ورىنداۋشىلارى اينالىسادى»، - دەپ ءتۇسىندىردى مارات قالقابايەۆ.

ول قۇپيا دەرەكتەردىڭ جاريالانبايتىنىن العا تارتىپ، ءىستىڭ باسقا مالىمەتتەرىن ايتۋدان باس تارتتى.

«ءىس وتە قۇپيا، ءبىز ەشتەڭەنى جاريا ەتە المايمىز»، - دەپ قوستى مارات قالقابايەۆ.

بۇدان بۇرىن حابارلانعانداي، بيىل ءساۋىر ايىندا استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ماسىموۆكە جانە ونىڭ ورىنباسارلارى ا. سادىقۇلوۆقا، د. ەرعوجينگە، م. وسيپوۆكە قاتىستى قىلمىستىق ءىس بويىنشا ۇكىمىن جاريا ەتتى.

سوت شەشىمىمەن اتالعان ءۇش باپ بويىنشا دا كىنالى دەپ تانىلعان ك. ءماسىموۆ - 18, ا. سادىقۇلوۆ - 16 جىلعا، د. ەرعوجين تاعىلعان ايىپتارعا سايكەس - 15 جىلعا، م. وسيپوۆ بولسا بيلىك پەن لاۋازىمدىق وكىلەتتىگىن اسىرا پايدالانۋ بابىمەن 3 جىلعا باس بوستاندىعىنان ايىرىلدى. سوتتالۋشىلاردىڭ بارلىعى ءومىر بويى مەملەكەتتىك قىزمەتتە لاۋازىم يەلەنە المايدى. سونىمەن قاتار بارلىعى گەنەرال شەندەرىنەن جانە مەملەكەتتىك ناگرادالارىنان ايىرىلادى.