بوكستان ءا چ: وزبەكستان قۇراماسىنداعى قازاق جىگىتى الەم چەمپيونى اتاندى

استانا. قازاقپارات - تاشكەنت قالاسىندا بوكستان ەرلەر اراسىندا ءوتىپ جاتقان الەم چەمپيوناتىندا وزبەكستان قۇراماسىنداعى قازاق جىگىتى رۋسلان ابدۋللايەۆ جەڭىمپاز اتاندى، دەپ حابارلايدى قازاقپارات ءتىلشىسى.

ازيا چەمپيونى، تاشكەنت توڭىرەگىندەگى قىبىرايدىڭ تۋماسى، 20 جاستاعى ر. ابدۋللايەۆ 63,5 كەلىگە دەيىنگى سالماقتا موڭعوليالىق چينزوريك باتارسۋحپەن شەبەرلىك بايقاستى.

ءبىرىنشى راۋندتا بەس تورەشىنىڭ تورتەۋى رۋسلان باسىم دەپ تاپتى. ەكىنشى كەزەڭدە ءۇش قازى جەڭىستى وزبەكستاندىق بوكسشىعا بەردى. قورىتىندى ەسەپ - 5:0.

وسىلايشا، رۋسلان ابدۋللايەۆ وزبەكستان قورجىنىنا بەسىنشى التىندى سالدى.

ر. ابدۋللايەۆ بۇدان ءۇش-ءتورت جىل بۇرىن، قازاقستانعا كەلىپ، جاستار اراسىندا ەل چەمپيوناتىنا قاتىسقانىمەن، جولى بولا قويعان جوق. سودان كەيىن وزبەكستانعا قايتا ورالعان ەدى.

ەسكە سالا كەتەيىك، بۇدان بۇرىن جانىبەك ءالىمحان ۇلىنىڭ كاسىپقوي بوكستا ستيۆەن باتلەردى نوكاۋتپەن ۇتقانىن جازعان بولاتىنبىز.

سونداي-اق بۇگىن تاشكەنتتە قازاقستاندىق ءۇش بوكسشى چەمپيوندىق اتاق ءۇشىن رينگكە شىعاتىنى حابارلاندى.

ماحمۇد سابىرحان وزبەك بوكسشىسىن قوس نوكداۋنمەن ۇتىپ، الەم چەمپيونى اتاندى.