قىتاي بالالارى دومبىراعا اۋەس

استانا. قازاقپارات- قىتايدا قازاقتىڭ قارا دومبىراسىن ۇيرەنەمىن دەۋشى قىتاي بالالارىنىڭ سانى ارتتى. دومبىرانىڭ ارنايى كۋرسىنان وتكەن سوڭ ولار قازاقستانعا كەلىپ، بىلىمدەرىن شىڭداماق.

قالادان قاشىق تۇراتىن لان تيان بەيجىڭگە ايىنا ءبىر رەت كەلەدى. ونداعى ماقساتى - ويىن- ساۋىق قۇرۋ ەمەس، دومبىرا ۇيرەنۋ. قازاقتىڭ قاسيەتتى دومبىراسىنا دەگەن قىزىعۋشىلىعى وسىدان ەكى جىل بۇرىن انسامبل ورىنداعان كۇيدى ەستىگەن سوڭ، ويانعان.

شي دەحۋا، اناسى:

- ءبىز الىستا تۇرامىز، سوندىقتان، ادەتتە، ۇلىم اسپاپتى ونلاين ۇيرەنەدى. بەيجىڭگە ايىنا ءبىر كەلەمىز. ۇشاقپەن ۇشىپ كەلۋ 3 ساعات الادى. مەرەكە كەزىندە كەلۋگە تىرىسامىز، سەبەبى، قوسىمشا ساباقتى قاتار الىپ كەتۋ مۇمكىندىگى تۋادى. ۇلىم دومبىرانى وتە جاقسى كورەدى. ال ءبىز ۇلىمىزدىڭ وسىنداي ەرەكشە اسپاپتى تاڭداعانىن قۇپ كوردىك.

لان تيان مەكتەپتەگى ساباعىنان كەيىن، دومبىرا ۇيىرمەسىنە كەلىپ، 1,5 ساعات ءدارىس الادى.

لان تيان، وقۋشى:

- دومبىرانىڭ ءۇنى عاجاپ جانە ول وتە ادەمى اسپاپ. ال دومبىرادا ويناپ وتىرعان جىگىت، ءتىپتى، ادەمى كورىنىس.

لان تياننىڭ ۇستازى: «دومبىرا - بالالارعا وڭاي ۇيرەنۋگە بولاتىن اسپاپ»، - دەيدى. بۇگىندە بەيجىڭ بالالارىنا اسپاپتا ويناۋدى ۇيرەتىن جۇرگەن ليۋ حۋەي دومبىرامەن العاش 13 جاسىندا تانىسقان. ول ۇستازى يمانالى تولەۋبايدىڭ العاشقى شاكىرتى ەكەنىن ەسكە الدى. ءالى كۇنگە دەيىن، قازاق ۇستازىنىڭ وقۋ قۇرالى بويىنشا ساباق بەرەدى.

ليۋ حۋەي، ۇستاز:

- قازىر قىتايدا دومبىرا وتە تانىمال، ورىنداۋشىلار ونىڭ سۇيەمەلدەۋىمەن ءان ايتقاندى ۇناتادى. ولار ءۇشىن بۇل - كەرەمەت گارمونيكالىق قۇرال. بالالارعا كەلەتىن بولساق، مۇندا دومبىرانىڭ تانىمالدىعى ونىڭ اۋەزدىلىگىنە بايلانىستى، دىبىستار جۇرەك تەرەڭدىگىمەن سينحروندالادى. بالالار بۇل قۇرالدى وتە جاقسى كورەدى.

ال قىتايدىڭ مەملەكەتتىك بالالار ورتالىعىندا دومبىرا سىنىبى 2 جىل بۇرىن اشىلدى. وقىتۋشىنىڭ ايتۋىنشا، بۇل - ق ح ر استاناسىنداعى بالالارعا قازاق ۇلتتىق اسپابىن ۇيرەتەتىن جالعىز ورتالىق.

ليۋ حۋەي، ۇستاز:

- مەنىڭ توبىمدا نەگىزىنەن موڭعولدار، شە ۇلتىنىڭ وكىلدەرى مەن قىتاي بالالارى بار. مەن بالالارعا كۇيلەردىڭ تاريحىن، ءارتۇرلى ەرتەگىلەردى ايتىپ وتىرامىن. توپتاعى ۇلكەن بالالاردىڭ جاسى 13، ال ەڭ كىشىسى - 4 تەگى بالاقايلار.

ۇستازدىڭ ايتۋىنشا، ساباققا قاتىسىپ جۇرگەن وقۋشىلاردىڭ ءبىر بولىگى قازاقستاندا - دومبىرانىڭ وتانىندا وقۋىن جالعاستىرۋعا نيەتتى.

اۆتورلارى: سىمبات عالىمجان قىزى، بوتاگوز سىرعابايەۆا

www.24.kz