سەۋلدەگى تۋريزم كورمەسىندە قازاقستان ۇزدىك ءىس-شارا ءۇشىن ماراپاتتالدى
ق ر مادەنيەت جانە سپورت مينيسترلىگىنەن ءمالىم ەتكەندەي، ءىس-شاراعا الەمنىڭ 70 ەلىنەن 800 ەكسپونەنت جانە 120 مىڭنان استام كەلۋشى جينالدى. قازاقستاندىق دەلەگاتسيا قۇرامىندا وتاندىق تۋروپەراتورلار، اۆياكومپانيالار جانە باسقا دا بيزنەس وكىلدەرى بولدى. قازاقستان ستەندىن الماتى وبلىسىنىڭ اكىمدىگى ۇيىمداستىرعان.
ىسكەرلىك باعدارلامادان باسقا، كەلۋشىلەردىڭ نازارىن ستەندكە اۋدارۋ ءۇشىن ۇلتتىق ۇلگىدە كيىنگەن اكتەرلەر مەن مۋزىكانتتار شاقىرىلدى، قوناقتارعا ۇلتتىق تاعامدار ۇسىنىلدى. بۇل كورمەنى ۇيىمداستىرۋشىلار نازارىنان تىس قالماعان. ناتيجەسىندە قازاقستاندىق دەلەگاتسيانىڭ ستەند اياسىنداعى ءىس-شارالارى ۇزدىك تانىلىپ، ارنايى سىيلىقپەن ماراپاتتالدى.
«SITF سىندى اۋقىمدى كورمەلەرگە قاتىسۋ قازاقستانعا باسقا ەلدەردەن تۋريستەردى تارتۋ ءۇشىن وتە ماڭىزدى. مىسالى، وتكەن جىلى ەلىمىزگە وڭتۇستىك كورەيادان 16 مىڭ قوناق كەلدى. وسىنداي ستەندتەرمەن ءبىز ەلىمىزگە كەلۋشىلەر سانىن ۇلعايتۋدى، سونداي- اق الەۋەتتى تۋريستەردى قازاقستاننىڭ مادەنيەتى مەن ۇلتتىق دامىمەن تانىستىرۋدى ماقسات ەتىپ وتىرمىز»، - دەپ اتاپ ءوتتى ق ر م س م تۋريزم يندۋسترياسى كوميتەتىنىڭ ءتوراعاسى داستان رىسپەكوۆ.
