ونداي شەشىمدى قابىلداۋعا دايىنبىز - ەردوعان سايلاۋدىڭ ەكىنشى تۋرىن وتكىزۋ جايىندا
بۇل تۋرالى ەل پرەزيدەنتى رەجەپ تايىپ ەردوعان دۇيسەنبىگە قاراعان ءتۇنى انكارادا ادىلەت جانە دامۋ پارتياسىنىڭ (ءا د پ) ورتالىق كەڭسەسى جانىنا جينالعان جەرلەستەرىنە ارناعان سوزىندە ايتتى، دەپ حابارلايدى قازاقپارات انادولى اگەنتتىگىنە سىلتەمە جاساپ.
تۇركيا باسشىسىنىڭ ايتۋىنشا، داۋىس بەرۋدىڭ الدىن الا قورىتىندىسى ءا د پ مەن ونىڭ كانديداتىنىڭ ەلدەگى باسقا ساياسي كۇشتەردەن الدەقايدا وزعانىن كورسەتىپ وتىر.
«سايلاۋداعى كورسەتكىشتەرگە قاراماستان باستى جەڭىمپاز - تۇركيا جانە ونىڭ حالقى. 14- مامىرداعى سايلاۋ - ەلىمىزدىڭ سايلاۋ تاريحىندا حالىق ەڭ جوعارى بەلسەندىلىك تانىتقان ناۋقاننىڭ ءبىرى بولدى. بۇكىل ساياسي قىزمەتىمىزدە حالىقتىڭ قالاۋىنا قۇرمەتپەن قارادىق. ءبىز وسى سايلاۋدا دا، ودان كەيىنگى بارلىق سايلاۋدا دا داۋىس بەرۋشىلەردىڭ پىكىرىنە قۇرمەتپەن قارايمىز. داۋىس بويىنشا ايىرماشىلىق - شامامەن 2,6 ميلليون. سوڭعى ناتيجە بۇل الشاقتىقتى تاعى ارتتىردى. سوندىقتان ءبىز ءبىرىنشى تۋردا (پرەزيدەنت سايلاۋىنىڭ) جەڭىسكە جەتۋ مۇمكىندىگىنە ءالى دە سەنەمىز. ەگەر حالىق ەكىنشى تۋردىڭ پايداسىنا تاڭداۋ جاساعان بولسا، وندا ءبىز بۇل شەشىمدى قابىلداۋعا دايىنبىز»، - دەدى تۇركيا باسشىسى.
ەردوعان پرەزيدەنت سايلاۋىندا ونىڭ كانديداتۋراسىن قولداعان 27 ميلليون سايلاۋشىنىڭ ءارقايسىسىنا ريزاشىلىعىن ءبىلدىردى.
«سونىمەن قاتار سايلاۋعا كەلگەن 56 ميلليون سايلاۋشىعا العىسىمدى ايتامىن»، - دەپ اتاپ ءوتتى ساياساتكەر.
پرەزيدەنت ەردوعان تۇركيا پارلامەنتىنە سايلاۋدا قۇرامىنا ءا د پ كىرەتىن «حالىق وداعىنىڭ» كوپشىلىك داۋىسقا يە ەكەنىن اتاپ ءوتتى.
ايتا كەتەيىك، ءدال قازىرگى ساتتە، ياعني استانا ۋاقىتىمەن 08:30-دا ءۇش ۇمىتكەر - رەجەپ تايىپ ەردوعان - %49,34، كەمال قىلىشداروعلى - %45، سينان وعان -% 5,24 داۋىس جينادى.
بۇكىل بيۋللەتەندەردىڭ 98,22 پايىزى سانالىپ ۇلگەردى.
سايلاۋ ناتيجەسى جايلى تىكەلەي ءەفيردى تومەندەگى Twitter پاراقشادان تاماشالاۋعا بولادى.
