يلون ماسك تۆيتتەردىڭ جاڭا باس ديرەكتورىن تانىستىردى
«Twitter-دىڭ جاڭا باس ديرەكتورى رەتىندە ليندا ياككارينونى كورۋگە قۋانىشتىمىن!»، - دەپ جازدى ول.
ايتۋىنشا، كومپانيانىڭ جاڭا باسشىسى بيزنەس-وپەراتسيالارمەن اينالىساتىن بولادى. ال ءوزى ءونىمنىڭ ديزاينى مەن جاڭا تەحنولوگيالارعا دەن قويادى.
ليندا ياككارينو 60 جاستا.
ايتا كەتەيىك، الەمنىڭ ەڭ باي ادامدارىنىڭ ءبىرى ي. ماسك Twitter-دى وتكەن جىلدىڭ قازان ايىندا 44 ميلليارد دوللارعا ساتىپ العان بولاتىن. ول بىردەن كومپانيانىڭ ديرەكتورلار كەڭەسىن تاراتتى.
سونداي-اق امەريكانىڭ بۇرىنعى پرەزيدەنتى دونالد ترامپتىڭ وسى الەۋمەتتىك جەلىدەگى اككاۋنتىن بلوكتان شىعارۋ-شىعارماۋ جونىندە ساۋالناما وتكىزىپ، قورىتىندىسى بويىنشا شەشىم شىعاردى.
بۇدان بولەك، ول وقىرماندارىنا «Twitter-دىڭ باسشىلىعىنان كەتۋىم كەرەك پە؟» دەگەن ساۋال جولداپ، ءوز پاراقشاسىندا ساۋالناما وتكىزدى.
ساۋالناماعا قاتىسقانداردىڭ دەنى (%57,5) ي. ماسكتىڭ Twitter ساياساتىن باسقارۋدان باس تارتقانى ءجون دەپ تاپقان. وسىعان وراي ول: «وسى جۇمىسقا كەلىسەتىن اقىماق ادامدى تاپقان بويدا باسشىلىقتان كەتەمىن. سودان كەيىن تەك باعدارلامالىق جاساقتاما مەن سەرۆەرلەر كوماندالارىنا جاۋاپتى بولامىن»، - دەپ جاۋاپ جازعان ەدى.
ءبىر جولى يلون ماسك Twitter الەۋمەتتىك جەلىسىنىڭ باس ديرەكتورى ەتىپ، ءوز ءيتىن «تاعايىنداعان» بولاتىن.
